నారద ఉవాచ –
భగవన్సర్వధర్మజ్ఞ సర్వశాస్త్రవిశారద ।
శ్రుతిస్మృతిపురాణానాం రహస్యం త్వన్ముఖాచ్ఛ్రుతమ్ ॥ 1 ॥
సర్వపాపహరం దేవ యేన విద్యా ప్రవర్తతే ।
కేన వా బ్రహ్మవిజ్ఞానం కిం ను వా మోక్షసాధనమ్ ॥ 2 ॥
బ్రాహ్మణానాం గతిః కేన కేన వా మృత్యు నాశనమ్ ।
ఐహికాముష్మికఫలం కేన వా పద్మలోచన ॥ 3 ॥
వక్తుమర్హస్యశేషేణ సర్వే నిఖిలమాదితః ।
శ్రీనారాయణ ఉవాచ –
సాధు సాధు మహాప్రాజ్ఞ సమ్యక్ పృష్టం త్వయాఽనఘ ॥ 4 ॥
శృణు వక్ష్యామి యత్నేన గాయత్ర్యష్టసహస్రకమ్ ।
నామ్నాం శుభానాం దివ్యానాం సర్వపాపవినాశనమ్ ॥ 5 ॥
సృష్ట్యాదౌ యద్భగవతా పూర్వే ప్రోక్తం బ్రవీమి తే ।
అష్టోత్తరసహస్రస్య ఋషిర్బ్రహ్మా ప్రకీర్తితః ॥ 6 ॥
ఛందోఽనుష్టుప్తథా దేవీ గాయత్రీం దేవతా స్మృతా ।
హలోబీజాని తస్యైవ స్వరాః శక్తయ ఈరితాః ॥ 7 ॥
అంగన్యాసకరన్యాసావుచ్యేతే మాతృకాక్షరైః ।
అథ ధ్యానం ప్రవక్ష్యామి సాధకానాం హితాయ వై ॥ 8 ॥
ధ్యానం
రక్తశ్వేతహిరణ్యనీలధవలైర్యుక్తాం త్రినీత్రోజ్జ్వలాం
రక్తాం రక్తనవస్రజం మణిగణైర్యుక్తాం కుమారీమిమామ్ ।
గాయత్రీం కమలాసనాం కరతలవ్యానద్ధకుండాంబుజాం
పద్మాక్షీం చ వరస్రజం చ దధతీం హంసాధిరూఢాం భజే ॥ 9 ॥
అచింత్యలక్షణావ్యక్తాప్యర్థమాతృమహేశ్వరీ ।
అమృతార్ణవమధ్యస్థాప్యజితా చాపరాజితా ॥ 10 ॥
అణిమాదిగుణాధారాప్యర్కమండలసంస్థితా ।
అజరాజాపరాధర్మా అక్షసూత్రధరాధరా ॥ 11 ॥
అకారాదిక్షకారాంతాప్యరిషడ్వర్గభేదినీ ।
అంజనాద్రిప్రతీకాశాప్యంజనాద్రినివాసినీ ॥ 12 ॥
అదితిశ్చాజపావిద్యాప్యరవిందనిభేక్షణా ।
అంతర్బహిఃస్థితావిద్యాధ్వంసినీ చాంతరాత్మికా ॥ 13 ॥
అజా చాజముఖావాసాప్యరవిందనిభాననా ।
అర్ధమాత్రార్థదానజ్ఞాప్యరిమండలమర్దినీ ॥ 14 ॥
అసురఘ్నీ హ్యమావాస్యాప్యలక్ష్మీఘ్న్యంత్యజార్చితా ।
ఆదిలక్ష్మీశ్చాదిశక్తిరాకృతిశ్చాయతాననా ॥ 15 ॥
ఆదిత్యపదవీచారాప్యాదిత్యపరిసేవితా ।
ఆచార్యావర్తనాచారాప్యాదిమూర్తినివాసినీ ॥ 16 ॥
ఆగ్నేయీ చామరీ చాద్యా చారాధ్యా చాసనస్థితా ।
