ඕං ශ්රී පරමාත්මනේ නමඃ
අථ අෂ්ටමෝऽධ්යායඃ
අක්ෂරපරබ්රහ්මයෝගඃ
අර්ජුන උවාච
කිං තද්බ්රහ්ම කිමධ්යාත්මං කිං කර්ම පුරුෂෝත්තම ।
අධිභූතං ච කිං ප්රෝක්තම් අධිදෛවං කිමුච්යතේ ॥1॥
අධියජ්ඤඃ කථං කෝऽත්ර දේහේऽස්මින්මධුසූදන ।
ප්රයාණකාලේ ච කථං ජ්ඤේයෝऽසි නියතාත්මභිඃ ॥2॥
ශ්රී භගවානුවාච
අක්ෂරං බ්රහ්ම පරමං ස්වභාවෝऽධ්යාත්මමුච්යතේ ।
භූතභාවෝද්භවකරඃ විසර්ගඃ කර්මසංජ්ඤිතඃ ॥3॥
අධිභූතං ක්ෂරෝ භාවඃ පුරුෂශ්චාධිදෛවතම් ।
අධියජ්ඤෝऽහමේවාත්ර දේහේ දේහභෘතාං වර ॥4॥
අංතකාලේ ච මාමේව ස්මරන්මුක්ත්වා කලේවරම් ।
යඃ ප්රයාති ස මද්භාවං යාති නාස්ත්යත්ර සංශයඃ ॥5॥
යං යං වාපි ස්මරන්භාවං ත්යජත්යංතේ කලේවරම් ।
තං තමේවෛති කෞංතේය සදා තද්භාවභාවිතඃ ॥6॥
තස්මාත්සර්වේෂු කාලේෂු මාමනුස්මර යුධ්ය ච ।
මය්යර්පිතමනෝබුද්ධිඃ මාමේවෛෂ්යස්යසංශයම් ॥7॥
අභ්යාසයෝගයුක්තේන චේතසා නාන්යගාමිනා ।
පරමං පුරුෂං දිව්යං යාති පාර්ථානුචිංතයන් ॥8॥
කවිං පුරාණමනුශාසිතාරම් අණෝරණීයාංසමනුස්මරේද්යඃ ।
සර්වස්ය ධාතාරමචිංත්යරූපං ආදිත්යවර්ණං තමසඃ පරස්තාත් ॥9॥
ප්රයාණකාලේ මනසාऽචලේන භක්ත්යා යුක්තෝ යෝගබලේන චෛව ।
භ්රුවෝර්මධ්යේ ප්රාණමාවේශ්ය සම්යක් ස තං පරං පුරුෂමුපෛති දිව්යම් ॥10॥
යදක්ෂරං වේදවිදෝ වදංති විශංති යද්යතයෝ වීතරාගාඃ ।
යදිච්ඡංතෝ බ්රහ්මචර්යං චරංති තත්තේ පදං සංග්රහේණ ප්රවක්ෂ්යේ ॥11॥
සර්වද්වාරාණි සංයම්ය මනෝ හෘදි නිරුධ්ය ච ।
මූර්ධ්න්යාධායාත්මනඃ ප්රාණම් ආස්ථිතෝ යෝගධාරණාම් ॥12॥
ඕමිත්යේකාක්ෂරං බ්රහ්ම ව්යාහරන්මාමනුස්මරන් ।
යඃ ප්රයාති ත්යජංදේහං ස යාති පරමාං ගතිම් ॥13॥
අනන්යචේතාඃ සතතං යෝ මාං ස්මරති නිත්යශඃ ।
තස්යාහං සුලභඃ පාර්ථ නිත්යයුක්තස්ය යෝගිනඃ ॥14॥
මාමුපේත්ය පුනර්ජන්ම දුඃඛාලයමශාශ්වතම් ।
නාප්නුවංති මහාත්මානඃ සංසිද්ධිං පරමාං ගතාඃ ॥15॥
ආබ්රහ්මභුවනාල්ලෝකාඃ පුනරාවර්තිනෝऽර්ජුන ।
මාමුපේත්ය තු කෞංතේය පුනර්ජන්ම න විද්යතේ ॥16॥
සහස්රයුගපර්යංතම් අහර්යද්බ්රහ්මණෝ විදුඃ ।
රාත්රිං යුගසහස්රාංතාං තේऽහෝරාත්රවිදෝ ජනාඃ ॥17॥
අව්යක්තාද්ව්යක්තයඃ සර්වාඃ ප්රභවංත්යහරාගමේ ।
රාත්ර්යාගමේ ප්රලීයංතේ තත්රෛවාව්යක්තසංජ්ඤකේ ॥18॥
භූතග්රාමඃ ස ඒවායං භූත්වා භූත්වා ප්රලීයතේ ।
රාත්ර්යාගමේऽවශඃ පාර්ථ ප්රභවත්යහරාගමේ ॥19॥
පරස්තස්මාත්තු භාවෝऽන්යඃ අව්යක්තෝऽව්යක්තාත්සනාතනඃ ।
යඃ ස සර්වේෂු භූතේෂු නශ්යත්සු න විනශ්යති ॥20॥
අව්යක්තෝऽක්ෂර ඉත්යුක්තඃ තමාහුඃ පරමාං ගතිම් ।
යං ප්රාප්ය න නිවර්තංතේ තද්ධාම පරමං මම ॥21॥
පුරුෂඃ ස පරඃ පාර්ථ භක්ත්යා ලභ්යස්ත්වනන්යයා ।
යස්යාංතඃ ස්ථානි භූතානි යේන සර්වමිදං තතම් ॥22॥
යත්ර කාලේ ත්වනාවෘත්තිම් ආවෘත්තිං චෛව යෝගිනඃ ।
ප්රයාතා යාංති තං කාලං වක්ෂ්යාමි භරතර්ෂභ ॥23॥
අග්නිර්ජ්යෝතිරහඃ ශුක්ලඃ ෂණ්මාසා උත්තරායණම් ।
තත්ර ප්රයාතා ගච්ඡංති බ්රහ්ම බ්රහ්මවිදෝ ජනාඃ ॥24॥
ධූමෝ රාත්රිස්තථා කෘෂ්ණඃ ෂණ්මාසා දක්ෂිණායනම් ।
තත්ර චාංද්රමසං ජ්යෝතිඃ යෝගී ප්රාප්ය නිවර්තතේ ॥25॥
ශුක්ලකෘෂ්ණේ ගතී හ්යේතේ ජගතඃ ශාශ්වතේ මතේ ।
ඒකයා යාත්යනාවෘත්තිම් අන්යයාऽऽවර්තතේ පුනඃ ॥26॥
නෛතේ සෘතී පාර්ථ ජානන් යෝගී මුහ්යති කශ්චන ।
තස්මාත්සර්වේෂු කාලේෂු යෝගයුක්තෝ භවාර්ජුන ॥27॥
වේදේෂු යජ්ඤේෂු තපස්සු චෛව දානේෂු යත්පුණ්යඵලං ප්රදිෂ්ටම් ।
අත්යේති තත්සර්වමිදං විදිත්වා යෝගී පරං ස්ථානමුපෛති චාද්යම් ॥28॥
॥ ඕං තත්සදිති ශ්රීමද්භගවද්ගීතාසු උපනිෂත්සු බ්රහ්මවිද්යායාං
යෝගශාස්ත්රේ ශ්රීකෘෂ්ණාර්ජුනසංවාදේ අක්ෂරපරබ්රහ්මයෝගෝ නාම අෂ්ටමෝऽධ්යායඃ ॥