ஈஶ்வர உவாச ।
ஶ்ருணு தே³வி ப்ரவக்ஷ்யாமி கவசம் ஸர்வஸித்³தி⁴த³ம் ।
படி²த்வா பாட²யித்வா ச நரோ முச்யேத ஸங்கடாத் ॥ 1 ॥
அஜ்ஞாத்வா கவசம் தே³வி து³ர்கா³மன்த்ரம் ச யோ ஜபேத் ।
ந சாப்னோதி ப²லம் தஸ்ய பரம் ச நரகம் வ்ரஜேத் ॥ 2 ॥
உமாதே³வீ ஶிர: பாது லலாடே ஶூலதா⁴ரிணீ ।
சக்ஷுஷீ கே²சரீ பாது கர்ணௌ சத்வரவாஸினீ ॥ 3 ॥
ஸுக³ன்தா⁴ நாஸிகம் பாது வத³னம் ஸர்வதா⁴ரிணீ ।
ஜிஹ்வாம் ச சண்டி³காதே³வீ க்³ரீவாம் ஸௌப⁴த்³ரிகா ததா² ॥ 4 ॥
அஶோகவாஸினீ சேதோ த்³வௌ பா³ஹூ வஜ்ரதா⁴ரிணீ ।
ஹ்ருத³யம் லலிதாதே³வீ உத³ரம் ஸிம்ஹவாஹினீ ॥ 5 ॥
கடிம் ப⁴க³வதீ தே³வீ த்³வாவூரூ வின்த்⁴யவாஸினீ ।
மஹாப³லா ச ஜங்கே⁴ த்³வே பாதௌ³ பூ⁴தலவாஸினீ ॥ 6 ॥
ஏவம் ஸ்தி²தாஸி தே³வி த்வம் த்ரைலோக்யே ரக்ஷணாத்மிகா ।
ரக்ஷ மாம் ஸர்வகா³த்ரேஷு து³ர்கே³ தே³வி நமோஸ்து தே ॥ 7 ॥