ఆధారనిలయాధారా చాకాశాంతనివాసినీ ॥ 17 ॥
ఆద్యాక్షరసమాయుక్తా చాంతరాకాశరూపిణీ ।
ఆదిత్యమండలగతా చాంతరధ్వాంతనాశినీ ॥ 18 ॥
ఇందిరా చేష్టదా చేష్టా చేందీవరనిభేక్షణా ।
ఇరావతీ చేంద్రపదా చేంద్రాణీ చేందురూపిణీ ॥ 19 ॥
ఇక్షుకోదండసంయుక్తా చేషుసంధానకారిణీ ।
ఇంద్రనీలసమాకారా చేడాపింగలరూపిణీ ॥ 20 ॥
ఇంద్రాక్షీచేశ్వరీ దేవీ చేహాత్రయవివర్జితా ।
ఉమా చోషా హ్యుడునిభా ఉర్వారుకఫలాననా ॥ 21 ॥
ఉడుప్రభా చోడుమతీ హ్యుడుపా హ్యుడుమధ్యగా ।
ఊర్ధ్వా చాప్యూర్ధ్వకేశీ చాప్యూర్ధ్వాధోగతిభేదినీ ॥ 22 ॥
ఊర్ధ్వబాహుప్రియా చోర్మిమాలావాగ్గ్రంథదాయినీ ।
ఋతం చర్షిరృతుమతీ ఋషిదేవనమస్కృతా ॥ 23 ॥
ఋగ్వేదా ఋణహర్త్రీ చ ఋషిమండలచారిణీ ।
ఋద్ధిదా ఋజుమార్గస్థా ఋజుధర్మా ఋజుప్రదా ॥ 24 ॥
ఋగ్వేదనిలయా ఋజ్వీ లుప్తధర్మప్రవర్తినీ ।
లూతారివరసంభూతా లూతాదివిషహారిణీ ॥ 25 ॥
ఏకాక్షరా చైకమాత్రా చైకా చైకైకనిష్ఠితా ।
ఐంద్రీ హ్యైరావతారూఢా చైహికాముష్మికప్రదా ॥ 26 ॥
ఓంకారా హ్యోషధీ చోతా చోతప్రోతనివాసినీ ।
ఔర్వా హ్యౌషధసంపన్నా ఔపాసనఫలప్రదా ॥ 27 ॥
అండమధ్యస్థితా దేవీ చాఃకారమనురూపిణీ ।
కాత్యాయనీ కాలరాత్రిః కామాక్షీ కామసుందరీ ॥ 28 ॥
కమలా కామినీ కాంతా కామదా కాలకంఠినీ ।
కరికుంభస్తనభరా కరవీరసువాసినీ ॥ 29 ॥
కల్యాణీ కుండలవతీ కురుక్షేత్రనివాసినీ ।
కురువిందదలాకారా కుండలీ కుముదాలయా ॥ 30 ॥
కాలజిహ్వా కరాలాస్యా కాలికా కాలరూపిణీ ।
కమనీయగుణా కాంతిః కలాధారా కుముద్వతీ ॥ 31 ॥
కౌశికీ కమలాకారా కామచారప్రభంజినీ ।
కౌమారీ కరుణాపాంగీ కకువంతా కరిప్రియా ॥ 32 ॥
కేసరీ కేశవనుతా కదంబకుసుమప్రియా ।
కాలిందీ కాలికా కాంచీ కలశోద్భవసంస్తుతా ॥ 33 ॥
కామమాతా క్రతుమతీ కామరూపా కృపావతీ ।
కుమారీ కుండనిలయా కిరాతీ కీరవాహనా ॥ 34 ॥
కైకేయీ కోకిలాలాపా కేతకీ కుసుమప్రియా ।
కమండలుధరా కాలీ కర్మనిర్మూలకారిణీ ॥ 35 ॥
కలహంసగతిః కక్షా కృతకౌతుకమంగలా ।
కస్తూరీతిలకా కంప్రా కరీంద్రగమనా కుహూః ॥ 36 ॥
