කළාභ්යාං චූඩාලංකෘතශශිකළාභ්යාං නිජතපඃ-
-ඵලාභ්යාං භක්තේෂු ප්රකටිතඵලාභ්යාං භවතු මේ ।
ශිවාභ්යාමස්තෝකත්රිභුවනශිවාභ්යාං හෘදි පුන-
-ර්භවාභ්යාමානංදස්ඵුරදනුභවාභ්යාං නතිරියම් ॥ 1 ॥
ගළංතී ශංභෝ ත්වච්චරිතසරිතඃ කිල්බිෂරජෝ
දළංතී ධීකුල්යාසරණිෂු පතංතී විජයතාම් ।
දිශංතී සංසාරභ්රමණපරිතාපෝපශමනං
වසංතී මච්චේතෝහ්රදභුවි ශිවානංදලහරී ॥ 2 ॥
ත්රයීවේද්යං හෘද්යං ත්රිපුරහරමාද්යං ත්රිනයනං
ජටාභාරෝදාරං චලදුරගහාරං මෘගධරම් ।
මහාදේවං දේවං මයි සදයභාවං පශුපතිං
චිදාලංබං සාංබං ශිවමතිවිඩංබං හෘදි භජේ ॥ 3 ॥
සහස්රං වර්තංතේ ජගති විබුධාඃ ක්ෂුද්රඵලදා
න මන්යේ ස්වප්නේ වා තදනුසරණං තත්කෘතඵලම් ।
හරිබ්රහ්මාදීනාමපි නිකටභාජාමසුලභං
චිරං යාචේ ශංභෝ ශිව තව පදාංභෝජභජනම් ॥ 4 ॥
ස්මෘතෞ ශාස්ත්රේ වෛද්යේ ශකුනකවිතාගානඵණිතෞ
පුරාණේ මංත්රේ වා ස්තුතිනටනහාස්යේෂ්වචතුරඃ ।
කථං රාජ්ඤාං ප්රීතිර්භවති මයි කෝऽහං පශුපතේ
පශුං මාං සර්වජ්ඤ ප්රථිත කෘපයා පාලය විභෝ ॥ 5 ॥
ඝටෝ වා මෘත්පිංඩෝऽප්යණුරපි ච ධූමෝऽග්නිරචලඃ
පටෝ වා තංතුර්වා පරිහරති කිං ඝෝරශමනම් ।
වෘථා කංඨක්ෂෝභං වහසි තරසා තර්කවචසා
පදාංභෝජං ශංභෝර්භජ පරමසෞඛ්යං ව්රජ සුධීඃ ॥ 6 ॥
මනස්තේ පාදාබ්ජේ නිවසතු වචඃ ස්තෝත්රඵණිතෞ
කරෞ චාභ්යර්චායාං ශ්රුතිරපි කථාකර්ණනවිධෞ ।
තව ධ්යානේ බුද්ධිර්නයනයුගළං මූර්තිවිභවේ
පරග්රංථාන්කෛර්වා පරමශිව ජානේ පරමතඃ ॥ 7 ॥
යථා බුද්ධිඃ ශුක්තෞ රජතමිති කාචාශ්මනි මණි-
-ර්ජලේ පෛෂ්ටේ ක්ෂීරං භවති මෘගතෘෂ්ණාසු සලිලම් ।
තථා දේවභ්රාංත්යා භජති භවදන්යං ජඩජනෝ
මහාදේවේශං ත්වාං මනසි ච න මත්වා පශුපතේ ॥ 8 ॥
ගභීරේ කාසාරේ විශති විජනේ ඝෝරවිපිනේ
විශාලේ ශෛලේ ච භ්රමති කුසුමාර්ථං ජඩමතිඃ ।
සමර්ප්යෛකං චේතඃ සරසිජමුමානාථ භවතේ
සුඛේනාවස්ථාතුං ජන ඉහ න ජානාති කිමහෝ ॥ 9 ॥
නරත්වං දේවත්වං නගවනමෘගත්වං මශකතා
පශුත්වං කීටත්වං භවතු විහගත්වාදි ජනනම් ।
සදා ත්වත්පාදාබ්ජස්මරණපරමානංදලහරී-
-විහාරාසක්තං චේද්ධෘදයමිහ කිං තේන වපුෂා ॥ 10 ॥
වටුර්වා ගේහී වා යතිරපි ජටී වා තදිතරෝ
නරෝ වා යඃ කශ්චිද්භවතු භව කිං තේන භවති ।
යදීයං හෘත්පද්මං යදි භවදධීනං පශුපතේ
තදීයස්ත්වං ශංභෝ භවසි භවභාරං ච වහසි ॥ 11 ॥
ගුහායාං ගේහේ වා බහිරපි වනේ වාऽද්රිශිඛරේ
ජලේ වා වහ්නෞ වා වසතු වසතේඃ කිං වද ඵලම් ।
සදා යස්යෛවාංතඃකරණමපි ශංභෝ තව පදේ
ස්ථිතං චේද්යෝගෝऽසෞ ස ච පරමයෝගී ස ච සුඛී ॥ 12 ॥
අසාරේ සංසාරේ නිජභජනදූරේ ජඩධියා
භ්රමංතං මාමංධං පරමකෘපයා පාතුමුචිතම් ।
මදන්යඃ කෝ දීනස්තව කෘපණරක්ෂාතිනිපුණ-
-ස්ත්වදන්යඃ කෝ වා මේ ත්රිජගති ශරණ්යඃ පශුපතේ ॥ 13 ॥
