අථ සප්තදශෝऽධ්යායඃ ।
ශ්රද්ධාත්රයවිභාගයෝගඃ

අර්ජුන උවාච ।
යේ ශාස්ත්රවිධිමුත්සෘජ්ය යජංතේ ශ්රද්ධයාන්විතාඃ ।
තේෂාං නිෂ්ඨා තු කා කෘෂ්ණ සත්ත්වමාහෝ රජස්තමඃ ॥ 1 ॥

ශ්රීභගවානුවාච ।
ත්රිවිධා භවති ශ්රද්ධා දේහිනාං සා ස්වභාවජා ।
සාත්ත්විකී රාජසී චෛව තාමසී චේති තාං ශෘණු ॥ 2 ॥

සත්ත්වානුරූපා සර්වස්ය ශ්රද්ධා භවති භාරත ।
ශ්රද්ධාමයෝऽයං පුරුෂෝ යෝ යච්ඡ්රද්ධඃ ස ඒව සඃ ॥ 3 ॥

යජංතේ සාත්ත්විකා දේවාන්යක්ෂරක්ෂාංසි රාජසාඃ ।
ප්රේතාන්භූතගණාංශ්චාන්යේ යජංතේ තාමසා ජනාඃ ॥ 4 ॥

අශාස්ත්රවිහිතං ඝෝරං තප්යංතේ යේ තපෝ ජනාඃ ।
දංභාහංකාරසංයුක්තාඃ කාමරාගබලාන්විතාඃ ॥ 5 ॥

කර්ෂයංතඃ ශරීරස්ථං භූතග්රාමමචේතසඃ ।
මාං චෛවාංතඃශරීරස්ථං තාන්විද්ධ්යාසුරනිශ්චයාන් ॥ 6 ॥

ආහාරස්ත්වපි සර්වස්ය ත්රිවිධෝ භවති ප්රියඃ ।
යජ්ඤස්තපස්තථා දානං තේෂාං භේදමිමං ශෘණු ॥ 7 ॥

ආයුඃසත්ත්වබලාරෝග්යසුඛප්රීතිවිවර්ධනාඃ ।
රස්යාඃ ස්නිග්ධාඃ ස්ථිරා හෘද්යා ආහාරාඃ සාත්ත්විකප්රියාඃ ॥ 8 ॥

කට්වම්ලලවණාත්යුෂ්ණතීක්ෂ්ණරූක්ෂවිදාහිනඃ ।
ආහාරා රාජසස්යේෂ්ටා දුඃඛශෝකාමයප්රදාඃ ॥ 9 ॥

යාතයාමං ගතරසං පූති පර්යුෂිතං ච යත් ।
උච්ඡිෂ්ටමපි චාමේධ්යං භෝජනං තාමසප්රියම් ॥ 10 ॥

අඵලාකාංක්ෂිභිර්යජ්ඤෝ විධිදෘෂ්ටෝ ය ඉජ්යතේ ।
යෂ්ටව්යමේවේති මනඃ සමාධාය ස සාත්ත්විකඃ ॥ 11 ॥

අභිසංධාය තු ඵලං දංභාර්ථමපි චෛව යත් ।
ඉජ්යතේ භරතශ්රේෂ්ඨ තං යජ්ඤං විද්ධි රාජසම් ॥ 12 ॥

විධිහීනමසෘෂ්ටාන්නං මංත්රහීනමදක්ෂිණම් ।
ශ්රද්ධාවිරහිතං යජ්ඤං තාමසං පරිචක්ෂතේ ॥ 13 ॥

දේවද්විජගුරුප්රාජ්ඤපූජනං ශෞචමාර්ජවම් ।
බ්රහ්මචර්යමහිංසා ච ශාරීරං තප උච්යතේ ॥ 14 ॥

අනුද්වේගකරං වාක්යං සත්යං ප්රියහිතං ච යත් ।
ස්වාධ්යායාභ්යසනං චෛව වාඞ්මයං තප උච්යතේ ॥ 15 ॥

මනඃ ප්රසාදඃ සෞම්යත්වං මෞනමාත්මවිනිග්රහඃ ।
භාවසංශුද්ධිරිත්යේතත්තපෝ මානසමුච්යතේ ॥ 16 ॥

ශ්රද්ධයා පරයා තප්තං තපස්තත්ත්රිවිධං නරෛඃ ।
අඵලාකාංක්ෂිභිර්යුක්තෛඃ සාත්ත්විකං පරිචක්ෂතේ ॥ 17 ॥

සත්කාරමානපූජාර්ථං තපෝ දංභේන චෛව යත් ।
ක්රියතේ තදිහ ප්රෝක්තං රාජසං චලමධ්රුවම් ॥ 18 ॥

මූඪග්රාහේණාත්මනෝ යත්පීඩයා ක්රියතේ තපඃ ।
පරස්යෝත්සාදනාර්ථං වා තත්තාමසමුදාහෘතම් ॥ 19 ॥

දාතව්යමිති යද්දානං දීයතේऽනුපකාරිණේ ।
දේශේ කාලේ ච පාත්රේ ච තද්දානං සාත්ත්විකං ස්මෘතම් ॥ 20 ॥

යත්තු ප්රත්ත්යුපකාරාර්ථං ඵලමුද්දිශ්ය වා පුනඃ ।
දීයතේ ච පරික්ලිෂ්ටං තද්දානං රාජසං ස්මෘතම් ॥ 21 ॥

අදේශකාලේ යද්දානමපාත්රේභ්යශ්ච දීයතේ ।
අසත්කෘතමවජ්ඤාතං තත්තාමසමුදාහෘතම් ॥ 22 ॥

ඕං තත්සදිති නිර්දේශෝ බ්රහ්මණස්ත්රිවිධඃ ස්මෘතඃ ।
බ්රාහ්මණාස්තේන වේදාශ්ච යජ්ඤාශ්ච විහිතාඃ පුරා ॥ 23 ॥

තස්මාදෝමිත්යුදාහෘත්ය යජ්ඤදානතපඃක්රියාඃ ।
ප්රවර්තංතේ විධානෝක්තාඃ සතතං බ්රහ්මවාදිනාම් ॥ 24 ॥

තදිත්යනභිසංධාය ඵලං යජ්ඤතපඃක්රියාඃ ।
දානක්රියාශ්ච විවිධාඃ ක්රියංතේ මෝක්ෂකාංක්ෂිභිඃ ॥ 25 ॥

සද්භාවේ සාධුභාවේ ච සදිත්යේතත්ප්රයුජ්යතේ ।
ප්රශස්තේ කර්මණි තථා සච්ඡබ්දඃ පාර්ථ යුජ්යතේ ॥ 26 ॥

යජ්ඤේ තපසි දානේ ච ස්ථිතිඃ සදිති චෝච්යතේ ।
කර්ම චෛව තදර්ථීයං සදිත්යේවාභිධීයතේ ॥ 27 ॥

අශ්රද්ධයා හුතං දත්තං තපස්තප්තං කෘතං ච යත් ।
අසදිත්යුච්යතේ පාර්ථ න ච තත්ප්රේප්ය නෝ ඉහ ॥ 28 ॥

ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ ශ්රීකෘෂ්ණාර්ජුනසංවාදේ

ශ්රද්ධාත්රයවිභාගයෝගෝ නාම සප්තදශෝऽධ්යායඃ ॥17 ॥