కర్పూరలేపనా కృష్ణా కపిలా కుహరాశ్రయా ।
కూటస్థా కుధరా కమ్రా కుక్షిస్థాఖిలవిష్టపా ॥ 37 ॥
ఖడ్గఖేటధరా ఖర్వా ఖేచరీ ఖగవాహనా ।
ఖట్వాంగధారిణీ ఖ్యాతా ఖగరాజోపరిస్థితా ॥ 38 ॥
ఖలఘ్నీ ఖండితజరా ఖండాఖ్యానప్రదాయినీ ।
ఖండేందుతిలకా గంగా గణేశగుహపూజితా ॥ 39 ॥
గాయత్రీ గోమతీ గీతా గాంధారీ గానలోలుపా ।
గౌతమీ గామినీ గాధా గంధర్వాప్సరసేవితా ॥ 40 ॥
గోవిందచరణాక్రాంతా గుణత్రయవిభావితా ।
గంధర్వీ గహ్వరీ గోత్రా గిరీశా గహనా గమీ ॥ 41 ॥
గుహావాసా గుణవతీ గురుపాపప్రణాశినీ ।
గుర్వీ గుణవతీ గుహ్యా గోప్తవ్యా గుణదాయినీ ॥ 42 ॥
గిరిజా గుహ్యమాతంగీ గరుడధ్వజవల్లభా ।
గర్వాపహారిణీ గోదా గోకులస్థా గదాధరా ॥ 43 ॥
గోకర్ణనిలయాసక్తా గుహ్యమండలవర్తినీ ।
ఘర్మదా ఘనదా ఘంటా ఘోరదానవమర్దినీ ॥ 44 ॥
ఘృణిమంత్రమయీ ఘోషా ఘనసంపాతదాయినీ ।
ఘంటారవప్రియా ఘ్రాణా ఘృణిసంతుష్టకారిణీ ॥ 45 ॥
ఘనారిమండలా ఘూర్ణా ఘృతాచీ ఘనవేగినీ ।
జ్ఞానధాతుమయీ చర్చా చర్చితా చారుహాసినీ ॥ 46 ॥
చటులా చండికా చిత్రా చిత్రమాల్యవిభూషితా ।
చతుర్భుజా చారుదంతా చాతురీ చరితప్రదా ॥ 47 ॥
చూలికా చిత్రవస్త్రాంతా చంద్రమఃకర్ణకుండలా ।
చంద్రహాసా చారుదాత్రీ చకోరీ చంద్రహాసినీ ॥ 48 ॥
చంద్రికా చంద్రధాత్రీ చ చౌరీ చౌరా చ చండికా ।
చంచద్వాగ్వాదినీ చంద్రచూడా చోరవినాశినీ ॥ 49 ॥
చారుచందనలిప్తాంగీ చంచచ్చామరవీజితా ।
చారుమధ్యా చారుగతిశ్చందిలా చంద్రరూపిణీ ॥ 50 ॥
చారుహోమప్రియా చార్వాచరితా చక్రబాహుకా ।
చంద్రమండలమధ్యస్థా చంద్రమండలదర్పణా ॥ 51 ॥
చక్రవాకస్తనీ చేష్టా చిత్రా చారువిలాసినీ ।
చిత్స్వరూపా చంద్రవతీ చంద్రమాశ్చందనప్రియా ॥ 52 ॥
చోదయిత్రీ చిరప్రజ్ఞా చాతకా చారుహేతుకీ ।
ఛత్రయాతా ఛత్రధరా ఛాయా ఛందఃపరిచ్ఛదా ॥ 53 ॥
ఛాయాదేవీ ఛిద్రనఖా ఛన్నేంద్రియవిసర్పిణీ ।
ఛందోఽనుష్టుప్ప్రతిష్ఠాంతా ఛిద్రోపద్రవభేదినీ ॥ 54 ॥
ఛేదా ఛత్రేశ్వరీ ఛిన్నా ఛురికా ఛేదనప్రియా ।