ප්රභුස්ත්වං දීනානාං ඛලු පරමබංධුඃ පශුපතේ
ප්රමුඛ්යෝऽහං තේෂාමපි කිමුත බංධුත්වමනයෝඃ ।
ත්වයෛව ක්ෂංතව්යාඃ ශිව මදපරාධාශ්ච සකලාඃ
ප්රයත්නාත්කර්තව්යං මදවනමියං බංධුසරණිඃ ॥ 14 ॥
උපේක්ෂා නෝ චේත්කිං න හරසි භවද්ධ්යානවිමුඛාං
දුරාශාභූයිෂ්ඨාං විධිලිපිමශක්තෝ යදි භවාන් ।
ශිරස්තද්වෛධාත්රං නනඛලු සුවෘත්තං පශුපතේ
කථං වා නිර්යත්නං කරනඛමුඛේනෛව ලුලිතම් ॥ 15 ॥
විරිංචිර්දීර්ඝායුර්භවතු භවතා තත්පරශිර-
-ශ්චතුෂ්කං සංරක්ෂ්යං ස ඛලු භුවි දෛන්යං ලිඛිතවාන් ।
විචාරඃ කෝ වා මාං විශද කෘපයා පාති ශිව තේ
කටාක්ෂව්යාපාරඃ ස්වයමපි ච දීනාවනපරඃ ॥ 16 ॥
ඵලාද්වා පුණ්යානාං මයි කරුණයා වා ත්වයි විභෝ
ප්රසන්නේऽපි ස්වාමින් භවදමලපාදාබ්ජයුගළම් ।
කථං පශ්යේයං මාං ස්ථගයති නමඃ සංභ්රමජුෂාං
නිලිංපානාං ශ්රේණිර්නිජකනකමාණික්යමකුටෛඃ ॥ 17 ॥
ත්වමේකෝ ලෝකානාං පරමඵලදෝ දිව්යපදවීං
වහංතස්ත්වන්මූලාං පුනරපි භජංතේ හරිමුඛාඃ ।
කියද්වා දාක්ෂිණ්යං තව ශිව මදාශා ච කියතී
කදා වා මද්රක්ෂාං වහසි කරුණාපූරිතදෘශා ॥ 18 ॥
දුරාශාභූයිෂ්ඨේ දුරධිපගෘහද්වාරඝටකේ
දුරංතේ සංසාරේ දුරිතනිලයේ දුඃඛජනකේ ।
මදායාසං කිං න ව්යපනයසි කස්යෝපකෘතයේ
වදේයං ප්රීතිශ්චේත්තව ශිව කෘතාර්ථාඃ ඛලු වයම් ॥ 19 ॥
සදා මෝහාටව්යාං චරති යුවතීනාං කුචගිරෞ
නටත්යාශාශාඛාස්වටති ඣටිති ස්වෛරමභිතඃ ।
කපාලින් භික්ෂෝ මේ හෘදයකපිමත්යංතචපලං
දෘඪං භක්ත්යා බද්ධ්වා ශිව භවදධීනං කුරු විභෝ ॥ 20 ॥
ධෘතිස්තංභාධාරාං දෘඪගුණනිබද්ධාං සගමනාං
විචිත්රාං පද්මාඪ්යාං ප්රතිදිවසසන්මාර්ගඝටිතාම් ।
ස්මරාරේ මච්චේතඃස්ඵුටපටකුටීං ප්රාප්ය විශදාං
ජය ස්වාමින් ශක්ත්යා සහ ශිව ගණෛඃ සේවිත විභෝ ॥ 21 ॥
ප්රලෝභාද්යෛරර්ථාහරණපරතංත්රෝ ධනිගෘහේ
ප්රවේශෝද්යුක්තඃ සන් භ්රමති බහුධා තස්කරපතේ ।
ඉමං චේතශ්චෝරං කථමිහ සහේ ශංකර විභෝ
තවාධීනං කෘත්වා මයි නිරපරාධේ කුරු කෘපාම් ॥ 22 ॥
කරෝමි ත්වත්පූජාං සපදි සුඛදෝ මේ භව විභෝ
විධිත්වං විෂ්ණුත්වං දිශසි ඛලු තස්යාඃ ඵලමිති ।
පුනශ්ච ත්වාං ද්රෂ්ටුං දිවි භුවි වහන්පක්ෂිමෘගතා-
-මදෘෂ්ට්වා තත්ඛේදං කථමිහ සහේ ශංකර විභෝ ॥ 23 ॥
කදා වා කෛලාසේ කනකමණිසෞධේ සහ ගණෛ-
-ර්වසන් ශංභෝරග්රේ ස්ඵුටඝටිතමූර්ධාංජලිපුටඃ ।
විභෝ සාංබ ස්වාමින්පරමශිව පාහීති නිගද-
-න්විධාතॄණාං කල්පාන් ක්ෂණමිව විනේෂ්යාමි සුඛතඃ ॥ 24 ॥
ස්තවෛර්බ්රහ්මාදීනාං ජයජයවචෝභිර්නියමිනාං
ගණානාං කේළීභිර්මදකලමහෝක්ෂස්ය කකුදි ।
ස්ථිතං නීලග්රීවං ත්රිනයනමුමාශ්ලිෂ්ටවපුෂං
කදා ත්වාං පශ්යේයං කරධෘතමෘගං ඛංඩපරශුම් ॥ 25 ॥
