අථ පංචමෝऽධ්යායඃ ।
කර්මසන්න්යාසයෝගඃ
අර්ජුන උවාච ।
සංන්යාසං කර්මණාං කෘෂ්ණ පුනර්යෝගං ච ශංසසි ।
යච්ඡ්රේය ඒතයෝරේකං තන්මේ බ්රූහි සුනිශ්චිතම් ॥ 1 ॥
ශ්රීභගවානුවාච ।
සංන්යාසඃ කර්මයෝගශ්ච නිඃශ්රේයසකරාවුභෞ ।
තයෝස්තු කර්මසංන්යාසාත්කර්මයෝගෝ විශිෂ්යතේ ॥ 2 ॥
ජ්ඤේයඃ ස නිත්යසංන්යාසී යෝ න ද්වේෂ්ටි න කාංක්ෂති ।
නිර්ද්වංද්වෝ හි මහාබාහෝ සුඛං බංධාත්ප්රමුච්යතේ ॥ 3 ॥
සාංඛ්යයෝගෞ පෘථග්බාලාඃ ප්රවදංති න පංඩිතාඃ ।
ඒකමප්යාස්ථිතඃ සම්යගුභයෝර්විංදතේ ඵලම් ॥ 4 ॥
යත්සාංඛ්යෛඃ ප්රාප්යතේ ස්ථානං තද්යෝගෛරපි ගම්යතේ ।
ඒකං සාංඛ්යං ච යෝගං ච යඃ පශ්යති ස පශ්යති ॥ 5 ॥
සංන්යාසස්තු මහාබාහෝ දුඃඛමාප්තුමයෝගතඃ ।
යෝගයුක්තෝ මුනිර්බ්රහ්ම නචිරේණාධිගච්ඡති ॥ 6 ॥
යෝගයුක්තෝ විශුද්ධාත්මා විජිතාත්මා ජිතේංද්රියඃ ।
සර්වභූතාත්මභූතාත්මා කුර්වන්නපි න ලිප්යතේ ॥ 7 ॥
නෛව කිංචිත්කරෝමීති යුක්තෝ මන්යේත තත්ත්වවිත් ।
පශ්යඤ්ශෘණ්වන්ස්පෘශංජිඝ්රන්නශ්නන්ගච්ඡන්ස්වපඤ්ශ්වසන් ॥ 8 ॥
ප්රලපන්විසෘජන්ගෘහ්ණන්නුන්මිෂන්නිමිෂන්නපි ।
ඉංද්රියාණීංද්රියාර්ථේෂු වර්තංත ඉති ධාරයන් ॥ 9 ॥
බ්රහ්මණ්යාධාය කර්මාණි සංගං ත්යක්ත්වා කරෝති යඃ ।
ලිප්යතේ න ස පාපේන පද්මපත්රමිවාංභසා ॥ 10 ॥
කායේන මනසා බුද්ධ්යා කේවලෛරිංද්රියෛරපි ।
යෝගිනඃ කර්ම කුර්වංති සංගං ත්යක්ත්වාත්මශුද්ධයේ ॥ 11 ॥
යුක්තඃ කර්මඵලං ත්යක්ත්වා ශාංතිමාප්නෝති නෛෂ්ඨිකීම් ।
අයුක්තඃ කාමකාරේණ ඵලේ සක්තෝ නිබධ්යතේ ॥ 12 ॥
සර්වකර්මාණි මනසා සංන්යස්යාස්තේ සුඛං වශී ।
නවද්වාරේ පුරේ දේහී නෛව කුර්වන්න කාරයන් ॥ 13 ॥
න කර්තෘත්වං න කර්මාණි ලෝකස්ය සෘජති ප්රභුඃ ।
න කර්මඵලසංයෝගං ස්වභාවස්තු ප්රවර්තතේ ॥ 14 ॥
නාදත්තේ කස්යචිත්පාපං න චෛව සුකෘතං විභුඃ ।
අජ්ඤානේනාවෘතං ජ්ඤානං තේන මුහ්යංති ජංතවඃ ॥ 15 ॥
