අථ චතුර්ථෝऽධ්යායඃ ।
ජ්ඤානයෝගඃ
ශ්රීභගවානුවාච ।
ඉමං විවස්වතේ යෝගං ප්රෝක්තවානහමව්යයම් ।
විවස්වාන්මනවේ ප්රාහ මනුරික්ෂ්වාකවේऽබ්රවීත් ॥ 1 ॥
ඒවං පරංපරාප්රාප්තමිමං රාජර්ෂයෝ විදුඃ ।
ස කාලේනේහ මහතා යෝගෝ නෂ්ටඃ පරංතප ॥ 2 ॥
ස ඒවායං මයා තේऽද්ය යෝගඃ ප්රෝක්තඃ පුරාතනඃ ।
භක්තෝऽසි මේ සඛා චේති රහස්යං හ්යේතදුත්තමම් ॥ 3 ॥
අර්ජුන උවාච ।
අපරං භවතෝ ජන්ම පරං ජන්ම විවස්වතඃ ।
කථමේතද්විජානීයාං ත්වමාදෞ ප්රෝක්තවානිති ॥ 4 ॥
ශ්රීභගවානුවාච ।
බහූනි මේ ව්යතීතානි ජන්මානි තව චාර්ජුන ।
තාන්යහං වේද සර්වාණි න ත්වං වේත්ථ පරංතප ॥ 5 ॥
අජෝऽපි සන්නව්යයාත්මා භූතානාමීශ්වරෝऽපි සන් ।
ප්රකෘතිං ස්වාමධිෂ්ඨාය සංභවාම්යාත්මමායයා ॥ 6 ॥
යදා යදා හි ධර්මස්ය ග්ලානිර්භවති භාරත ।
අභ්යුත්ථානමධර්මස්ය තදාත්මානං සෘජාම්යහම් ॥ 7 ॥
පරිත්රාණාය සාධූනාං විනාශාය ච දුෂ්කෘතාම් ।
ධර්මසංස්ථාපනාර්ථාය සංභවාමි යුගේ යුගේ ॥ 8 ॥
ජන්ම කර්ම ච මේ දිව්යමේවං යෝ වේත්ති තත්ත්වතඃ ।
ත්යක්ත්වා දේහං පුනර්ජන්ම නෛති මාමේති සෝऽර්ජුන ॥ 9 ॥
වීතරාගභයක්රෝධා මන්මයා මාමුපාශ්රිතාඃ ।
බහවෝ ජ්ඤානතපසා පූතා මද්භාවමාගතාඃ ॥ 10 ॥
යේ යථා මාං ප්රපද්යංතේ තාංස්තථෛව භජාම්යහම් ।
මම වර්ත්මානුවර්තංතේ මනුෂ්යාඃ පාර්ථ සර්වශඃ ॥ 11 ॥
කාංක්ෂංතඃ කර්මණාං සිද්ධිං යජංත ඉහ දේවතාඃ ।
ක්ෂිප්රං හි මානුෂේ ලෝකේ සිද්ධිර්භවති කර්මජා ॥ 12 ॥
චාතුර්වර්ණ්යං මයා සෘෂ්ටං ගුණකර්මවිභාගශඃ ।
තස්ය කර්තාරමපි මාං විද්ධ්යකර්තාරමව්යයම් ॥ 13 ॥
න මාං කර්මාණි ලිංපංති න මේ කර්මඵලේ ස්පෘහා ।
ඉති මාං යෝऽභිජානාති කර්මභිර්න ස බධ්යතේ ॥ 14 ॥
ඒවං ජ්ඤාත්වා කෘතං කර්ම පූර්වෛරපි මුමුක්ෂුභිඃ ।
කුරු කර්මෛව තස්මාත්ත්වං පූර්වෛඃ පූර්වතරං කෘතම් ॥ 15 ॥
කිං කර්ම කිමකර්මේති කවයෝऽප්යත්ර මෝහිතාඃ ।
තත්තේ කර්ම ප්රවක්ෂ්යාමි යජ්ජ්ඤාත්වා මෝක්ෂ්යසේऽශුභාත් ॥ 16 ॥
කර්මණෝ හ්යපි බෝද්ධව්යං බෝද්ධව්යං ච විකර්මණඃ ।
අකර්මණශ්ච බෝද්ධව්යං ගහනා කර්මණෝ ගතිඃ ॥ 17 ॥
කර්මණ්යකර්ම යඃ පශ්යේදකර්මණි ච කර්ම යඃ ।
ස බුද්ධිමාන්මනුෂ්යේෂු ස යුක්තඃ කෘත්ස්නකර්මකෘත් ॥ 18 ॥
යස්ය සර්වේ සමාරංභාඃ කාමසංකල්පවර්ජිතාඃ ।
ජ්ඤානාග්නිදග්ධකර්මාණං තමාහුඃ පංඩිතං බුධාඃ ॥ 19 ॥
ත්යක්ත්වා කර්මඵලාසංගං නිත්යතෘප්තෝ නිරාශ්රයඃ ।
කර්මණ්යභිප්රවෘත්තෝऽපි නෛව කිංචිත්කරෝති සඃ ॥ 20 ॥
නිරාශීර්යතචිත්තාත්මා ත්යක්තසර්වපරිග්රහඃ ।
ශාරීරං කේවලං කර්ම කුර්වන්නාප්නෝති කිල්බිෂම් ॥ 21 ॥
යදෘච්ඡාලාභසංතුෂ්ටෝ ද්වංද්වාතීතෝ විමත්සරඃ ।
