මහායෝගපීඨේ තටේ භීමරථ්යා
වරං පුංඩරීකාය දාතුං මුනීංද්රෛඃ ।
සමාගත්ය තිෂ්ඨංතමානංදකංදං
පරබ්රහ්මලිංගං භජේ පාංඩුරංගම් ॥ 1 ॥
තටිද්වාසසං නීලමේඝාවභාසං
රමාමංදිරං සුංදරං චිත්ප්රකාශම් ।
වරං ත්විෂ්ටකායාං සමන්යස්තපාදං
පරබ්රහ්මලිංගං භජේ පාංඩුරංගම් ॥ 2 ॥
ප්රමාණං භවාබ්ධේරිදං මාමකානාං
නිතංබඃ කරාභ්යාං ධෘතෝ යේන තස්මාත් ।
විධාතුර්වසත්යෛ ධෘතෝ නාභිකෝශඃ
පරබ්රහ්මලිංගං භජේ පාංඩුරංගම් ॥ 3 ॥
ස්ඵුරත්කෞස්තුභාලංකෘතං කංඨදේශේ
ශ්රියා ජුෂ්ටකේයූරකං ශ්රීනිවාසම් ।
ශිවං ශාංතමීඩ්යං වරං ලෝකපාලං
පරබ්රහ්මලිංගං භජේ පාංඩුරංගම් ॥ 4 ॥
ශරච්චංද්රබිංබානනං චාරුහාසං
ලසත්කුංඩලාක්රාංතගංඩස්ථලාංතම් ।
ජපාරාගබිංබාධරං කංජනේත්රං
පරබ්රහ්මලිංගං භජේ පාංඩුරංගම් ॥ 5 ॥
කිරීටෝජ්ජ්වලත්සර්වදික්ප්රාංතභාගං
සුරෛරර්චිතං දිව්යරත්නෛරනර්ඝෛඃ ।
ත්රිභංගාකෘතිං බර්හමාල්යාවතංසං
පරබ්රහ්මලිංගං භජේ පාංඩුරංගම් ॥ 6 ॥
විභුං වේණුනාදං චරංතං දුරංතං
ස්වයං ලීලයා ගෝපවේෂං දධානම් ।
ගවාං බෘංදකානංදදං චාරුහාසං
පරබ්රහ්මලිංගං භජේ පාංඩුරංගම් ॥ 7 ॥
අජං රුක්මිණීප්රාණසංජීවනං තං
පරං ධාම කෛවල්යමේකං තුරීයම් ।
ප්රසන්නං ප්රපන්නාර්තිහං දේවදේවං
පරබ්රහ්මලිංගං භජේ පාංඩුරංගම් ॥ 8 ॥
ස්තවං පාංඩුරංගස්ය වෛ පුණ්යදං යේ
පඨංත්යේකචිත්තේන භක්ත්යා ච නිත්යම් ।
භවාංභෝනිධිං තේऽපි තීර්ත්වාංතකාලේ
හරේරාලයං ශාශ්වතං ප්රාප්නුවංති ॥ 9 ॥
ඉති ශ්රීමත්පරමහංස පරිව්රාජකාචාර්ය ශ්රීමච්ඡංකරභගවත්පාදාචාර්ය විරචිතං ශ්රී පාංඩුරංගාෂ්ටකම් ।