త్వద్వపుర్నవకలాయకోమలం ప్రేమదోహనమశేషమోహనమ్ ।
బ్రహ్మ తత్త్వపరచిన్ముదాత్మకం వీక్ష్య సమ్ముముహురన్వహం స్త్రియః ॥1॥
మన్మథోన్మథితమానసాః క్రమాత్త్వద్విలోకనరతాస్తతస్తతః ।
గోపికాస్తవ న సేహిరే హరే కాననోపగతిమప్యహర్ముఖే ॥2॥
నిర్గతే భవతి దత్తదృష్టయస్త్వద్గతేన మనసా మృగేక్షణాః ।
వేణునాదముపకర్ణ్య దూరతస్త్వద్విలాసకథయాఽభిరేమిరే ॥3॥
కాననాంతమితవాన్ భవానపి స్నిగ్ధపాదపతలే మనోరమే ।
వ్యత్యయాకలితపాదమాస్థితః ప్రత్యపూరయత వేణునాలికామ్ ॥4॥
మారబాణధుతఖేచరీకులం నిర్వికారపశుపక్షిమండలమ్ ।
ద్రావణం చ దృషదామపి ప్రభో తావకం వ్యజని వేణుకూజితమ్ ॥5॥
వేణురంధ్రతరలాంగులీదలం తాలసంచలితపాదపల్లవమ్ ।
తత్ స్థితం తవ పరోక్షమప్యహో సంవిచింత్య ముముహుర్వ్రజాంగనాః ॥6॥
నిర్విశంకభవదంగదర్శినీః ఖేచరీః ఖగమృగాన్ పశూనపి ।
త్వత్పదప్రణయి కాననం చ తాః ధన్యధన్యమితి నన్వమానయన్ ॥7॥
ఆపిబేయమధరామృతం కదా వేణుభుక్తరసశేషమేకదా ।
దూరతో బత కృతం దురాశయేత్యాకులా ముహురిమాః సమాముహన్ ॥8॥
ప్రత్యహం చ పునరిత్థమంగనాశ్చిత్తయోనిజనితాదనుగ్రహాత్ ।
బద్ధరాగవివశాస్త్వయి ప్రభో నిత్యమాపురిహ కృత్యమూఢతామ్ ॥9॥
రాగస్తావజ్జాయతే హి స్వభావా-
న్మోక్షోపాయో యత్నతః స్యాన్న వా స్యాత్ ।
తాసాం త్వేకం తద్ద్వయం లబ్ధమాసీత్
భాగ్యం భాగ్యం పాహి మాం మారుతేశ ॥10॥