කදා වා ත්වාං දෘෂ්ට්වා ගිරිශ තව භව්යාංඝ්රියුගළං
ගෘහීත්වා හස්තාභ්යාං ශිරසි නයනේ වක්ෂසි වහන් ।
සමාශ්ලිෂ්යාඝ්රාය ස්ඵුටජලජගංධාන්පරිමලා-
-නලාභ්යාං බ්රහ්මාද්යෛර්මුදමනුභවිෂ්යාමි හෘදයේ ॥ 26 ॥
කරස්ථේ හේමාද්රෞ ගිරිශ නිකටස්ථේ ධනපතෞ
ගෘහස්ථේ ස්වර්භූජාමරසුරභිචිංතාමණිගණේ ।
ශිරඃස්ථේ ශීතාංශෞ චරණයුගළස්ථේऽඛිලශුභේ
කමර්ථං දාස්යේऽහං භවතු භවදර්ථං මම මනඃ ॥ 27 ॥
සාරූප්යං තව පූජනේ ශිව මහාදේවේති සංකීර්තනේ
සාමීප්යං ශිවභක්තිධුර්යජනතාසාංගත්යසංභාෂණේ ।
සාලෝක්යං ච චරාචරාත්මකතනුධ්යානේ භවානීපතේ
සායුජ්යං මම සිද්ධමත්ර භවති ස්වාමින් කෘතාර්ථෝऽස්ම්යහම් ॥ 28 ॥
ත්වත්පාදාංබුජමර්චයාමි පරමං ත්වාං චිංතයාම්යන්වහං
ත්වාමීශං ශරණං ව්රජාමි වචසා ත්වාමේව යාචේ විභෝ ।
වීක්ෂාං මේ දිශ චාක්ෂුෂීං සකරුණාං දිව්යෛශ්චිරං ප්රාර්ථිතාං
ශංභෝ ලෝකගුරෝ මදීයමනසඃ සෞඛ්යෝපදේශං කුරු ॥ 29 ॥
වස්ත්රෝද්ධූතවිධෞ සහස්රකරතා පුෂ්පාර්චනේ විෂ්ණුතා
ගංධේ ගංධවහාත්මතාऽන්නපචනේ බර්හිර්මුඛාධ්යක්ෂතා ।
පාත්රේ කාංචනගර්භතාස්ති මයි චේද්බාලේංදුචූඩාමණේ
ශුශ්රූෂාං කරවාණි තේ පශුපතේ ස්වාමිංස්ත්රිලෝකීගුරෝ ॥ 30 ॥
නාලං වා පරමෝපකාරකමිදං ත්වේකං පශූනාං පතේ
පශ්යන් කුක්ෂිගතාංශ්චරාචරගණාන් බාහ්යස්ථිතාන් රක්ෂිතුම් ।
සර්වාමර්ත්යපලායනෞෂධමතිජ්වාලාකරං භීකරං
නික්ෂිප්තං ගරළං ගළේ න ගිළිතං නෝද්ගීර්ණමේව ත්වයා ॥ 31 ॥
ජ්වාලෝග්රඃ සකලාමරාතිභයදඃ ක්ෂ්වේළඃ කථං වා ත්වයා
දෘෂ්ටඃ කිං ච කරේ ධෘතඃ කරතලේ කිං පක්වජංබූඵලම් ।
ජිහ්වායාං නිහිතශ්ච සිද්ධඝුටිකා වා කංඨදේශේ භෘතඃ
කිං තේ නීලමණිර්විභූෂණමයං ශංභෝ මහාත්මන් වද ॥ 32 ॥
නාලං වා සකෘදේව දේව භවතඃ සේවා නතිර්වා නුතිඃ
පූජා වා ස්මරණං කථාශ්රවණමප්යාලෝකනං මාදෘශාම් ।
ස්වාමින්නස්ථිරදේවතානුසරණායාසේන කිං ලභ්යතේ
කා වා මුක්තිරිතඃ කුතෝ භවති චේත්කිං ප්රාර්ථනීයං තදා ॥ 33 ॥
කිං බ්රූමස්තව සාහසං පශුපතේ කස්යාස්ති ශංභෝ භව-
-ද්ධෛර්යං චේදෘශමාත්මනඃ ස්ථිතිරියං චාන්යෛඃ කථං ලභ්යතේ ।
භ්රශ්යද්දේවගණං ත්රසන්මුනිගණං නශ්යත්ප්රපංචං ලයං
පශ්යන්නිර්භය ඒක ඒව විහරත්යානංදසාංද්රෝ භවාන් ॥ 34 ॥
යෝගක්ෂේමධුරංධරස්ය සකලශ්රේයඃප්රදෝද්යෝගිනෝ
දෘෂ්ටාදෘෂ්ටමතෝපදේශකෘතිනෝ බාහ්යාංතරව්යාපිනඃ ।
සර්වජ්ඤස්ය දයාකරස්ය භවතඃ කිං වේදිතව්යං මයා
ශංභෝ ත්වං පරමාංතරංග ඉති මේ චිත්තේ ස්මරාම්යන්වහම් ॥ 35 ॥
භක්තෝ භක්තිගුණාවෘතේ මුදමෘතාපූර්ණේ ප්රසන්නේ මනඃ
කුංභේ සාංබ තවාංඝ්රිපල්ලවයුගං සංස්ථාප්ය සංවිත්ඵලම් ।
සත්වං මංත්රමුදීරයන්නිජශරීරාගාරශුද්ධිං වහන්
පුණ්යාහං ප්රකටීකරෝමි රුචිරං කළ්යාණමාපාදයන් ॥ 36 ॥
