බංධුස්නේහං විජහ්යාං තව හි කරුණයා ත්වය්යුපාවේශිතාත්මා
සර්වං ත්යක්ත්වා චරේයං සකලමපි ජගද්වීක්ෂ්ය මායාවිලාසම් ।
නානාත්වාද්භ්රාංතිජන්යාත් සති ඛලු ගුණදෝෂාවබෝධේ විධිර්වා
ව්යාසේධෝ වා කථං තෞ ත්වයි නිහිතමතේර්වීතවෛෂම්යබුද්ධේඃ ॥1॥
ක්ෂුත්තෘෂ්ණාලෝපමාත්රේ සතතකෘතධියෝ ජංතවඃ සංත්යනංතා-
ස්තේභ්යෝ විජ්ඤානවත්ත්වාත් පුරුෂ ඉහ වරස්තජ්ජනිර්දුර්ලභෛව ।
තත්රාප්යාත්මාත්මනඃ ස්යාත්සුහෘදපි ච රිපුර්යස්ත්වයි න්යස්තචේතා-
ස්තාපෝච්ඡිත්තේරුපායං ස්මරති ස හි සුහෘත් ස්වාත්මවෛරී තතෝऽන්යඃ ॥2॥
ත්වත්කාරුණ්යේ ප්රවෘත්තේ ක ඉව නහි ගුරුර්ලෝකවෘත්තේऽපි භූමන්
සර්වාක්රාංතාපි භූමිර්නහි චලති තතස්සත්ක්ෂමාං ශික්ෂයේයම් ।
ගෘහ්ණීයාමීශ තත්තද්විෂයපරිචයේऽප්යප්රසක්තිං සමීරාත්
ව්යාප්තත්වංචාත්මනෝ මේ ගගනගුරුවශාද්භාතු නිර්ලේපතා ච ॥3
ස්වච්ඡඃ ස්යාං පාවනෝऽහං මධුර උදකවද්වහ්නිවන්මා ස්ම ගෘහ්ණාං
සර්වාන්නීනෝऽපි දෝෂං තරුෂු තමිව මාං සර්වභූතේෂ්වවේයාම් ।
පුෂ්ටිර්නෂ්ටිඃ කලානාං ශශින ඉව තනෝර්නාත්මනෝऽස්තීති විද්යාං
තෝයාදිව්යස්තමාර්තාංඩවදපි ච තනුෂ්වේකතාං ත්වත්ප්රසාදාත් ॥4॥
ස්නේහාද්ව්යාධාත්තපුත්රප්රණයමෘතකපෝතායිතෝ මා ස්ම භූවං
ප්රාප්තං ප්රාශ්නන් සහේය ක්ෂුධමපි ශයුවත් සිංධුවත්ස්යාමගාධඃ ।
මා පප්තං යෝෂිදාදෞ ශිඛිනි ශලභවත් භෘංගවත්සාරභාගී
භූයාසං කිංතු තද්වද්ධනචයනවශාන්මාහමීශ ප්රණේශම් ॥5॥
මා බද්ධ්යාසං තරුණ්යා ගජ ඉව වශයා නාර්ජයේයං ධනෞඝං
හර්තාන්යස්තං හි මාධ්වීහර ඉව මෘගවන්මා මුහං ග්රාම්යගීතෛඃ ।
නාත්යාසජ්ජේය භෝජ්යේ ඣෂ ඉව බලිශේ පිංගලාවන්නිරාශඃ
සුප්යාං භර්තව්යයෝගාත් කුරර ඉව විභෝ සාමිෂෝऽන්යෛර්න හන්යෛ ॥6॥
වර්තේය ත්යක්තමානඃ සුඛමතිශිශුවන්නිස්සහායශ්චරේයං
කන්යායා ඒකශේෂෝ වලය ඉව විභෝ වර්ජිතාන්යෝන්යඝෝෂඃ ।
ත්වච්චිත්තෝ නාවබුධ්යෛ පරමිෂුකෘදිව ක්ෂ්මාභෘදායානඝෝෂං
ගේහේෂ්වන්යප්රණීතේෂ්වහිරිව නිවසාන්යුංදුරෝර්මංදිරේෂු ॥7॥
ත්වය්යේව ත්වත්කෘතං ත්වං ක්ෂපයසි ජගදිත්යූර්ණනාභාත් ප්රතීයාං
ත්වච්චිංතා ත්වත්ස්වරූපං කුරුත ඉති දෘඪං ශික්ෂයේ පේශකාරාත් ।
විඩ්භස්මාත්මා ච දේහෝ භවති ගුරුවරෝ යෝ විවේකං විරක්තිං
ධත්තේ සංචිංත්යමානෝ මම තු බහුරුජාපීඩිතෝऽයං විශේෂාත් ॥8॥
හී හී මේ දේහමෝහං ත්යජ පවනපුරාධීශ යත්ප්රේමහේතෝ-
ර්ගේහේ විත්තේ කලත්රාදිෂු ච විවශිතාස්ත්වත්පදං විස්මරංති ।
සෝऽයං වහ්නේශ්ශුනෝ වා පරමිහ පරතඃ සාංප්රතංචාක්ෂිකර්ණ-
ත්වග්ජිහ්වාද්යා විකර්ෂංත්යවශමත ඉතඃ කෝऽපි න ත්වත්පදාබ්ජේ ॥9॥
දුර්වාරෝ දේහමෝහෝ යදි පුනරධුනා තර්හි නිශ්ශේෂරෝගාන්
හෘත්වා භක්තිං ද්රඪිෂ්ඨාං කුරු තව පදපංකේරුහේ පංකජාක්ෂ ।
නූනං නානාභවාංතේ සමධිගතමමුං මුක්තිදං විප්රදේහං
ක්ෂුද්රේ හා හංත මා මා ක්ෂිප විෂයරසේ පාහි මාං මාරුතේශ ॥10॥