జననీ జన్మరహితా జాతవేదా జగన్మయీ ॥ 55 ॥
జాహ్నవీ జటిలా జేత్రీ జరామరణవర్జితా ।
జంబూద్వీపవతీ జ్వాలా జయంతీ జలశాలినీ ॥ 56 ॥
జితేంద్రియా జితక్రోధా జితామిత్రా జగత్ప్రియా ।
జాతరూపమయీ జిహ్వా జానకీ జగతీ జరా ॥ 57 ॥
జనిత్రీ జహ్నుతనయా జగత్త్రయహితైషిణీ ।
జ్వాలాముఖీ జపవతీ జ్వరఘ్నీ జితవిష్టపా ॥ 58 ॥
జితాక్రాంతమయీ జ్వాలా జాగ్రతీ జ్వరదేవతా ।
జ్వలంతీ జలదా జ్యేష్ఠా జ్యాఘోషాస్ఫోటదిఙ్ముఖీ ॥ 59 ॥
జంభినీ జృంభణా జృంభా జ్వలన్మాణిక్యకుండలా ।
ఝింఝికా ఝణనిర్ఘోషా ఝంఝామారుతవేగినీ ॥ 60 ॥
ఝల్లరీవాద్యకుశలా ఞరూపా ఞభుజా స్మృతా ।
టంకబాణసమాయుక్తా టంకినీ టంకభేదినీ ॥ 61 ॥
టంకీగణకృతాఘోషా టంకనీయమహోరసా ।
టంకారకారిణీ దేవీ ఠఠశబ్దనినాదినీ ॥ 62 ॥
డామరీ డాకినీ డింభా డుండుమారైకనిర్జితా ।
డామరీతంత్రమార్గస్థా డమడ్డమరునాదినీ ॥ 63 ॥
డిండీరవసహా డింభలసత్క్రీడాపరాయణా ।
ఢుంఢివిఘ్నేశజననీ ఢక్కాహస్తా ఢిలివ్రజా ॥ 64 ॥
నిత్యజ్ఞానా నిరుపమా నిర్గుణా నర్మదా నదీ ।
త్రిగుణా త్రిపదా తంత్రీ తులసీ తరుణా తరుః ॥ 65 ॥
త్రివిక్రమపదాక్రాంతా తురీయపదగామినీ ।
తరుణాదిత్యసంకాశా తామసీ తుహినా తురా ॥ 66 ॥
త్రికాలజ్ఞానసంపన్నా త్రివేణీ చ త్రిలోచనా ।
త్రిశక్తిస్త్రిపురా తుంగా తురంగవదనా తథా ॥ 67 ॥
తిమింగిలగిలా తీవ్రా త్రిస్రోతా తామసాదినీ ।
తంత్రమంత్రవిశేషజ్ఞా తనుమధ్యా త్రివిష్టపా ॥ 68 ॥
త్రిసంధ్యా త్రిస్తనీ తోషాసంస్థా తాలప్రతాపినీ ।
తాటంకినీ తుషారాభా తుహినాచలవాసినీ ॥ 69 ॥
తంతుజాలసమాయుక్తా తారహారావలిప్రియా ।
తిలహోమప్రియా తీర్థా తమాలకుసుమాకృతిః ॥ 70 ॥
తారకా త్రియుతా తన్వీ త్రిశంకుపరివారితా ।
తలోదరీ తిలాభూషా తాటంకప్రియవాదినీ ॥ 71 ॥
త్రిజటా తిత్తిరీ తృష్ణా త్రివిధా తరుణాకృతిః ।
తప్తకాంచనసంకాశా తప్తకాంచనభూషణా ॥ 72 ॥
త్రైయంబకా త్రివర్గా చ త్రికాలజ్ఞానదాయినీ ।
తర్పణా తృప్తిదా తృప్తా తామసీ తుంబురుస్తుతా ॥ 73 ॥
తార్క్ష్యస్థా త్రిగుణాకారా త్రిభంగీ తనువల్లరిః ।
