ස්නිග්ධාං මුග්ධාං සතතමපි තාං ලාලයන් සත්යභාමාං
යාතෝ භූයඃ සහ ඛලු තයා යාජ්ඤසේනීවිවාහම් ।
පාර්ථප්රීත්යෛ පුනරපි මනාගාස්ථිතෝ හස්තිපුර්යාං
සශක්රප්රස්ථං පුරමපි විභෝ සංවිධායාගතෝऽභූඃ ॥1॥
භද්රාං භද්රාං භවදවරජාං කෞරවේණාර්ථ්යමානාං
ත්වද්වාචා තාමහෘත කුහනාමස්කරී ශක්රසූනුඃ ।
තත්ර ක්රුද්ධං බලමනුනයන් ප්රත්යගාස්තේන සාර්ධං
ශක්රප්රස්ථං ප්රියසඛමුදේ සත්යභාමාසහායඃ ॥2॥
තත්ර ක්රීඩන්නපි ච යමුනාකූලදෘෂ්ටාං ගෘහීත්වා
තාං කාලිංදීං නගරමගමඃ ඛාංඩවප්රීණිතාග්නිඃ ।
භ්රාතෘත්රස්තාං ප්රණයවිවශාං දේව පෛතෘෂ්වසේයීං
රාජ්ඤාං මධ්යේ සපදි ජහෘෂේ මිත්රවිංදාමවංතීම් ॥3॥
සත්යාං ගත්වා පුනරුදවහෝ නග්නජින්නංදනාං තාං
බධ්වා සප්තාපි ච වෘෂවරාන් සප්තමූර්තිර්නිමේෂාත් ।
භද්රාං නාම ප්රදදුරථ තේ දේව සංතර්දනාද්යා-
ස්තත්සෝදර්යා වරද භවතඃ සාऽපි පෛතෘෂ්වසේයී ॥4॥
පාර්ථාද්යෛරප්යකෘතලවනං තෝයමාත්රාභිලක්ෂ්යං
ලක්ෂං ඡිත්වා ශඵරමවෘථා ලක්ෂ්මණාං මද්රකන්යාම් ।
අෂ්ටාවේවං තව සමභවන් වල්ලභාස්තත්ර මධ්යේ
ශුශ්රෝථ ත්වං සුරපතිගිරා භෞමදුශ්චේෂ්ටිතානි ॥5॥
ස්මෘතායාතං පක්ෂිප්රවරමධිරූඪස්ත්වමගමෝ
වහන්නංකේ භාමාමුපවනමිවාරාතිභවනම් ।
විභිංදන් දුර්ගාණි ත්රුටිතපෘතනාශෝණිතරසෛඃ
පුරං තාවත් ප්රාග්ජ්යෝතිෂමකුරුථාඃ ශෝණිතපුරම් ॥6॥
මුරස්ත්වාං පංචාස්යෝ ජලධිවනමධ්යාදුදපතත්
ස චක්රේ චක්රේණ ප්රදලිතශිරා මංක්ෂු භවතා ।
චතුර්දංතෛර්දංතාවලපතිභිරිංධානසමරං
රථාංගේන ඡිත්වා නරකමකරෝස්තීර්ණනරකම් ॥7॥
ස්තුතෝ භූම්යා රාජ්යං සපදි භගදත්තේऽස්ය තනයේ
ගජංචෛකං දත්වා ප්රජිඝයිථ නාගාන්නිජපුරීම් ।
ඛලේනාබද්ධානාං ස්වගතමනසාං ෂෝඩශ පුනඃ
සහස්රාණි ස්ත්රීණාමපි ච ධනරාශිං ච විපුලම් ॥8॥
භෞමාපාහෘතකුංඩලං තදදිතේර්දාතුං ප්රයාතෝ දිවං
ශක්රාද්යෛර්මහිතඃ සමං දයිතයා ද්යුස්ත්රීෂු දත්තහ්රියා ।
හෘත්වා කල්පතරුං රුෂාභිපතිතං ජිත්වේංද්රමභ්යාගම-
ස්තත්තු ශ්රීමදදෝෂ ඊදෘශ ඉති ව්යාඛ්යාතුමේවාකෘථාඃ ॥9॥
කල්පද්රුං සත්යභාමාභවනභුවි සෘජන් ද්ව්යෂ්ටසාහස්රයෝෂාඃ
ස්වීකෘත්ය ප්රත්යගාරං විහිතබහුවපුර්ලාලයන් කේලිභේදෛඃ ।
ආශ්චර්යාන්නාරදාලෝකිතවිවිධගතිස්තත්ර තත්රාපි ගේහේ
භූයඃ සර්වාසු කුර්වන් දශ දශ තනයාන් පාහි වාතාලයේශ ॥10॥