සංප්රාප්තෝ මථුරාං දිනාර්ධවිගමේ තත්රාංතරස්මින් වස-
න්නාරාමේ විහිතාශනඃ සඛිජනෛර්යාතඃ පුරීමීක්ෂිතුම් ।
ප්රාපෝ රාජපථං චිරශ්රුතිධෘතව්යාලෝකකෞතූහල-
ස්ත්රීපුංසෝද්යදගණ්යපුණ්යනිගලෛරාකෘෂ්යමාණෝ නු කිම් ॥1॥
ත්වත්පාදද්යුතිවත් සරාගසුභගාඃ ත්වන්මූර්තිවද්යෝෂිතඃ
සංප්රාප්තා විලසත්පයෝධරරුචෝ ලෝලා භවත් දෘෂ්ටිවත් ।
හාරිණ්යස්ත්වදුරඃස්ථලීවදයි තේ මංදස්මිතප්රෞඪිව-
න්නෛර්මල්යෝල්ලසිතාඃ කචෞඝරුචිවද්රාජත්කලාපාශ්රිතාඃ ॥2॥
තාසාමාකලයන්නපාංගවලනෛර්මෝදං ප්රහර්ෂාද්භුත-
ව්යාලෝලේෂු ජනේෂු තත්ර රජකං කංචිත් පටීං ප්රාර්ථයන් ।
කස්තේ දාස්යති රාජකීයවසනං යාහීති තේනෝදිතඃ
සද්යස්තස්ය කරේණ ශීර්ෂමහෘථාඃ සෝऽප්යාප පුණ්යාං ගතිම් ॥3॥
භූයෝ වායකමේකමායතමතිං තෝෂේණ වේෂෝචිතං
දාශ්වාංසං ස්වපදං නිනේථ සුකෘතං කෝ වේද ජීවාත්මනාම් ।
මාලාභිඃ ස්තබකෛඃ ස්තවෛරපි පුනර්මාලාකෘතා මානිතෝ
භක්තිං තේන වෘතාං දිදේශිථ පරාං ලක්ෂ්මීං ච ලක්ෂ්මීපතේ ॥4॥
කුබ්ජාමබ්ජවිලෝචනාං පථිපුනර්දෘෂ්ට්වාऽංගරාගේ තයා
දත්තේ සාධු කිලාංගරාගමදදාස්තස්යා මහාංතං හෘදි ।
චිත්තස්ථාමෘජුතාමථ ප්රථයිතුං ගාත්රේऽපි තස්යාඃ ස්ඵුටං
ගෘහ්ණන් මංජු කරේණ තාමුදනයස්තාවජ්ජගත්සුංදරීම් ॥5॥
තාවන්නිශ්චිතවෛභවාස්තව විභෝ නාත්යංතපාපා ජනා
යත්කිංචිද්දදතේ ස්ම ශක්ත්යනුගුණං තාංබූලමාල්යාදිකම් ।
ගෘහ්ණානඃ කුසුමාදි කිංචන තදා මාර්ගේ නිබද්ධාංජලි-
ර්නාතිෂ්ඨං බත හා යතෝऽද්ය විපුලාමාර්තිං ව්රජාමි ප්රභෝ ॥6॥
ඒෂ්යාමීති විමුක්තයාऽපි භගවන්නාලේපදාත්ර්යා තයා
දූරාත් කාතරයා නිරීක්ෂිතගතිස්ත්වං ප්රාවිශෝ ගෝපුරම් ।
ආඝෝෂානුමිතත්වදාගමමහාහර්ෂෝල්ලලද්දේවකී-
වක්ෂෝජප්රගලත්පයෝරසමිෂාත්ත්වත්කීර්තිරංතර්ගතා ॥7॥
ආවිෂ්ටෝ නගරීං මහෝත්සවවතීං කෝදංඩශාලාං ව්රජන්
මාධුර්යේණ නු තේජසා නු පුරුෂෛර්දූරේණ දත්තාංතරඃ ।
ස්රග්භිර්භූෂිතමර්චිතං වරධනුර්මා මේති වාදාත් පුරඃ
ප්රාගෘහ්ණාඃ සමරෝපයඃ කිල සමාක්රාක්ෂීරභාංක්ෂීරපි ॥8॥
ශ්වඃ කංසක්ෂපණෝත්සවස්ය පුරතඃ ප්රාරංභතූර්යෝපම-
ශ්චාපධ්වංසමහාධ්වනිස්තව විභෝ දේවානරෝමාංචයත් ।
කංසස්යාපි ච වේපථුස්තදුදිතඃ කෝදංඩඛංඩද්වයී-
චංඩාභ්යාහතරක්ෂිපූරුෂරවෛරුත්කූලිතෝऽභූත් ත්වයා ॥9॥
ශිෂ්ටෛර්දුෂ්ටජනෛශ්ච දෘෂ්ටමහිමා ප්රීත්යා ච භීත්යා තතඃ
සංපශ්යන් පුරසංපදං ප්රවිචරන් සායං ගතෝ වාටිකාම් ।
ශ්රීදාම්නා සහ රාධිකාවිරහජං ඛේදං වදන් ප්රස්වප-
න්නානංදන්නවතාරකාර්යඝටනාද්වාතේශ සංරක්ෂ මාම් ॥10॥