ප්රාතඃ ස්මරාමි ලලිතාවදනාරවිංදං
බිංබාධරං පෘථුලමෞක්තිකශෝභිනාසම් ।
ආකර්ණදීර්ඝනයනං මණිකුංඩලාඪ්යං
මංදස්මිතං මෘගමදෝජ්ජ්වලඵාලදේශම් ॥ 1 ॥
ප්රාතර්භජාමි ලලිතාභුජකල්පවල්ලීං
රක්තාංගුළීයලසදංගුළිපල්ලවාඪ්යාම් ।
මාණික්යහේමවලයාංගදශෝභමානාං
පුංඩ්රේක්ෂුචාපකුසුමේෂුසෘණීර්දධානාම් ॥ 2 ॥
ප්රාතර්නමාමි ලලිතාචරණාරවිංදං
භක්තේෂ්ටදානනිරතං භවසිංධුපෝතම් ।
පද්මාසනාදිසුරනායකපූජනීයං
පද්මාංකුශධ්වජසුදර්ශනලාංඡනාඪ්යම් ॥ 3 ॥
ප්රාතඃ ස්තුවේ පරශිවාං ලලිතාං භවානීං
ත්රය්යංතවේද්යවිභවාං කරුණානවද්යාම් ।
විශ්වස්ය සෘෂ්ටවිලයස්ථිතිහේතුභූතාං
විද්යේශ්වරීං නිගමවාඞ්මමනසාතිදූරාම් ॥ 4 ॥
ප්රාතර්වදාමි ලලිතේ තව පුණ්යනාම
කාමේශ්වරීති කමලේති මහේශ්වරීති ।
ශ්රීශාංභවීති ජගතාං ජනනී පරේති
වාග්දේවතේති වචසා ත්රිපුරේශ්වරීති ॥ 5 ॥
යඃ ශ්ලෝකපංචකමිදං ලලිතාංබිකායාඃ
සෞභාග්යදං සුලලිතං පඨති ප්රභාතේ ।
තස්මෛ දදාති ලලිතා ඣටිති ප්රසන්නා
විද්යාං ශ්රියං විමලසෞඛ්යමනංතකීර්තිම් ॥