ආම්නායාංබුධිමාදරේණ සුමනඃසංඝාඃ සමුද්යන්මනෝ
මංථානං දෘඪභක්තිරජ්ජුසහිතං කෘත්වා මථිත්වා තතඃ ।
සෝමං කල්පතරුං සුපර්වසුරභිං චිංතාමණිං ධීමතාං
නිත්යානංදසුධාං නිරංතරරමාසෞභාග්යමාතන්වතේ ॥ 37 ॥
ප්රාක්පුණ්යාචලමාර්ගදර්ශිතසුධාමූර්තිඃ ප්රසන්නඃ ශිවඃ
සෝමඃ සද්ගණසේවිතෝ මෘගධරඃ පූර්ණස්තමෝමෝචකඃ ।
චේතඃ පුෂ්කරලක්ෂිතෝ භවති චේදානංදපාථෝනිධිඃ
ප්රාගල්භ්යේන විජෘංභතේ සුමනසාං වෘත්තිස්තදා ජායතේ ॥ 38 ॥
ධර්මෝ මේ චතුරංඝ්රිකඃ සුචරිතඃ පාපං විනාශං ගතං
කාමක්රෝධමදාදයෝ විගළිතාඃ කාලාඃ සුඛාවිෂ්කෘතාඃ ।
ජ්ඤානානංදමහෞෂධිඃ සුඵලිතා කෛවල්යනාථේ සදා
මාන්යේ මානසපුංඩරීකනගරේ රාජාවතංසේ ස්ථිතේ ॥ 39 ॥
ධීයංත්රේණ වචෝඝටේන කවිතාකුල්යෝපකුල්යාක්රමෛ-
-රානීතෛශ්ච සදාශිවස්ය චරිතාංභෝරාශිදිව්යාමෘතෛඃ ।
හෘත්කේදාරයුතාශ්ච භක්තිකලමාඃ සාඵල්යමාතන්වතේ
දුර්භික්ෂාන්මම සේවකස්ය භගවන්විශ්වේශ භීතිඃ කුතඃ ॥ 40 ॥
පාපෝත්පාතවිමෝචනාය රුචිරෛශ්වර්යාය මෘත්යුංජය
ස්තෝත්රධ්යානනතිප්රදක්ෂිණසපර්යාලෝකනාකර්ණනේ ।
ජිහ්වාචිත්තශිරෝංඝ්රිහස්තනයනශ්රෝත්රෛරහං ප්රාර්ථිතෝ
මාමාජ්ඤාපය තන්නිරූපය මුහුර්මාමේව මා මේऽවචඃ ॥ 41 ॥
ගාංභීර්යං පරිඛාපදං ඝනධෘතිඃ ප්රාකාර උද්යද්ගුණ-
-ස්තෝමශ්චාප්තබලං ඝනේංද්රියචයෝ ද්වාරාණි දේහේ ස්ථිතඃ ।
විද්යා වස්තුසමෘද්ධිරිත්යඛිලසාමග්රීසමේතේ සදා
දුර්ගාතිප්රියදේව මාමකමනෝදුර්ගේ නිවාසං කුරු ॥ 42 ॥
මා ගච්ඡ ත්වමිතස්තතෝ ගිරිශ භෝ මය්යේව වාසං කුරු
ස්වාමින්නාදිකිරාත මාමකමනඃකාංතාරසීමාංතරේ ।
වර්තංතේ බහුශෝ මෘගා මදජුෂෝ මාත්සර්යමෝහාදය-
-ස්තාන්හත්වා මෘගයාවිනෝදරුචිතාලාභං ච සංප්රාප්ස්යසි ॥ 43 ॥
කරලග්නමෘගඃ කරීංද්රභංගෝ
ඝනශාර්දූලවිඛංඩනෝऽස්තජංතුඃ ।
ගිරිශෝ විශදාකෘතිශ්ච චේතඃ-
-කුහරේ පංචමුඛෝऽස්ති මේ කුතෝ භීඃ ॥ 44 ॥
ඡංදඃශාඛිශිඛාන්විතෛර්ද්විජවරෛඃ සංසේවිතේ ශාශ්වතේ
සෞඛ්යාපාදිනි ඛේදභේදිනි සුධාසාරෛඃ ඵලෛර්දීපිතේ ।
චේතඃපක්ෂිශිඛාමණේ ත්යජ වෘථාසංචාරමන්යෛරලං
නිත්යං ශංකරපාදපද්මයුගළීනීඩේ විහාරං කුරු ॥ 45 ॥
ආකීර්ණේ නඛරාජිකාංතිවිභවෛරුද්යත්සුධාවෛභවෛ-
-රාධෞතේऽපි ච පද්මරාගලලිතේ හංසව්රජෛරාශ්රිතේ ।
නිත්යං භක්තිවධූගණෛශ්ච රහසි ස්වේච්ඡාවිහාරං කුරු
ස්ථිත්වා මානසරාජහංස ගිරිජානාථාංඝ්රිසෞධාංතරේ ॥ 46 ॥
ශංභුධ්යානවසංතසංගිනි හෘදාරාමේऽඝජීර්ණච්ඡදාඃ
ස්රස්තා භක්තිලතාච්ඡටා විලසිතාඃ පුණ්යප්රවාළශ්රිතාඃ ।
දීප්යංතේ ගුණකෝරකා ජපවචඃපුෂ්පාණි සද්වාසනා
ජ්ඤානානංදසුධාමරංදලහරී සංවිත්ඵලාභ්යුන්නතිඃ ॥ 47 ॥
නිත්යානංදරසාලයං සුරමුනිස්වාංතාංබුජාතාශ්රයං
