ஏகதா³ த³தி⁴விமாத²காரிணீம் மாதரம் ஸமுபஸேதி³வான் ப⁴வான் ।
ஸ்தன்யலோலுபதயா நிவாரயன்னங்கமேத்ய பபிவான் பயோத⁴ரௌ ॥1॥
அர்த⁴பீதகுசகுட்³மலே த்வயி ஸ்னிக்³த⁴ஹாஸமது⁴ரானநாம்பு³ஜே ।
து³க்³த⁴மீஶ த³ஹனே பரிஸ்ருதம் த⁴ர்துமாஶு ஜனநீ ஜகா³ம தே ॥2॥
ஸாமிபீதரஸப⁴ங்க³ஸங்க³தக்ரோத⁴பா⁴ரபரிபூ⁴தசேதஸா।
மன்த²த³ண்ட³முபக்³ருஹ்ய பாடிதம் ஹன்த தே³வ த³தி⁴பா⁴ஜனம் த்வயா ॥3॥
உச்சலத்³த்⁴வனிதமுச்சகைஸ்ததா³ ஸன்னிஶம்ய ஜனநீ ஸமாத்³ருதா ।
த்வத்³யஶோவிஸரவத்³த³த³ர்ஶ ஸா ஸத்³ய ஏவ த³தி⁴ விஸ்த்ருதம் க்ஷிதௌ ॥4॥
வேத³மார்க³பரிமார்கி³தம் ருஷா த்வமவீக்ஷ்ய பரிமார்க³யன்த்யஸௌ ।
ஸன்த³த³ர்ஶ ஸுக்ருதின்யுலூக²லே தீ³யமானநவனீதமோதவே ॥5॥
த்வாம் ப்ரக்³ருஹ்ய ப³த பீ⁴திபா⁴வனாபா⁴ஸுரானநஸரோஜமாஶு ஸா ।
ரோஷரூஷிதமுகீ² ஸகீ²புரோ ப³ன்த⁴னாய ரஶனாமுபாத³தே³ ॥6॥
ப³ன்து⁴மிச்ச²தி யமேவ ஸஜ்ஜனஸ்தம் ப⁴வன்தமயி ப³ன்து⁴மிச்ச²தீ ।
ஸா நியுஜ்ய ரஶனாகு³ணான் ப³ஹூன் த்³வ்யங்கு³லோனமகி²லம் கிலைக்ஷத ॥7॥
விஸ்மிதோத்ஸ்மிதஸகீ²ஜனேக்ஷிதாம் ஸ்வின்னஸன்னவபுஷம் நிரீக்ஷ்ய தாம் ।
நித்யமுக்தவபுரப்யஹோ ஹரே ப³ன்த⁴மேவ க்ருபயான்வமன்யதா²: ॥8॥
ஸ்தீ²யதாம் சிரமுலூக²லே க²லேத்யாக³தா ப⁴வனமேவ ஸா யதா³।
ப்ராகு³லூக²லபி³லான்தரே ததா³ ஸர்பிரர்பிதமத³ன்னவாஸ்தி²தா²: ॥9॥
யத்³யபாஶஸுக³மோ விபோ⁴ ப⁴வான் ஸம்யத: கிமு ஸபாஶயானயா ।
ஏவமாதி³ தி³விஜைரபி⁴ஷ்டுதோ வாதனாத² பரிபாஹி மாம் க³தா³த் ॥1௦॥