॥ ఏకాదశః సర్గః ॥
॥ సానందదామోదరః ॥
సుచిరమనునయనే ప్రీణయిత్వా మృగాక్షీం గతవతి కృతవేశే కేశవే కుంజశయ్యామ్ ।
రచితరుచిరభూషాం దృష్టిమోషే ప్రదోషే స్ఫురతి నిరవసాదాం కాపి రాధాం జగాద ॥ 59 ॥
॥ గీతం 20 ॥
విరచితచాటువచనరచనం చరణే రచితప్రణిపాతమ్ ।
సంప్రతి మంజులవంజులసీమని కేలిశయనమనుయాతమ్ ॥
ముగ్ధే మధుమథనమనుగతమనుసర రాధికే ॥ 1 ॥
ఘనజఘనస్తనభారభరే దరమంథరచరణవిహారమ్ ।
ముఖరితమణీమంజీరముపైహి విధేహి మరాలవికారమ్ ॥ 2 ॥
శృణు రమణీయతరం తరుణీజనమోహనమధుపవిరావమ్ ।
కుసుమశరాసనశాసనబందిని పికనికరే భజ భావమ్ ॥ 3 ॥
అనిలతరలకిసలయనికరేణ కరేణ లతానికురంబమ్ ।
ప్రేరణమివ కరభోరు కరోతి గతిం ప్రతిముంచ విలంబమ్ ॥ 4 ॥
స్ఫురితమనంగతరంగవశాదివ సూచితహరిపరిరంభమ్ ।
పృచ్ఛ మనోహరహారవిమలజలధారమముం కుచకుంభమ్ ॥ 5 ॥
అధిగతమఖిలసఖీభిరిదం తవ వపురపి రతిరణసజ్జమ్ ।
చండి రసితరశనారవడిండిమమభిసర సరసమలజ్జమ్ ॥ 6 ॥
స్మరశరసుభగనఖేన కరేణ సఖీమవలంబ్య సలీలమ్ ।
చల వలయక్వణీతైరవబోధయ హరమపి నిజగతిశీలమ్ ॥ 7 ॥
శ్రీజయదేవభణితమధరీకృతహారముదాసితవామమ్ ।
హరివినిహితమనసామధితిష్ఠతు కంఠతటీమవిరామమ్ ॥ 8 ॥
సా మాం ద్రక్ష్యతి వక్ష్యతి స్మరకథాం ప్రత్యంగమాలింగనైః ప్రీతిం యాస్యతి రమ్యతే సఖి సమాగత్యేతి చింతాకులః ।
స త్వాం పశ్యతి వేపతే పులకయత్యానందతి స్విద్యతి ప్రత్యుద్గచ్ఛతి మూర్చ్ఛతి స్థిరతమఃపుంజే నికుంజే ప్రియః ॥ 60 ॥
అక్ష్ణోర్నిక్షిపదంజనం శ్రవణయోస్తాపిచ్ఛగుచ్ఛావలీం మూర్ధ్ని శ్యామసరోజదామ కుచయోః కస్తూరికాపాత్రకమ్ ।
ధూర్తానామభిసారసత్వరహృదాం విష్వఙ్నికుంజే సఖి ధ్వాంతం నీలనిచోలచారు సదృశాం ప్రత్యంగమాలింగతి ॥ 61 ॥
కాశ్మీరగౌరవపుషామభిసారికాణాం ఆబద్ధరేఖమభితో రుచిమంజరీభిః ।
ఏతత్తమాలదలనీలతమం తమిశ్రం తత్ప్రేమహేమనికషోపలతాం తనోతి ॥ 62 ॥
హారావలీతరలకాంచనకాంచిదామ-కేయూరకంకణమణిద్యుతిదీపితస్య ।
ద్వారే నికుంజనిలయస్యహరిం నిరీక్ష్య వ్రీడావతీమథ సఖీ నిజగాహ రాధామ్ ॥ 63 ॥
॥ గీతం 21 ॥
మంజుతరకుంజతలకేలిసదనే ।
విలస రతిరభసహసితవదనే ॥
ప్రవిశ రాధే మాధవసమీపమిహ ॥ 1 ॥
నవభవదశోకదలశయనసారే ।
విలస కుచకలశతరలహారే ॥ 2 ॥
