త్వత్సేవోత్కస్సౌభరిర్నామ పూర్వం
కాలింద్యంతర్ద్వాదశాబ్దం తపస్యన్ ।
మీనవ్రాతే స్నేహవాన్ భోగలోలే
తార్క్ష్యం సాక్షాదైక్షతాగ్రే కదాచిత్ ॥1॥
త్వద్వాహం తం సక్షుధం తృక్షసూనుం
మీనం కంచిజ్జక్షతం లక్షయన్ సః ।
తప్తశ్చిత్తే శప్తవానత్ర చేత్త్వం
జంతూన్ భోక్తా జీవితం చాపి మోక్తా ॥2॥
తస్మిన్ కాలే కాలియః క్ష్వేలదర్పాత్
సర్పారాతేః కల్పితం భాగమశ్నన్ ।
తేన క్రోధాత్త్వత్పదాంభోజభాజా
పక్షక్షిప్తస్తద్దురాపం పయోఽగాత్ ॥3॥
ఘోరే తస్మిన్ సూరజానీరవాసే
తీరే వృక్షా విక్షతాః క్ష్వేలవేగాత్ ।
పక్షివ్రాతాః పేతురభ్రే పతంతః
కారుణ్యార్ద్రం త్వన్మనస్తేన జాతమ్ ॥4॥
కాలే తస్మిన్నేకదా సీరపాణిం
ముక్త్వా యాతే యామునం కాననాంతమ్ ।
త్వయ్యుద్దామగ్రీష్మభీష్మోష్మతప్తా
గోగోపాలా వ్యాపిబన్ క్ష్వేలతోయమ్ ॥5॥
నశ్యజ్జీవాన్ విచ్యుతాన్ క్ష్మాతలే తాన్
విశ్వాన్ పశ్యన్నచ్యుత త్వం దయార్ద్రః ।
ప్రాప్యోపాంతం జీవయామాసిథ ద్రాక్
పీయూషాంభోవర్షిభిః శ్రీకటక్షైః ॥6॥
కిం కిం జాతో హర్షవర్షాతిరేకః
సర్వాంగేష్విత్యుత్థితా గోపసంఘాః ।
దృష్ట్వాఽగ్రే త్వాం త్వత్కృతం తద్విదంత-
స్త్వామాలింగన్ దృష్టనానాప్రభావాః ॥7॥
గావశ్చైవం లబ్ధజీవాః క్షణేన
స్ఫీతానందాస్త్వాం చ దృష్ట్వా పురస్తాత్ ।
ద్రాగావవ్రుః సర్వతో హర్షబాష్పం
వ్యాముంచంత్యో మందముద్యన్నినాదాః ॥8॥
రోమాంచోఽయం సర్వతో నః శరీరే
భూయస్యంతః కాచిదానందమూర్ఛా ।
ఆశ్చర్యోఽయం క్ష్వేలవేగో ముకుందే-
త్యుక్తో గోపైర్నందితో వందితోఽభూః ॥9॥
ఏవం భక్తాన్ ముక్తజీవానపి త్వం
ముగ్ధాపాంగైరస్తరోగాంస్తనోషి ।
తాదృగ్భూతస్ఫీతకారుణ్యభూమా
రోగాత్ పాయా వాయుగేహాధివాస ॥10॥