ඒවං තාවත් ප්රාකෘතප්රක්ෂයාංතේ
බ්රාහ්මේ කල්පේ හ්යාදිමේ ලබ්ධජන්මා ।
බ්රහ්මා භූයස්ත්වත්ත ඒවාප්ය වේදාන්
සෘෂ්ටිං චක්රේ පූර්වකල්පෝපමානාම් ॥1॥
සෝऽයං චතුර්යුගසහස්රමිතාන්යහානි
තාවන්මිතාශ්ච රජනීර්බහුශෝ නිනාය ।
නිද්රාත්යසෞ ත්වයි නිලීය සමං ස්වසෘෂ්ටෛ-
ර්නෛමිත්තිකප්රලයමාහුරතෝऽස්ය රාත්රිම් ॥2॥
අස්මාදෘශාං පුනරහර්මුඛකෘත්යතුල්යාං
සෘෂ්ටිං කරෝත්යනුදිනං ස භවත්ප්රසාදාත් ।
ප්රාග්බ්රාහ්මකල්පජනුෂාං ච පරායුෂාං තු
සුප්තප්රබෝධනසමාස්ති තදාऽපි සෘෂ්ටිඃ ॥3॥
පංචාශදබ්දමධුනා ස්වවයෝර්ධරූප-
මේකං පරාර්ධමතිවෘත්ය හි වර්තතේऽසෞ ।
තත්රාංත්යරාත්රිජනිතාන් කථයාමි භූමන්
පශ්චාද්දිනාවතරණේ ච භවද්විලාසාන් ॥4॥
දිනාවසානේऽථ සරෝජයෝනිඃ
සුෂුප්තිකාමස්ත්වයි සන්නිලිල්යේ ।
ජගංති ච ත්වජ්ජඨරං සමීයු-
ස්තදේදමේකාර්ණවමාස විශ්වම් ॥5॥
තවෛව වේෂේ ඵණිරාජි ශේෂේ
ජලෛකශේෂේ භුවනේ ස්ම ශේෂේ ।
ආනංදසාංද්රානුභවස්වරූපඃ
ස්වයෝගනිද්රාපරිමුද්රිතාත්මා ॥6॥
කාලාඛ්යශක්තිං ප්රලයාවසානේ
ප්රබෝධයේත්යාදිශතා කිලාදෞ ।
ත්වයා ප්රසුප්තං පරිසුප්තශක්ති-
ව්රජේන තත්රාඛිලජීවධාම්නා ॥7॥
චතුර්යුගාණාං ච සහස්රමේවං
ත්වයි ප්රසුප්තේ පුනරද්විතීයේ ।
කාලාඛ්යශක්තිඃ ප්රථමප්රබුද්ධා
ප්රාබෝධයත්ත්වාං කිල විශ්වනාථ ॥8॥
විබුධ්ය ච ත්වං ජලගර්භශායින්
විලෝක්ය ලෝකානඛිලාන් ප්රලීනාන් ।
තේෂ්වේව සූක්ෂ්මාත්මතයා නිජාංතඃ –
ස්ථිතේෂු විශ්වේෂු දදාථ දෘෂ්ටිම් ॥9॥
තතස්ත්වදීයාදයි නාභිරංධ්රා-
දුදංචිතං කිංචන දිව්යපද්මම් ।
නිලීනනිශ්ශේෂපදාර්ථමාලා-
සංක්ෂේපරූපං මුකුලායමානම් ॥10॥
තදේතදංභෝරුහකුඩ්මලං තේ
කලේවරාත් තෝයපථේ ප්රරූඪම් ।
බහිර්නිරීතං පරිතඃ ස්ඵුරද්භිඃ
ස්වධාමභිර්ධ්වාංතමලං න්යකෘංතත් ॥11॥
සංඵුල්ලපත්රේ නිතරාං විචිත්රේ
තස්මින් භවද්වීර්යධෘතේ සරෝජේ ।
ස පද්මජන්මා විධිරාවිරාසීත්
ස්වයංප්රබුද්ධාඛිලවේදරාශිඃ ॥12॥
අස්මින් පරාත්මන් නනු පාද්මකල්පේ
ත්වමිත්ථමුත්ථාපිතපද්මයෝනිඃ ।
අනංතභූමා මම රෝගරාශිං
නිරුංධි වාතාලයවාස විෂ්ණෝ ॥13॥