ජ්ඤානේන තු තදජ්ඤානං යේෂාං නාශිතමාත්මනඃ ।
තේෂාමාදිත්යවජ්ජ්ඤානං ප්රකාශයති තත්පරම් ॥ 16 ॥
තද්බුද්ධයස්තදාත්මානස්තන්නිෂ්ඨාස්තත්පරායණාඃ ।
ගච්ඡංත්යපුනරාවෘත්තිං ජ්ඤානනිර්ධූතකල්මෂාඃ ॥ 17 ॥
විද්යාවිනයසංපන්නේ බ්රාහ්මණේ ගවි හස්තිනි ।
ශුනි චෛව ශ්වපාකේ ච පංඩිතාඃ සමදර්ශිනඃ ॥ 18 ॥
ඉහෛව තෛර්ජිතඃ සර්ගෝ යේෂාං සාම්යේ ස්ථිතං මනඃ ।
නිර්දෝෂං හි සමං බ්රහ්ම තස්මාද්බ්රහ්මණි තේ ස්ථිතාඃ ॥ 19 ॥
න ප්රහෘෂ්යේත්ප්රියං ප්රාප්ය නෝද්විජේත්ප්රාප්ය චාප්රියම් ।
ස්ථිරබුද්ධිරසංමූඪෝ බ්රහ්මවිද්බ්රහ්මණි ස්ථිතඃ ॥ 20 ॥
බාහ්යස්පර්ශේෂ්වසක්තාත්මා විංදත්යාත්මනි යත්සුඛම් ।
ස බ්රහ්මයෝගයුක්තාත්මා සුඛමක්ෂයමශ්නුතේ ॥ 21 ॥
යේ හි සංස්පර්ශජා භෝගා දුඃඛයෝනය ඒව තේ ।
ආද්යංතවංතඃ කෞංතේය න තේෂු රමතේ බුධඃ ॥ 22 ॥
ශක්නෝතීහෛව යඃ සෝඪුං ප්රාක්ශරීරවිමෝක්ෂණාත් ।
කාමක්රෝධෝද්භවං වේගං ස යුක්තඃ ස සුඛී නරඃ ॥ 23 ॥
යෝऽංතඃසුඛෝऽංතරාරාමස්තථාංතර්ජ්යෝතිරේව යඃ ।
ස යෝගී බ්රහ්මනිර්වාණං බ්රහ්මභූතෝऽධිගච්ඡති ॥ 24 ॥
ලභංතේ බ්රහ්මනිර්වාණමෘෂයඃ ක්ෂීණකල්මෂාඃ ।
ඡින්නද්වෛධා යතාත්මානඃ සර්වභූතහිතේ රතාඃ ॥ 25 ॥
කාමක්රෝධවියුක්තානාං යතීනාං යතචේතසාම් ।
අභිතෝ බ්රහ්මනිර්වාණං වර්තතේ විදිතාත්මනාම් ॥ 26 ॥
ස්පර්ශාන්කෘත්වා බහිර්බාහ්යාංශ්චක්ෂුශ්චෛවාංතරේ භ්රුවෝඃ ।
ප්රාණාපානෞ සමෞ කෘත්වා නාසාභ්යංතරචාරිණෞ ॥ 27 ॥
යතේංද්රියමනෝබුද්ධිර්මුනිර්මෝක්ෂපරායණඃ ।
විගතේච්ඡාභයක්රෝධෝ යඃ සදා මුක්ත ඒව සඃ ॥ 28 ॥
භෝක්තාරං යජ්ඤතපසාං සර්වලෝකමහේශ්වරම් ।
සුහෘදං සර්වභූතානාං ජ්ඤාත්වා මාං ශාංතිමෘච්ඡති ॥ 29 ॥
ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ ශ්රීකෘෂ්ණාර්ජුනසංවාදේ
කර්මසංන්යාසයෝගෝ නාම පංචමෝऽධ්යායඃ ॥5 ॥