ఉపయాతానాం సుదృశాం కుసుమాయుధబాణపాతవివశానామ్ ।
అభివాంఛితం విధాతుం కృతమతిరపి తా జగాథ వామమివ ॥1॥
గగనగతం మునినివహం శ్రావయితుం జగిథ కులవధూధర్మమ్ ।
ధర్మ్యం ఖలు తే వచనం కర్మ తు నో నిర్మలస్య విశ్వాస్యమ్ ॥2॥
ఆకర్ణ్య తే ప్రతీపాం వాణీమేణీదృశః పరం దీనాః ।
మా మా కరుణాసింధో పరిత్యజేత్యతిచిరం విలేపుస్తాః ॥3॥
తాసాం రుదితైర్లపితైః కరుణాకులమానసో మురారే త్వమ్ ।
తాభిస్సమం ప్రవృత్తో యమునాపులినేషు కామమభిరంతుమ్ ॥4॥
చంద్రకరస్యందలసత్సుందరయమునాతటాంతవీథీషు ।
గోపీజనోత్తరీయైరాపాదితసంస్తరో న్యషీదస్త్వమ్ ॥5॥
సుమధురనర్మాలపనైః కరసంగ్రహణైశ్చ చుంబనోల్లాసైః ।
గాఢాలింగనసంగైస్త్వమంగనాలోకమాకులీచకృషే ॥6॥
వాసోహరణదినే యద్వాసోహరణం ప్రతిశ్రుతం తాసామ్ ।
తదపి విభో రసవివశస్వాంతానాం కాంత సుభ్రువామదధాః ॥7॥
కందలితఘర్మలేశం కుందమృదుస్మేరవక్త్రపాథోజమ్ ।
నందసుత త్వాం త్రిజగత్సుందరముపగూహ్య నందితా బాలాః ॥8॥
విరహేష్వంగారమయః శృంగారమయశ్చ సంగమే హి త్వం నితరామంగారమయస్తత్ర పునస్సంగమేఽపి చిత్రమిదమ్ ॥9॥
రాధాతుంగపయోధరసాధుపరీరంభలోలుపాత్మానమ్ ।
ఆరాధయే భవంతం పవనపురాధీశ శమయ సకలగదాన్ ॥10॥