වේදෛස්සර්වාණි කර්මාණ්යඵලපරතයා වර්ණිතානීති බුධ්වා
තානි ත්වය්යර්පිතාන්යේව හි සමනුචරන් යානි නෛෂ්කර්ම්යමීශ ।
මා භූද්වේදෛර්නිෂිද්ධේ කුහචිදපි මනඃකර්මවාචාං ප්රවෘත්ති-
ර්දුර්වර්ජං චේදවාප්තං තදපි ඛලු භවත්යර්පයේ චිත්ප්රකාශේ ॥1॥
යස්ත්වන්යඃ කර්මයෝගස්තව භජනමයස්තත්ර චාභීෂ්ටමූර්තිං
හෘද්යාං සත්ත්වෛකරූපාං දෘෂදි හෘදි මෘදි ක්වාපි වා භාවයිත්වා ।
පුෂ්පෛර්ගංධෛර්නිවේද්යෛරපි ච විරචිතෛඃ ශක්තිතෝ භක්තිපූතෛ-
ර්නිත්යං වර්යාං සපර්යාං විදධදයි විභෝ ත්වත්ප්රසාදං භජේයම් ॥2॥
ස්ත්රීශූද්රාස්ත්වත්කථාදිශ්රවණවිරහිතා ආසතාං තේ දයාර්හා-
ස්ත්වත්පාදාසන්නයාතාන් ද්විජකුලජනුෂෝ හංත ශෝචාම්යශාංතාන් ।
වෘත්ත්යර්ථං තේ යජංතෝ බහුකථිතමපි ත්වාමනාකර්ණයංතෝ
දෘප්තා විද්යාභිජාත්යෛඃ කිමු න විදධතේ තාදෘශං මා කෘථා මාම් ॥3॥
පාපෝऽයං කෘෂ්ණරාමේත්යභිලපති නිජං ගූහිතුං දුශ්චරිත්රං
නිර්ලජ්ජස්යාස්ය වාචා බහුතරකථනීයානි මේ විඝ්නිතානි ।
භ්රාතා මේ වංධ්යශීලෝ භජති කිල සදා විෂ්ණුමිත්ථං බුධාංස්තේ
නිංදංත්යුච්චෛර්හසංති ත්වයි නිහිතමතීංස්තාදෘශං මා කෘථා මාම් ॥4॥
ශ්වේතච්ඡායං කෘතේ ත්වාං මුනිවරවපුෂං ප්රීණයංතේ තපෝභි-
ස්ත්රේතායාං ස්රුක්ස්රුවාද්යංකිතමරුණතනුං යජ්ඤරූපං යජංතේ ।
සේවංතේ තංත්රමාර්ගෛර්විලසදරිගදං ද්වාපරේ ශ්යාමලාංගං
නීලං සංකීර්තනාද්යෛරිහ කලිසමයේ මානුෂාස්ත්වාං භජංතේ ॥5॥
සෝऽයං කාලේයකාලෝ ජයති මුරරිපෝ යත්ර සංකීර්තනාද්යෛ-
ර්නිර්යත්නෛරේව මාර්ගෛරඛිලද න චිරාත්ත්වත්ප්රසාදං භජංතේ ।
ජාතාස්ත්රේතාකෘතාදාවපි හි කිල කලෞ සංභවං කාමයංතේ
දෛවාත්තත්රෛව ජාතාන් විෂයවිෂරසෛර්මා විභෝ වංචයාස්මාන් ॥6॥
භක්තාස්තාවත්කලෞ ස්යුර්ද්රමිලභුවි තතෝ භූරිශස්තත්ර චෝච්චෛ:
කාවේරීං තාම්රපර්ණීමනු කිල කෘතමාලාං ච පුණ්යාං ප්රතීචීම් ।
හා මාමප්යේතදංතර්භවමපි ච විභෝ කිංචිදංචද්රසං ත්ව-
ය්යාශාපාශෛර්නිබධ්ය භ්රමය න භගවන් පූරය ත්වන්නිෂේවාම් ॥7॥
දෘෂ්ට්වා ධර්මද්රුහං තං කලිමපකරුණං ප්රාඞ්මහීක්ෂිත් පරීක්ෂිත්
හංතුං ව්යාකෘෂ්ටඛඩ්ගෝऽපි න විනිහතවාන් සාරවේදී ගුණාංශාත් ।
ත්වත්සේවාද්යාශු සිද්ධ්යේදසදිහ න තථා ත්වත්පරේ චෛෂ භීරු-
ර්යත්තු ප්රාගේව රෝගාදිභිරපහරතේ තත්ර හා ශික්ෂයෛනම් ॥8॥
ගංගා ගීතා ච ගායත්ර්යපි ච තුලසිකා ගෝපිකාචංදනං තත්
සාලග්රාමාභිපූජා පරපුරුෂ තථෛකාදශී නාමවර්ණාඃ ।
ඒතාන්යෂ්ටාප්යයත්නාන්යපි කලිසමයේ ත්වත්ප්රසාදප්රවෘද්ධ්යා
ක්ෂිප්රං මුක්තිප්රදානීත්යභිදධුඃ ඍෂයස්තේෂු මාං සජ්ජයේථාඃ ॥9॥
දේවර්ෂීණාං පිතෘණාමපි න පුනඃ ඍණී කිංකරෝ වා ස භූමන් ।
යෝऽසෞ සර්වාත්මනා ත්වාං ශරණමුපගතස්සර්වකෘත්යානි හිත්වා ।
තස්යෝත්පන්නං විකර්මාප්යඛිලමපනුදස්යේව චිත්තස්ථිතස්ත්වං
තන්මේ පාපෝත්ථතාපාන් පවනපුරපතේ රුංධි භක්තිං ප්රණීයාඃ ॥10॥