සෛරංධ්ර්යාස්තදනු චිරං ස්මරාතුරායා
යාතෝऽභූඃ සුලලිතමුද්ධවේන සාර්ධම් ।
ආවාසං ත්වදුපගමෝත්සවං සදෛව
ධ්යායංත්යාඃ ප්රතිදිනවාසසජ්ජිකායාඃ ॥1॥
උපගතේ ත්වයි පූර්ණමනෝරථාං ප්රමදසංභ්රමකංප්රපයෝධරාම් ।
විවිධමානනමාදධතීං මුදා රහසි තාං රමයාංචකෘෂේ සුඛම් ॥2॥
පෘෂ්ටා වරං පුනරසාවවෘණෝද්වරාකී
භූයස්ත්වයා සුරතමේව නිශාංතරේෂු ।
සායුජ්යමස්ත්විති වදේත් බුධ ඒව කාමං
සාමීප්යමස්ත්වනිශමිත්යපි නාබ්රවීත් කිම් ॥3॥
තතෝ භවාන් දේව නිශාසු කාසුචින්මෘගීදෘශං තාං නිභෘතං විනෝදයන් ।
අදාදුපශ්ලෝක ඉති ශ්රුතං සුතං ස නාරදාත් සාත්ත්වතතංත්රවිද්බබභෞ ॥4॥
අක්රූරමංදිරමිතෝऽථ බලෝද්ධවාභ්යා-
මභ්යර්චිතෝ බහු නුතෝ මුදිතේන තේන ।
ඒනං විසෘජ්ය විපිනාගතපාංඩවේය-
වෘත්තං විවේදිථ තථා ධෘතරාෂ්ට්ර්චේෂ්ටාම් ॥5॥
විඝාතාජ්ජාමාතුඃ පරමසුහෘදෝ භෝජනෘපතේ-
ර්ජරාසංධේ රුංධත්යනවධිරුෂාංධේऽථ මථුරාම් ।
රථාද්යෛර්ද්යෝර්ලබ්ධෛඃ කතිපයබලස්ත්වං බලයුත-
ස්ත්රයෝවිංශත්යක්ෂෞහිණි තදුපනීතං සමහෘථාඃ ॥6॥
බද්ධං බලාදථ බලේන බලෝත්තරං ත්වං
භූයෝ බලෝද්යමරසේන මුමෝචිථෛනම් ।
නිශ්ශේෂදිග්ජයසමාහෘතවිශ්වසෛන්යාත්
කෝऽන්යස්තතෝ හි බලපෞරුෂවාංස්තදානීම් ॥7॥
භග්නඃ ස ලග්නහෘදයෝऽපි නෘපෛඃ ප්රණුන්නෝ
යුද්ධං ත්වයා ව්යධිත ෂෝඩශකෘත්ව ඒවම් ।
අක්ෂෞහිණීඃ ශිව ශිවාස්ය ජඝංථ විෂ්ණෝ
සංභූය සෛකනවතිත්රිශතං තදානීම් ॥8॥
අෂ්ටාදශේऽස්ය සමරේ සමුපේයුෂි ත්වං
දෘෂ්ට්වා පුරෝऽථ යවනං යවනත්රිකෝට්යා ।
ත්වෂ්ට්රා විධාප්ය පුරමාශු පයෝධිමධ්යේ
තත්රාऽථ යෝගබලතඃ ස්වජනානනෛෂීඃ ॥9॥
පදභ්යාං ත්වාං පද්මමාලී චකිත ඉව පුරාන්නිර්ගතෝ ධාවමානෝ
ම්ලේච්ඡේශේනානුයාතෝ වධසුකෘතවිහීනේන ශෛලේ න්යලෛෂීඃ ।
සුප්තේනාංඝ්ර්යාහතේන ද්රුතමථ මුචුකුංදේන භස්මීකෘතේऽස්මින්
භූපායාස්මෛ ගුහාංතේ සුලලිතවපුෂා තස්ථිෂේ භක්තිභාජේ ॥10॥
ඓක්ෂ්වාකෝऽහං විරක්තෝऽස්ම්යඛිලනෘපසුඛේ ත්වත්ප්රසාදෛකකාංක්ෂී
හා දේවේති ස්තුවංතං වරවිතතිෂු තං නිස්පෘහං වීක්ෂ්ය හෘෂ්යන් ।
මුක්තේස්තුල්යාං ච භක්තිං ධුතසකලමලාං මෝක්ෂමප්යාශු දත්වා
කාර්යං හිංසාවිශුද්ධ්යෛ තප ඉති ච තදා ප්රාත්ථ ලෝකප්රතීත්යෛ ॥11॥
තදනු මථුරාං ගත්වා හත්වා චමූං යවනාහෘතාං
මගධපතිනා මාර්ගේ සෛන්යෛඃ පුරේව නිවාරිතඃ ।
චරමවිජයං දර්පායාස්මෛ ප්රදාය පලායිතෝ
ජලධිනගරීං යාතෝ වාතාලයේශ්වර පාහි මාම් ॥12॥