కుసుమచయరచితశుచివాసగేహే ।
విలస కుసుమసుకుమారదేహే ॥ 3 ॥
చలమలయవనపవనసురభిశీతే ।
విలస రసవలితలలితగీతే ॥ 4 ॥
మధుముదితమధుపకులకలితరావే ।
విలస మదనరససరసభావే ॥ 5 ॥
మధుతరలపికనికరనినదముఖరే ।
విలస దశనరుచిరుచిరశిఖరే ॥ 6 ॥
వితత బహువల్లినవపల్లవఘనే ।
విలస చిరమలసపీనజఘనే ॥ 7 ॥
విహితపద్మావతీసుఖసమాజే ।
భణతి జయదేవకవిరాజే ॥ 8 ॥
త్వాం చిత్తేన చిరం వహన్నయమతిశ్రాంతో భృశం తాపితః కందర్పేణ తు పాతుమిచ్ఛతి సుధాసంబాధబింబాధరమ్ ।
అస్యాంగం తదలంకురు క్షణమిహ భ్రూక్షేపలక్ష్మీలవ-క్రీతే దాస ఇవోపసేవితపదాంభోజే కుతః సంభ్రమః ॥ 64 ॥
సా ససాధ్వససానందం గోవిందే లోలలోచనా ।
సింజానమంజుమంజీరం ప్రవివేశ నివేశనమ్ ॥ 65 ॥
॥ గీతం 22 ॥
రాధావదనవిలోకనవికసితవివిధవికారవిభంగమ్ ।
జలనిధిమివ విధుమండలదర్శనతరలితతుంగతరంగమ్ ॥
హరిమేకరసం చిరమభిలషితవిలాసం సా దదార్శ గురుహర్షవశంవదవదనమనంగనివాసమ్ ॥ 1 ॥
హారమమలతరతారమురసి దధతం పరిరభ్య విదూరమ్ ।
స్ఫుటతరఫేనకదంబకరంబితమివ యమునాజలపూరమ్ ॥ 2 ॥
శ్యామలమృదులకలేవరమండలమధిగతగౌరదుకూలమ్ ।
నీలనలినమివ పీతపరాగపతలభరవలయితమూలమ్ ॥ 3 ॥
తరలదృగంచలచలనమనోహరవదనజనితరతిరాగమ్ ।
స్ఫుటకమలోదరఖేలితఖంజనయుగమివ శరది తడాగమ్ ॥ 4 ॥
వదనకమలపరిశీలనమిలితమిహిరసమకుండలశోభమ్ ।
స్మితరుచిరుచిరసముల్లసితాధరపల్లవకృతరతిలోభమ్ ॥ 5 ॥
శశికిరణచ్ఛురితోదరజలధరసుందరసకుసుమకేశమ్ ।
తిమిరోదితవిధుమణ్దలనిర్మలమలయజతిలకనివేశమ్ ॥ 6 ॥
విపులపులకభరదంతురితం రతికేలికలాభిరధీరమ్ ।
మణిగణకిరణసమూహసముజ్జ్వలభూషణసుభగశరీరమ్ ॥ 7 ॥
శ్రీజయదేవభణితవిభవద్విగుణీకృతభూషణభారమ్ ।
ప్రణమత హృది సుచిరం వినిధాయ హరిం సుకృతోదయసారమ్ ॥ 8 ॥
అతిక్రమ్యాపాంగం శ్రవణపథపర్యంతగమన-ప్రయాసేనేవాక్ష్ణోస్తరలతరతారం పతితయోః ।
ఇదానీం రాధాయాః ప్రియతమసమాలోకసమయే పపాత స్వేదాంబుప్రసర ఇవ హర్షాశ్రునికరః ॥ 66 ॥
భవంత్యాస్తల్పాంతం కృతకపటకండూతిపిహిత-స్మితం యాతే గేహాద్బహిరవహితాలీపరిజనే ।
ప్రియాస్యం పశ్యంత్యాః స్మరశరసమాకూలసుభగం సలజ్జా లజ్జాపి వ్యగమదివ దూరం మృగదృశః ॥ 67 ॥
॥ ఇతి శ్రీగీతగోవిందే రాధికామిలనే సానందదామోదరో నామైకాదశః సర్గః ॥