ස්වච්ඡං සද්ද්විජසේවිතං කලුෂහෘත්සද්වාසනාවිෂ්කෘතම් ।
ශංභුධ්යානසරෝවරං ව්රජ මනෝහංසාවතංස ස්ථිරං
කිං ක්ෂුද්රාශ්රයපල්වලභ්රමණසංජාතශ්රමං ප්රාප්ස්යසි ॥ 48 ॥
ආනංදාමෘතපූරිතා හරපදාංභෝජාලවාලෝද්යතා
ස්ථෛර්යෝපඝ්නමුපේත්ය භක්තිලතිකා ශාඛෝපශාඛාන්විතා ।
උච්ඡෛර්මානසකායමානපටලීමාක්රම්ය නිෂ්කල්මෂා
නිත්යාභීෂ්ටඵලප්රදා භවතු මේ සත්කර්මසංවර්ධිතා ॥ 49 ॥
සංධ්යාරංභවිජෘංභිතං ශ්රුතිශිරඃස්ථානාංතරාධිෂ්ඨිතං
සප්රේමභ්රමරාභිරාමමසකෘත්සද්වාසනාශෝභිතම් ।
භෝගීංද්රාභරණං සමස්තසුමනඃපූජ්යං ගුණාවිෂ්කෘතං
සේවේ ශ්රීගිරිමල්ලිකාර්ජුනමහාලිංගං ශිවාලිංගිතම් ॥ 50 ॥
භෘංගීච්ඡානටනෝත්කටඃ කරමදග්රාහී ස්ඵුරන්මාධවා-
-හ්ලාදෝ නාදයුතෝ මහාසිතවපුඃ පංචේෂුණා චාදෘතඃ ।
සත්පක්ෂඃ සුමනෝවනේෂු ස පුනඃ සාක්ෂාන්මදීයේ මනෝ-
-රාජීවේ භ්රමරාධිපෝ විහරතාං ශ්රීශෛලවාසී විභුඃ ॥ 51 ॥
කාරුණ්යාමෘතවර්ෂිණං ඝනවිපද්ග්රීෂ්මච්ඡිදාකර්මඨං
විද්යාසස්යඵලෝදයාය සුමනඃසංසේව්යමිච්ඡාකෘතිම් ।
නෘත්යද්භක්තමයූරමද්රිනිලයං චංචජ්ජටාමංඩලං
ශංභෝ වාංඡති නීලකංධර සදා ත්වාං මේ මනශ්චාතකඃ ॥ 52 ॥
ආකාශේන ශිඛී සමස්තඵණිනාං නේත්රා කලාපී නතා-
-නුග්රාහිප්රණවෝපදේශනිනදෛඃ කේකීති යෝ ගීයතේ ।
ශ්යාමාං ශෛලසමුද්භවාං ඝනරුචිං දෘෂ්ට්වා නටංතං මුදා
වේදාංතෝපවනේ විහාරරසිකං තං නීලකංඨං භජේ ॥ 53 ॥
සංධ්යා ඝර්මදිනාත්යයෝ හරිකරාඝාතප්රභූතානක-
-ධ්වානෝ වාරිදගර්ජිතං දිවිෂදාං දෘෂ්ටිච්ඡටා චංචලා ।
භක්තානාං පරිතෝෂබාෂ්පවිතතිර්වෘෂ්ටිර්මයූරී ශිවා
යස්මින්නුජ්ජ්වලතාංඩවං විජයතේ තං නීලකංඨං භජේ ॥ 54 ॥
ආද්යායාමිතතේජසේ ශ්රුතිපදෛර්වේද්යාය සාධ්යාය තේ
විද්යානංදමයාත්මනේ ත්රිජගතඃ සංරක්ෂණෝද්යෝගිනේ ।
ධ්යේයායාඛිලයෝගිභිඃ සුරගණෛර්ගේයාය මායාවිනේ
සම්යක්තාංඩවසංභ්රමාය ජටිනේ සේයං නතිඃ ශංභවේ ॥ 55 ॥
නිත්යාය ත්රිගුණාත්මනේ පුරජිතේ කාත්යායනීශ්රේයසේ
සත්යායාදිකුටුංබිනේ මුනිමනඃ ප්රත්යක්ෂචින්මූර්තයේ ।
මායාසෘෂ්ටජගත්ත්රයාය සකලාම්නායාංතසංචාරිණේ
සායංතාංඩවසංභ්රමාය ජටිනේ සේයං නතිඃ ශංභවේ ॥ 56 ॥
නිත්යං ස්වෝදරපෝෂණාය සකලානුද්දිශ්ය විත්තාශයා
ව්යර්ථං පර්යටනං කරෝමි භවතඃ සේවාං න ජානේ විභෝ ।
මජ්ජන්මාංතරපුණ්යපාකබලතස්ත්වං ශර්ව සර්වාංතර-
-ස්තිෂ්ඨස්යේව හි තේන වා පශුපතේ තේ රක්ෂණීයෝऽස්ම්යහම් ॥ 57 ॥
ඒකෝ වාරිජබාංධවඃ ක්ෂිතිනභෝව්යාප්තං තමෝමංඩලං
භිත්ත්වා ලෝචනගෝචරෝऽපි භවති ත්වං කෝටිසූර්යප්රභඃ ।
වේද්යඃ කිං න භවස්යහෝ ඝනතරං කීදෘග්භවේන්මත්තම-
-ස්තත්සර්වං ව්යපනීය මේ පශුපතේ සාක්ෂාත්ප්රසන්නෝ භව ॥ 58 ॥
හංසඃ පද්මවනං සමිච්ඡති යථා නීලාංබුදං චාතකඃ
