කුචේලනාමා භවතඃ සතීර්ථ්යතාං ගතඃ ස සාංදීපනිමංදිරේ ද්විජඃ ।
ත්වදේකරාගේණ ධනාදිනිස්ස්පෘහෝ දිනානි නින්යේ ප්රශමී ගෘහාශ්රමී ॥1॥
සමානශීලාऽපි තදීයවල්ලභා තථෛව නෝ චිත්තජයං සමේයුෂී ।
කදාචිදූචේ බත වෘත්තිලබ්ධයේ රමාපතිඃ කිං න සඛා නිෂේව්යතේ ॥2॥
ඉතීරිතෝऽයං ප්රියයා ක්ෂුධාර්තයා ජුගුප්සමානෝऽපි ධනේ මදාවහේ ।
තදා ත්වදාලෝකනකෞතුකාද්යයෞ වහන් පටාංතේ පෘථුකානුපායනම් ॥3॥
ගතෝऽයමාශ්චර්යමයීං භවත්පුරීං ගෘහේෂු ශෛබ්යාභවනං සමේයිවාන් ।
ප්රවිශ්ය වෛකුංඨමිවාප නිර්වෘතිං තවාතිසංභාවනයා තු කිං පුනඃ ॥4॥
ප්රපූජිතං තං ප්රියයා ච වීජිතං කරේ ගෘහීත්වාऽකථයඃ පුරාකෘතම් ।
යදිංධනාර්ථං ගුරුදාරචෝදිතෛරපර්තුවර්ෂ තදමර්ෂි කානනේ ॥5॥
ත්රපාජුෂෝऽස්මාත් පෘථුකං බලාදථ ප්රගෘහ්ය මුෂ්ටෞ සකෘදාශිතේ ත්වයා ।
කෘතං කෘතං නන්වියතේති සංභ්රමාද්රමා කිලෝපේත්ය කරං රුරෝධ තේ ॥6॥
භක්තේෂු භක්තේන ස මානිතස්ත්වයා පුරීං වසන්නේකනිශාං මහාසුඛම් ।
බතාපරේද්යුර්ද්රවිණං විනා යයෞ විචිත්රරූපස්තව ඛල්වනුග්රහඃ ॥7॥
යදි හ්යයාචිෂ්යමදාස්යදච්යුතෝ වදාමි භාර්යාං කිමිති ව්රජන්නසෞ ।
ත්වදුක්තිලීලාස්මිතමග්නධීඃ පුනඃ ක්රමාදපශ්යන්මණිදීප්රමාලයම් ॥8॥
කිං මාර්ගවිභ්රංශ ඉති භ්රංමන් ක්ෂණං ගෘහං ප්රවිෂ්ටඃ ස දදර්ශ වල්ලභාම් ।
සඛීපරීතාං මණිහේමභූෂිතාං බුබෝධ ච ත්වත්කරුණාං මහාද්භුතාම් ॥9॥
ස රත්නශාලාසු වසන්නපි ස්වයං සමුන්නමද්භක්තිභරෝऽමෘතං යයෞ ।
ත්වමේවමාපූරිතභක්තවාංඡිතෝ මරුත්පුරාධීශ හරස්ව මේ ගදාන් ॥10॥