අගස්තිරුවාච
ආජානුබාහුමරවිංදදළායතාක්ෂ-
-මාජන්මශුද්ධරසහාසමුඛප්රසාදම් ।
ශ්යාමං ගෘහීත ශරචාපමුදාරරූපං
රාමං සරාමමභිරාමමනුස්මරාමි ॥ 1 ॥
අස්ය ශ්රීරාමකවචස්ය අගස්ත්ය ඍෂිඃ අනුෂ්ටුප් ඡංදඃ සීතාලක්ෂ්මණෝපේතඃ ශ්රීරාමචංද්රෝ දේවතා ශ්රීරාමචංද්රප්රසාදසිද්ධ්යර්ථේ ජපේ විනියෝගඃ ।
අථ ධ්යානං
නීලජීමූතසංකාශං විද්යුද්වර්ණාංබරාවෘතම් ।
කෝමලාංගං විශාලාක්ෂං යුවානමතිසුංදරම් ॥ 1 ॥
සීතාසෞමිත්රිසහිතං ජටාමුකුටධාරිණම් ।
සාසිතූණධනුර්බාණපාණිං දානවමර්දනම් ॥ 2 ॥
යදා චෝරභයේ රාජභයේ ශත්රුභයේ තථා ।
ධ්යාත්වා රඝුපතිං ක්රුද්ධං කාලානලසමප්රභම් ॥ 3 ॥
චීරකෘෂ්ණාජිනධරං භස්මෝද්ධූළිතවිග්රහම් ।
ආකර්ණාකෘෂ්ටවිශිඛකෝදංඩභුජමංඩිතම් ॥ 4 ॥
රණේ රිපූන් රාවණාදීංස්තීක්ෂ්ණමාර්ගණවෘෂ්ටිභිඃ ।
සංහරංතං මහාවීරමුග්රමෛංද්රරථස්ථිතම් ॥ 5 ॥
ලක්ෂ්මණාද්යෛර්මහාවීරෛර්වෘතං හනුමදාදිභිඃ ।
සුග්රීවාද්යෛර්මාහාවීරෛඃ ශෛලවෘක්ෂකරෝද්යතෛඃ ॥ 6 ॥
වේගාත්කරාලහුංකාරෛර්භුභුක්කාරමහාරවෛඃ ।
නදද්භිඃ පරිවාදද්භිඃ සමරේ රාවණං ප්රති ॥ 7 ॥
ශ්රීරාම ශත්රුසංඝාන්මේ හන මර්දය ඛාදය ।
භූතප්රේතපිශාචාදීන් ශ්රීරාමාශු විනාශය ॥ 8 ॥
ඒවං ධ්යාත්වා ජපේද්රාමකවචං සිද්ධිදායකම් ।
සුතීක්ෂ්ණ වජ්රකවචං ශෘණු වක්ෂ්යාම්යනුත්තමම් ॥ 9 ॥
අථ කවචම්
ශ්රීරාමඃ පාතු මේ මූර්ධ්නි පූර්වේ ච රඝුවංශජඃ ।
දක්ෂිණේ මේ රඝුවරඃ පශ්චිමේ පාතු පාවනඃ ॥ 10 ॥
උත්තරේ මේ රඝුපතිර්භාලං දශරථාත්මජඃ ।
භ්රුවෝර්දූර්වාදලශ්යාමස්තයෝර්මධ්යේ ජනාර්දනඃ ॥ 11 ॥
ශ්රෝත්රං මේ පාතු රාජේංද්රෝ දෘශෞ රාජීවලෝචනඃ ।
ඝ්රාණං මේ පාතු රාජර්ෂිර්ගංඩෞ මේ ජානකීපතිඃ ॥ 12 ॥
කර්ණමූලේ ඛරධ්වංසී භාලං මේ රඝුවල්ලභඃ ।
ජිහ්වාං මේ වාක්පතිඃ පාතු දංතපංක්තී රඝූත්තමඃ ॥ 13 ॥
ඕෂ්ඨෞ ශ්රීරාමචංද්රෝ මේ මුඛං පාතු පරාත්පරඃ ।