කෝකඃ කෝකනදප්රියං ප්රතිදිනං චංද්රං චකෝරස්තථා ।
චේතෝ වාංඡති මාමකං පශුපතේ චින්මාර්ගමෘග්යං විභෝ
ගෞරීනාථ භවත්පදාබ්ජයුගළං කෛවල්යසෞඛ්යප්රදම් ॥ 59 ॥
රෝධස්තෝයහෘතඃ ශ්රමේණ පථිකශ්ඡායාං තරෝර්වෘෂ්ටිතෝ
භීතඃ ස්වස්ථගෘහං ගෘහස්ථමතිථිර්දීනඃ ප්රභුං ධාර්මිකම් ।
දීපං සංතමසාකුලශ්ච ශිඛිනං ශීතාවෘතස්ත්වං තථා
චේතඃ සර්වභයාපහං ව්රජ සුඛං ශංභෝඃ පදාංභෝරුහම් ॥ 60 ॥
අංකෝලං නිජබීජසංතතිරයස්කාංතෝපලං සූචිකා
සාධ්වී නෛජවිභුං ලතා ක්ෂිතිරුහං සිංධුඃ සරිද්වල්ලභම් ।
ප්රාප්නෝතීහ යථා තථා පශුපතේඃ පාදාරවිංදද්වයං
චේතෝවෘත්තිරුපේත්ය තිෂ්ඨති සදා සා භක්තිරිත්යුච්යතේ ॥ 61 ॥
ආනංදාශ්රුභිරාතනෝති පුලකං නෛර්මල්යතශ්ඡාදනං
වාචාශංඛමුඛේ ස්ථිතෛශ්ච ජඨරාපූර්තිං චරිත්රාමෘතෛඃ ।
රුද්රාක්ෂෛර්භසිතේන දේව වපුෂෝ රක්ෂාං භවද්භාවනා-
-පර්යංකේ විනිවේශ්ය භක්තිජනනී භක්තාර්භකං රක්ෂති ॥ 62 ॥
මාර්ගාවර්තිතපාදුකා පශුපතේරංගස්ය කූර්චායතේ
ගංඩූෂාංබුනිෂේචනං පුරරිපෝර්දිව්යාභිෂේකායතේ ।
කිංචිද්භක්ෂිතමාංසශේෂකබළං නව්යෝපහාරායතේ
භක්තිඃ කිං න කරෝත්යහෝ වනචරෝ භක්තාවතංසායතේ ॥ 63 ॥
වක්ෂස්තාඩනමංතකස්ය කඨිනාපස්මාරසංමර්දනං
භූභෘත්පර්යටනං නමත්සුරශිරඃකෝටීරසංඝර්ෂණම් ।
කර්මේදං මෘදුලස්ය තාවකපදද්වංද්වස්ය කිං වෝචිතං
මච්චේතෝමණිපාදුකාවිහරණං ශංභෝ සදාංගීකුරු ॥ 64 ॥
වක්ෂස්තාඩනශංකයා විචලිතෝ වෛවස්වතෝ නිර්ජරාඃ
කෝටීරෝජ්ජ්වලරත්නදීපකලිකානීරාජනං කුර්වතේ ।
දෘෂ්ට්වා මුක්තිවධූස්තනෝති නිභෘතාශ්ලේෂං භවානීපතේ
යච්චේතස්තව පාදපද්මභජනං තස්යේහ කිං දුර්ලභම් ॥ 65 ॥
ක්රීඩාර්ථං සෘජසි ප්රපංචමඛිලං ක්රීඩාමෘගාස්තේ ජනාඃ
යත්කර්මාචරිතං මයා ච භවතඃ ප්රීත්යෛ භවත්යේව තත් ।
ශංභෝ ස්වස්ය කුතූහලස්ය කරණං මච්චේෂ්ටිතං නිශ්චිතං
තස්මාන්මාමකරක්ෂණං පශුපතේ කර්තව්යමේව ත්වයා ॥ 66 ॥
බහුවිධපරිතෝෂබාෂ්පපූර-
-ස්ඵුටපුලකාංකිතචාරුභෝගභූමිම් ।
චිරපදඵලකාංක්ෂිසේව්යමානාං
පරමසදාශිවභාවනාං ප්රපද්යේ ॥ 67 ॥
අමිතමුදමෘතං මුහුර්දුහංතීං
විමලභවත්පදගෝෂ්ඨමාවසංතීම් ।
සදය පශුපතේ සුපුණ්යපාකාං
මම පරිපාලය භක්තිධේනුමේකාම් ॥ 68 ॥
ජඩතා පශුතා කළංකිතා
කුටිලචරත්වං ච නාස්ති මයි දේව ।
අස්ති යදි රාජමෞළේ
භවදාභරණස්ය නාස්මි කිං පාත්රම් ॥ 69 ॥
අරහසි රහසි ස්වතංත්රබුද්ධ්යා
වරිවසිතුං සුලභඃ ප්රසන්නමූර්තිඃ ।
අගණිතඵලදායකඃ ප්රභුර්මේ
ජගදධිකෝ හෘදි රාජශේඛරෝऽස්ති ॥ 70 ॥
ආරූඪභක්තිගුණකුංචිතභාවචාප-
-යුක්තෛඃ ශිවස්මරණබාණගණෛරමෝඝෛඃ ।
නිර්ජිත්ය කිල්බිෂරිපූන්විජයී සුධීංද්රඃ
සානංදමාවහති සුස්ථිරරාජලක්ෂ්මීම් ॥ 71 ॥
ධ්යානාංජනේන සමවේක්ෂ්ය තමඃප්රදේශං
