නිශමය්ය තවාථ යානවාර්තාං භෘශමාර්තාඃ පශුපාලබාලිකාස්තාඃ ।
කිමිදං කිමිදං කථං න්විතීමාඃ සමවේතාඃ පරිදේවිතාන්යකුර්වන් ॥1॥
කරුණානිධිරේෂ නංදසූනුඃ කථමස්මාන් විසෘජේදනන්යනාථාඃ ।
බත නඃ කිමු දෛවමේවමාසීදිති තාස්ත්වද්ගතමානසා විලේපුඃ ॥2॥
චරමප්රහරේ ප්රතිෂ්ඨමානඃ සහ පිත්රා නිජමිත්රමංඩලෛශ්ච ।
පරිතාපභරං නිතංබිනීනාං ශමයිෂ්යන් ව්යමුචඃ සඛායමේකම් ॥3॥
අචිරාදුපයාමි සන්නිධිං වෝ භවිතා සාධු මයෛව සංගමශ්රීඃ ।
අමෘතාංබුනිධෞ නිමජ්ජයිෂ්යේ ද්රුතමිත්යාශ්වසිතා වධූරකාර්ෂීඃ ॥4॥
සවිෂාදභරං සයාච්ඤමුච්චෛඃ අතිදූරං වනිතාභිරීක්ෂ්යමාණඃ ।
මෘදු තද්දිශි පාතයන්නපාංගාන් සබලෝऽක්රූරරථේන නිර්ගතෝऽභූඃ ॥5॥
අනසා බහුලේන වල්ලවානාං මනසා චානුගතෝऽථ වල්ලභානාම් ।
වනමාර්තමෘගං විෂණ්ණවෘක්ෂං සමතීතෝ යමුනාතටීමයාසීඃ ॥6॥
නියමාය නිමජ්ය වාරිණි ත්වාමභිවීක්ෂ්යාථ රථේऽපි ගාංදිනේයඃ ।
විවශෝऽජනි කිං න්විදං විභෝස්තේ නනු චිත්රං ත්වවලෝකනං සමංතාත් ॥7॥
පුනරේෂ නිමජ්ය පුණ්යශාලී පුරුෂං ත්වාං පරමං භුජංගභෝගේ ।
අරිකංබුගදාංබුජෛඃ ස්ඵුරංතං සුරසිද්ධෞඝපරීතමාලුලෝකේ ॥8॥
ස තදා පරමාත්මසෞඛ්යසිංධෞ විනිමග්නඃ ප්රණුවන් ප්රකාරභේදෛඃ ।
අවිලෝක්ය පුනශ්ච හර්ෂසිංධෝරනුවෘත්ත්යා පුලකාවෘතෝ යයෞ ත්වාම් ॥9॥
කිමු ශීතලිමා මහාන් ජලේ යත් පුලකෝऽසාවිති චෝදිතේන තේන ।
අතිහර්ෂනිරුත්තරේණ සාර්ධං රථවාසී පවනේශ පාහි මාං ත්වම් ॥10॥