ఇంద్రద్యుమ్నః పాండ్యఖండాధిరాజ-
స్త్వద్భక్తాత్మా చందనాద్రౌ కదాచిత్ ।
త్వత్ సేవాయాం మగ్నధీరాలులోకే
నైవాగస్త్యం ప్రాప్తమాతిథ్యకామమ్ ॥1॥
కుంభోద్భూతిః సంభృతక్రోధభారః
స్తబ్ధాత్మా త్వం హస్తిభూయం భజేతి ।
శప్త్వాఽథైనం ప్రత్యగాత్ సోఽపి లేభే
హస్తీంద్రత్వం త్వత్స్మృతివ్యక్తిధన్యమ్ ॥2॥
దగ్ధాంభోధేర్మధ్యభాజి త్రికూటే
క్రీడంఛైలే యూథపోఽయం వశాభిః ।
సర్వాన్ జంతూనత్యవర్తిష్ట శక్త్యా
త్వద్భక్తానాం కుత్ర నోత్కర్షలాభః ॥3॥
స్వేన స్థేమ్నా దివ్యదేశత్వశక్త్యా
సోఽయం ఖేదానప్రజానన్ కదాచిత్ ।
శైలప్రాంతే ఘర్మతాంతః సరస్యాం
యూథైస్సార్ధం త్వత్ప్రణున్నోఽభిరేమే ॥4॥
హూహూస్తావద్దేవలస్యాపి శాపాత్
గ్రాహీభూతస్తజ్జలే బర్తమానః ।
జగ్రాహైనం హస్తినం పాదదేశే
శాంత్యర్థం హి శ్రాంతిదోఽసి స్వకానామ్ ॥5॥
త్వత్సేవాయా వైభవాత్ దుర్నిరోధం
యుధ్యంతం తం వత్సరాణాం సహస్రమ్ ।
ప్రాప్తే కాలే త్వత్పదైకాగ్ర్యసిధ్యై
నక్రాక్రాంతం హస్తివర్యం వ్యధాస్త్వమ్ ॥6॥
ఆర్తివ్యక్తప్రాక్తనజ్ఞానభక్తిః
శుండోత్క్షిప్తైః పుండరీకైః సమర్చన్ ।
పూర్వాభ్యస్తం నిర్విశేషాత్మనిష్ఠం
స్తోత్రం శ్రేష్ఠం సోఽన్వగాదీత్ పరాత్మన్ ॥7॥
శ్రుత్వా స్తోత్రం నిర్గుణస్థం సమస్తం
బ్రహ్మేశాద్యైర్నాహమిత్యప్రయాతే ।
సర్వాత్మా త్వం భూరికారుణ్యవేగాత్
తార్క్ష్యారూఢః ప్రేక్షితోఽభూః పురస్తాత్ ॥8॥
హస్తీంద్రం తం హస్తపద్మేన ధృత్వా
చక్రేణ త్వం నక్రవర్యం వ్యదారీః ।
గంధర్వేఽస్మిన్ ముక్తశాపే స హస్తీ
త్వత్సారూప్యం ప్రాప్య దేదీప్యతే స్మ ॥9॥
ఏతద్వృత్తం త్వాం చ మాం చ ప్రగే యో
గాయేత్సోఽయం భూయసే శ్రేయసే స్యాత్ ।
ఇత్యుక్త్వైనం తేన సార్ధం గతస్త్వం
ధిష్ణ్యం విష్ణో పాహి వాతాలయేశ ॥10॥