භිත්ත්වා මහාබලිභිරීශ්වරනාමමංත්රෛඃ ।
දිව්යාශ්රිතං භුජගභූෂණමුද්වහංති
යේ පාදපද්මමිහ තේ ශිව තේ කෘතාර්ථාඃ ॥ 72 ॥
භූදාරතාමුදවහද්යදපේක්ෂයා ශ්රී-
-භූදාර ඒව කිමතඃ සුමතේ ලභස්ව ।
කේදාරමාකලිතමුක්තිමහෞෂධීනාං
පාදාරවිංදභජනං පරමේශ්වරස්ය ॥ 73 ॥
ආශාපාශක්ලේශදුර්වාසනාදි-
-භේදෝද්යුක්තෛර්දිව්යගංධෛරමංදෛඃ ।
ආශාශාටීකස්ය පාදාරවිංදං
චේතඃපේටීං වාසිතාං මේ තනෝතු ॥ 74 ॥
කළ්යාණිනං සරසචිත්රගතිං සවේගං
සර්වේංගිතජ්ඤමනඝං ධ්රුවලක්ෂණාඪ්යම් ।
චේතස්තුරංගමධිරුහ්ය චර ස්මරාරේ
නේතඃ සමස්තජගතාං වෘෂභාධිරූඪ ॥ 75 ॥
භක්තිර්මහේශපදපුෂ්කරමාවසංතී
කාදංබිනීව කුරුතේ පරිතෝෂවර්ෂම් ।
සංපූරිතෝ භවති යස්ය මනස්තටාක-
-ස්තජ්ජන්මසස්යමඛිලං සඵලං ච නාන්යත් ॥ 76 ॥
බුද්ධිඃ ස්ථිරා භවිතුමීශ්වරපාදපද්ම-
-සක්තා වධූර්විරහිණීව සදා ස්මරංතී ।
සද්භාවනාස්මරණදර්ශනකීර්තනාදි
සම්මෝහිතේව ශිවමංත්රජපේන විංතේ ॥ 77 ॥
සදුපචාරවිධිෂ්වනුබෝධිතාං
සවිනයාං සුහෘදං සමුපාශ්රිතාම් ।
මම සමුද්ධර බුද්ධිමිමාං ප්රභෝ
වරගුණේන නවෝඪවධූමිව ॥ 78 ॥
නිත්යං යෝගිමනඃ සරෝජදළසංචාරක්ෂමස්ත්වත්ක්රමඃ
ශංභෝ තේන කථං කඨෝරයමරාඩ්වක්ෂඃකවාටක්ෂතිඃ ।
අත්යංතං මෘදුලං ත්වදංඝ්රියුගළං හා මේ මනශ්චිංතය-
-ත්යේතල්ලෝචනගෝචරං කුරු විභෝ හස්තේන සංවාහයේ ॥ 79 ॥
ඒෂ්යත්යේෂ ජනිං මනෝऽස්ය කඨිනං තස්මින්නටානීති ම-
-ද්රක්ෂායෛ ගිරිසීම්නි කෝමලපදන්යාසඃ පුරාභ්යාසිතඃ ।
නෝ චේද්දිව්යගෘහාංතරේෂු සුමනස්තල්පේෂු වේද්යාදිෂු
ප්රායඃ සත්සු ශිලාතලේෂු නටනං ශංභෝ කිමර්ථං තව ॥ 80 ॥
කංචිත්කාලමුමාමහේශ භවතඃ පාදාරවිංදාර්චනෛඃ
කංචිද්ධ්යානසමාධිභිශ්ච නතිභිඃ කංචිත්කථාකර්ණනෛඃ ।
කංචිත්කංචිදවේක්ෂණෛශ්ච නුතිභිඃ කංචිද්දශාමීදෘශීං
යඃ ප්රාප්නෝති මුදා ත්වදර්පිතමනා ජීවන් ස මුක්තඃ ඛලු ॥ 81 ॥
බාණත්වං වෘෂභත්වමර්ධවපුෂා භාර්යාත්වමාර්යාපතේ
ඝෝණිත්වං සඛිතා මෘදංගවහතා චේත්යාදි රූපං දධෞ ।
ත්වත්පාදේ නයනාර්පණං ච කෘතවාංස්ත්වද්දේහභාගෝ හරිඃ
පූජ්යාත්පූජ්යතරඃ ස ඒව හි න චේත්කෝ වා තදන්යෝऽධිකඃ ॥ 82 ॥
ජනනමෘතියුතානාං සේවයා දේවතානාං
න භවති සුඛලේශඃ සංශයෝ නාස්ති තත්ර ।
අජනිමමෘතරූපං සාංබමීශං භජංතේ
ය ඉහ පරමසෞඛ්යං තේ හි ධන්යා ලභංතේ ॥ 83 ॥
ශිව තව පරිචර්යාසන්නිධානාය ගෞර්යා
භව මම ගුණධුර්යාං බුද්ධිකන්යාං ප්රදාස්යේ ।
සකලභුවනබංධෝ සච්චිදානංදසිංධෝ
සදය හෘදයගේහේ සර්වදා සංවස ත්වම් ॥ 84 ॥
ජලධිමථනදක්ෂෝ නෛව පාතාළභේදී
න ච වනමෘගයායාං නෛව ලුබ්ධඃ ප්රවීණඃ ।
අශනකුසුමභූෂාවස්ත්රමුඛ්යාං සපර්යාං
කථය කථමහං තේ කල්පයානීංදුමෞළේ ॥ 85 ॥
පූජාද්රව්යසමෘද්ධයෝ විරචිතාඃ පූජාං කථං කුර්මහේ