සමඃ සිද්ධාවසිද්ධෞ ච කෘත්වාපි න නිබධ්යතේ ॥ 22 ॥
ගතසංගස්ය මුක්තස්ය ජ්ඤානාවස්ථිතචේතසඃ ।
යජ්ඤායාචරතඃ කර්ම සමග්රං ප්රවිලීයතේ ॥ 23 ॥
බ්රහ්මාර්පණං බ්රහ්ම හවිර්බ්රහ්මාග්නෞ බ්රහ්මණා හුතම් ।
බ්රහ්මෛව තේන ගංතව්යං බ්රහ්මකර්මසමාධිනා ॥ 24 ॥
දෛවමේවාපරේ යජ්ඤං යෝගිනඃ පර්යුපාසතේ ।
බ්රහ්මාග්නාවපරේ යජ්ඤං යජ්ඤේනෛවෝපජුහ්වති ॥ 25 ॥
ශ්රෝත්රාදීනීංද්රියාණ්යන්යේ සංයමාග්නිෂු ජුහ්වති ।
ශබ්දාදීන්විෂයානන්ය ඉංද්රියාග්නිෂු ජුහ්වති ॥ 26 ॥
සර්වාණීංද්රියකර්මාණි ප්රාණකර්මාණි චාපරේ ।
ආත්මසංයමයෝගාග්නෞ ජුහ්වති ජ්ඤානදීපිතේ ॥ 27 ॥
ද්රව්යයජ්ඤාස්තපෝයජ්ඤා යෝගයජ්ඤාස්තථාපරේ ।
ස්වාධ්යායජ්ඤානයජ්ඤාශ්ච යතයඃ සංශිතව්රතාඃ ॥ 28 ॥
අපානේ ජුහ්වති ප්රාණං ප්රාණේऽපානං තථාපරේ ।
ප්රාණාපානගතී රුද්ධ්වා ප්රාණායාමපරායණාඃ ॥ 29 ॥
අපරේ නියතාහාරාඃ ප්රාණාන්ප්රාණේෂු ජුහ්වති ।
සර්වේऽප්යේතේ යජ්ඤවිදෝ යජ්ඤක්ෂපිතකල්මෂාඃ ॥ 30 ॥
යජ්ඤශිෂ්ටාමෘතභුජෝ යාංති බ්රහ්ම සනාතනම් ।
නායං ලෝකෝऽස්ත්යයජ්ඤස්ය කුතෝऽන්යඃ කුරුසත්තම ॥ 31 ॥
ඒවං බහුවිධා යජ්ඤා විතතා බ්රහ්මණෝ මුඛේ ।
කර්මජාන්විද්ධි තාන්සර්වානේවං ජ්ඤාත්වා විමෝක්ෂ්යසේ ॥ 32 ॥
ශ්රේයාංද්රව්යමයාද්යජ්ඤාජ්ජ්ඤානයජ්ඤඃ පරංතප ।
සර්වං කර්මාඛිලං පාර්ථ ජ්ඤානේ පරිසමාප්යතේ ॥ 33 ॥
තද්විද්ධි ප්රණිපාතේන පරිප්රශ්නේන සේවයා ।
උපදේක්ෂ්යංති තේ ජ්ඤානං ජ්ඤානිනස්තත්ත්වදර්ශිනඃ ॥ 34 ॥
යජ්ජ්ඤාත්වා න පුනර්මෝහමේවං යාස්යසි පාංඩව ।
යේන භූතාන්යශේෂේණ ද්රක්ෂ්යස්යාත්මන්යථෝ මයි ॥ 35 ॥
අපි චේදසි පාපේභ්යඃ සර්වේභ්යඃ පාපකෘත්තමඃ ।
සර්වං ජ්ඤානප්ලවේනෛව වෘජිනං සංතරිෂ්යසි ॥ 36 ॥
යථෛධාංසි සමිද්ධෝऽග්නිර්භස්මසාත්කුරුතේऽර්ජුන ।
ජ්ඤානාග්නිඃ සර්වකර්මාණි භස්මසාත්කුරුතේ තථා ॥ 37 ॥
න හි ජ්ඤානේන සදෘශං පවිත්රමිහ විද්යතේ ।
තත්ස්වයං යෝගසංසිද්ධඃ කාලේනාත්මනි විංදති ॥ 38 ॥
ශ්රද්ධාවාංල්ලභතේ ජ්ඤානං තත්පරඃ සංයතේංද්රියඃ ।
ජ්ඤානං ලබ්ධ්වා පරාං ශාංතිමචිරේණාධිගච්ඡති ॥ 39 ॥
අජ්ඤශ්චාශ්රද්දධානශ්ච සංශයාත්මා විනශ්යති ।
නායං ලෝකෝऽස්ති න පරෝ න සුඛං සංශයාත්මනඃ ॥ 40 ॥
යෝගසංන්යස්තකර්මාණං ජ්ඤානසංඡින්නසංශයම් ।
ආත්මවංතං න කර්මාණි නිබධ්නංති ධනංජය ॥ 41 ॥
තස්මාදජ්ඤානසංභූතං හෘත්ස්ථං ජ්ඤානාසිනාත්මනඃ ।
ඡිත්ත්වෛනං සංශයං යෝගමාතිෂ්ඨෝත්තිෂ්ඨ භාරත ॥ 42 ॥
ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ ශ්රීකෘෂ්ණාර්ජුනසංවාදේ
ජ්ඤානකර්මසංන්යාසයෝගෝ නාම චතුර්ථෝऽධ්යායඃ ॥4 ॥