කංඨං පාතු ජගද්වංද්යඃ ස්කංධෞ මේ රාවණාංතකඃ ॥ 14 ॥
ධනුර්බාණධරඃ පාතු භුජෞ මේ වාලිමර්දනඃ ।
සර්වාණ්යංගුලිපර්වාණි හස්තෞ මේ රාක්ෂසාංතකඃ ॥ 15 ॥
වක්ෂෝ මේ පාතු කාකුත්ස්ථඃ පාතු මේ හෘදයං හරිඃ ।
ස්තනෞ සීතාපතිඃ පාතු පාර්ශ්වං මේ ජගදීශ්වරඃ ॥ 16 ॥
මධ්යං මේ පාතු ලක්ෂ්මීශෝ නාභිං මේ රඝුනායකඃ ।
කෞසල්යේයඃ කටී පාතු පෘෂ්ඨං දුර්ගතිනාශනඃ ॥ 17 ॥
ගුහ්යං පාතු හෘෂීකේශඃ සක්ථිනී සත්යවික්රමඃ ।
ඌරූ ශාර්ඞ්ගධරඃ පාතු ජානුනී හනුමත්ප්රියඃ ॥ 18 ॥
ජංඝේ පාතු ජගද්ව්යාපී පාදෞ මේ තාටකාංතකඃ ।
සර්වාංගං පාතු මේ විෂ්ණුඃ සර්වසංධීනනාමයඃ ॥ 19 ॥
ජ්ඤානේංද්රියාණි ප්රාණාදීන් පාතු මේ මධුසූදනඃ ।
පාතු ශ්රීරාමභද්රෝ මේ ශබ්දාදීන්විෂයානපි ॥ 20 ॥
ද්විපදාදීනි භූතානි මත්සංබංධීනි යානි ච ।
ජාමදග්න්යමහාදර්පදලනඃ පාතු තානි මේ ॥ 21 ॥
සෞමිත්රිපූර්වජඃ පාතු වාගාදීනීංද්රියාණි ච ।
රෝමාංකුරාණ්යශේෂාණි පාතු සුග්රීවරාජ්යදඃ ॥ 22 ॥
වාඞ්මනෝබුද්ධ්යහංකාරෛර්ජ්ඤානාජ්ඤානකෘතානි ච ।
ජන්මාංතරකෘතානීහ පාපානි විවිධානි ච ॥ 23 ॥
තානි සර්වාණි දග්ධ්වාශු හරකෝදංඩඛංඩනඃ ।
පාතු මාං සර්වතෝ රාමඃ ශාර්ඞ්ගබාණධරඃ සදා ॥ 24 ॥
ඉති ශ්රීරාමචංද්රස්ය කවචං වජ්රසම්මිතම් ।
ගුහ්යාද්ගුහ්යතමං දිව්යං සුතීක්ෂ්ණ මුනිසත්තම ॥ 25 ॥
යඃ පඨේච්ඡෘණුයාද්වාපි ශ්රාවයේද්වා සමාහිතඃ ।
ස යාති පරමං ස්ථානං රාමචංද්රප්රසාදතඃ ॥ 26 ॥
මහාපාතකයුක්තෝ වා ගෝඝ්නෝ වා භ්රූණහා තථා ।
ශ්රීරාමචංද්රකවචපඨනාච්ඡුද්ධිමාප්නුයාත් ॥ 27 ॥
බ්රහ්මහත්යාදිභිඃ පාපෛර්මුච්යතේ නාත්ර සංශයඃ ।
භෝ සුතීක්ෂ්ණ යථා පෘෂ්ටං ත්වයා මම පුරාඃ ශුභම් ।
තථා ශ්රීරාමකවචං මයා තේ විනිවේදිතම් ॥ 28 ॥
ඉති ශ්රීමදානංදරාමායණේ මනෝහරකාංඩේ සුතීක්ෂ්ණාගස්ත්යසංවාදේ ශ්රීරාමකවචම් ॥