පක්ෂිත්වං න ච වා කිටිත්වමපි න ප්රාප්තං මයා දුර්ලභම් ।
ජානේ මස්තකමංඝ්රිපල්ලවමුමාජානේ න තේऽහං විභෝ
න ජ්ඤාතං හි පිතාමහේන හරිණා තත්ත්වේන තද්රූපිණා ॥ 86 ॥
අශනං ගරළං ඵණී කලාපෝ
වසනං චර්ම ච වාහනං මහෝක්ෂඃ ।
මම දාස්යසි කිං කිමස්ති ශංභෝ
තව පාදාංබුජභක්තිමේව දේහි ॥ 87 ॥
යදා කෘතාංභෝනිධිසේතුබංධනඃ
කරස්ථලාධඃකෘතපර්වතාධිපඃ ।
භවානි තේ ලංඝිතපද්මසංභව-
-ස්තදා ශිවාර්චාස්තවභාවනක්ෂමඃ ॥ 88 ॥
නතිභිර්නුතිභිස්ත්වමීශ පූජා-
-විධිභිර්ධ්යානසමාධිභිර්න තුෂ්ටඃ ।
ධනුෂා මුසලේන චාශ්මභිර්වා
වද තේ ප්රීතිකරං තථා කරෝමි ॥ 89 ॥
වචසා චරිතං වදාමි ශංභෝ-
-රහමුද්යෝගවිධාසු තේऽප්රසක්තඃ ।
මනසාකෘතිමීශ්වරස්ය සේවේ
ශිරසා චෛව සදාශිවං නමාමි ॥ 90 ॥
ආද්යාවිද්යා හෘද්ගතා නිර්ගතාසී-
-ද්විද්යා හෘද්යා හෘද්ගතා ත්වත්ප්රසාදාත් ।
සේවේ නිත්යං ශ්රීකරං ත්වත්පදාබ්ජං
භාවේ මුක්තේර්භාජනං රාජමෞළේ ॥ 91 ॥
දූරීකෘතානි දුරිතානි දුරක්ෂරාණි
දෞර්භාග්යදුඃඛදුරහංකෘතිදුර්වචාංසි ।
සාරං ත්වදීයචරිතං නිතරාං පිබංතං
ගෞරීශ මාමිහ සමුද්ධර සත්කටාක්ෂෛඃ ॥ 92 ॥
සෝමකළාධරමෞළෞ
කෝමලඝනකංධරේ මහාමහසි ।
ස්වාමිනි ගිරිජානාථේ
මාමකහෘදයං නිරංතරං රමතාම් ॥ 93 ॥
සා රසනා තේ නයනේ
තාවේව කරෞ ස ඒව කෘතකෘත්යඃ ।
යා යේ යෞ යෝ භර්ගං
වදතීක්ෂේතේ සදාර්චතඃ ස්මරති ॥ 94 ॥
අතිමෘදුලෞ මම චරණා-
-වතිකඨිනං තේ මනෝ භවානීශ ।
ඉති විචිකිත්සාං සංත්යජ
ශිව කථමාසීද්ගිරෞ තථා වේශඃ ॥ 95 ॥
ධෛර්යාංකුශේන නිභෘතං
රභසාදාකෘෂ්ය භක්තිශෘංඛලයා ।
පුරහර චරණාලානේ
හෘදයමදේභං බධාන චිද්යංත්රෛඃ ॥ 96 ॥
ප්රචරත්යභිතඃ ප්රගල්භවෘත්ත්යා
මදවානේෂ මනඃ කරී ගරීයාන් ।
පරිගෘහ්ය නයේන භක්තිරජ්වා
පරම ස්ථාණු පදං දෘඪං නයාමුම් ॥ 97 ॥
සර්වාලංකාරයුක්තාං සරළපදයුතාං සාධුවෘත්තාං සුවර්ණාං
සද්භිඃ සංස්තූයමානාං සරසගුණයුතාං ලක්ෂිතාං ලක්ෂණාඪ්යාම් ।
උද්යද්භූෂාවිශේෂාමුපගතවිනයාං ද්යෝතමානාර්ථරේඛාං
කල්යාණීං දේව ගෞරීප්රිය මම කවිතාකන්යකාං ත්වං ගෘහාණ ॥ 98 ॥
ඉදං තේ යුක්තං වා පරමශිව කාරුණ්යජලධේ
ගතෞ තිර්යග්රූපං තව පදශිරෝදර්ශනධියා ।
හරිබ්රහ්මාණෞ තෞ දිවි භුවි චරංතෞ ශ්රමයුතෞ
කථං ශංභෝ ස්වාමින්කථය මම වේද්යෝऽසි පුරතඃ ॥ 99 ॥
ස්තෝත්රේණාලමහං ප්රවච්මි න මෘෂා දේවා විරිංචාදයඃ
ස්තුත්යානාං ගණනාප්රසංගසමයේ ත්වාමග්රගණ්යං විදුඃ ।
මාහාත්ම්යාග්රවිචාරණප්රකරණේ ධානාතුෂස්තෝමව-
-ද්ධූතාස්ත්වාං විදුරුත්තමෝත්තමඵලං ශංභෝ භවත්සේවකාඃ ॥ 100 ॥
ඉති ශ්රීමත්පරමහංසපරිව්රාජකාචාර්යස්ය ශ්රීගෝවිංදභගවත්පූජ්යපාදශිෂ්යස්ය ශ්රීමච්ඡංකරභගවතඃ කෘතෞ ශිවානංදලහරී ॥