யத்னேஷு ஸர்வேஷ்வபி நாவகேஶீ கேஶீ ஸ போ⁴ஜேஶிதுரிஷ்டப³ன்து⁴: ।
த்வாம் ஸின்து⁴ஜாவாப்ய இதீவ மத்வா ஸம்ப்ராப்தவான் ஸின்து⁴ஜவாஜிரூப: ॥1॥
க³ன்த⁴ர்வதாமேஷ க³தோபி ரூக்ஷைர்னாதை³: ஸமுத்³வேஜிதஸர்வலோக: ।
ப⁴வத்³விலோகாவதி⁴ கோ³பவாடீம் ப்ரமர்த்³ய பாப: புனராபதத்த்வாம் ॥2॥
தார்க்ஷ்யார்பிதாங்க்⁴ரேஸ்தவ தார்க்ஷ்ய ஏஷ சிக்ஷேப வக்ஷோபு⁴வி நாம பாத³ம் ।
ப்⁴ருகோ³: பதா³கா⁴தகதா²ம் நிஶம்ய ஸ்வேனாபி ஶக்யம் ததி³தீவ மோஹாத் ॥3॥
ப்ரவஞ்சயன்னஸ்ய கு²ராஞ்சலம் த்³ராக³முஞ்ச சிக்ஷேபித² தூ³ரதூ³ரம்
ஸம்மூர்ச்சி²தோபி ஹ்யதிமூர்ச்சி²தேன க்ரோதோ⁴ஷ்மணா கா²தி³துமாத்³ருதஸ்த்வாம் ॥4॥
த்வம் வாஹத³ண்டே³ க்ருததீ⁴ஶ்ச வாஹாத³ண்ட³ம் ந்யதா⁴ஸ்தஸ்ய முகே² ததா³னீம் ।
தத்³ வ்ருத்³தி⁴ருத்³த⁴ஶ்வஸனோ க³தாஸு: ஸப்தீப⁴வன்னப்யயமைக்யமாகா³த் ॥5॥
ஆலம்ப⁴மாத்ரேண பஶோ: ஸுராணாம் ப்ரஸாத³கே நூத்ன இவாஶ்வமேதே⁴ ।
க்ருதே த்வயா ஹர்ஷவஶாத் ஸுரேன்த்³ராஸ்த்வாம் துஷ்டுவு: கேஶவனாமதே⁴யம் ॥6॥
கம்ஸாய தே ஶௌரிஸுதத்வமுக்த்வா தம் தத்³வதோ⁴த்கம் ப்ரதிருத்⁴ய வாசா।
ப்ராப்தேன கேஶிக்ஷபணாவஸானே ஶ்ரீனாரதே³ன த்வமபி⁴ஷ்டுதோபூ⁴: ॥7॥
கதா³பி கோ³பை: ஸஹ கானநான்தே நிலாயனக்ரீட³னலோலுபம் த்வாம் ।
மயாத்மஜ: ப்ராப து³ரன்தமாயோ வ்யோமாபி⁴தோ⁴ வ்யோமசரோபரோதீ⁴ ॥8॥
ஸ சோரபாலாயிதவல்லவேஷு சோராயிதோ கோ³பஶிஶூன் பஶூம்ஶ்ச
கு³ஹாஸு க்ருத்வா பித³தே⁴ ஶிலாபி⁴ஸ்த்வயா ச பு³த்³த்⁴வா பரிமர்தி³தோபூ⁴த் ॥9॥
ஏவம் விதை⁴ஶ்சாத்³பு⁴தகேலிபே⁴தை³ரானந்த³மூர்ச்சா²மதுலாம் வ்ரஜஸ்ய ।
பதே³ பதே³ நூதனயன்னஸீமாம் பராத்மரூபின் பவனேஶ பாயா: ॥1௦॥