థాత్కారీ థారవా థాంతా దోహినీ దీనవత్సలా ॥ 74 ॥
దానవాంతకరీ దుర్గా దుర్గాసురనిబర్హిణీ ।
దేవరీతిర్దివారాత్రిర్ద్రౌపదీ దుందుభిస్వనా ॥ 75 ॥
దేవయానీ దురావాసా దారిద్ర్యోద్భేదినీ దివా ।
దామోదరప్రియా దీప్తా దిగ్వాసా దిగ్విమోహినీ ॥ 76 ॥
దండకారణ్యనిలయా దండినీ దేవపూజితా ।
దేవవంద్యా దివిషదా ద్వేషిణీ దానవాకృతిః ॥ 77 ॥
దీనానాథస్తుతా దీక్షా దైవతాదిస్వరూపిణీ ।
ధాత్రీ ధనుర్ధరా ధేనుర్ధారిణీ ధర్మచారిణీ ॥ 78 ॥
ధురంధరా ధరాధారా ధనదా ధాన్యదోహినీ ।
ధర్మశీలా ధనాధ్యక్షా ధనుర్వేదవిశారదా ॥ 79 ॥
ధృతిర్ధన్యా ధృతపదా ధర్మరాజప్రియా ధ్రువా ।
ధూమావతీ ధూమకేశీ ధర్మశాస్త్రప్రకాశినీ ॥ 80 ॥
నందా నందప్రియా నిద్రా నృనుతా నందనాత్మికా ।
నర్మదా నలినీ నీలా నీలకంఠసమాశ్రయా ॥ 81 ॥
నారాయణప్రియా నిత్యా నిర్మలా నిర్గుణా నిధిః ।
నిరాధారా నిరుపమా నిత్యశుద్ధా నిరంజనా ॥ 82 ॥
నాదబిందుకలాతీతా నాదబిందుకలాత్మికా ।
నృసింహినీ నగధరా నృపనాగవిభూషితా ॥ 83 ॥
నరకక్లేశశమనీ నారాయణపదోద్భవా ।
నిరవద్యా నిరాకారా నారదప్రియకారిణీ ॥ 84 ॥
నానాజ్యోతిః సమాఖ్యాతా నిధిదా నిర్మలాత్మికా ।
నవసూత్రధరా నీతిర్నిరుపద్రవకారిణీ ॥ 85 ॥
నందజా నవరత్నాఢ్యా నైమిషారణ్యవాసినీ ।
నవనీతప్రియా నారీ నీలజీమూతనిస్వనా ॥ 86 ॥
నిమేషిణీ నదీరూపా నీలగ్రీవా నిశీశ్వరీ ।
నామావలిర్నిశుంభఘ్నీ నాగలోకనివాసినీ ॥ 87 ॥
నవజాంబూనదప్రఖ్యా నాగలోకాధిదేవతా ।
నూపురాక్రాంతచరణా నరచిత్తప్రమోదినీ ॥ 88 ॥
నిమగ్నారక్తనయనా నిర్ఘాతసమనిస్వనా ।
నందనోద్యాననిలయా నిర్వ్యూహోపరిచారిణీ ॥ 89 ॥
పార్వతీ పరమోదారా పరబ్రహ్మాత్మికా పరా ।
పంచకోశవినిర్ముక్తా పంచపాతకనాశినీ ॥ 90 ॥
పరచిత్తవిధానజ్ఞా పంచికా పంచరూపిణీ ।
పూర్ణిమా పరమా ప్రీతిః పరతేజః ప్రకాశినీ ॥ 91 ॥
పురాణీ పౌరుషీ పుణ్యా పుండరీకనిభేక్షణా ।
పాతాలతలనిర్మగ్నా ప్రీతా ప్రీతివివర్ధినీ ॥ 92 ॥
పావనీ పాదసహితా పేశలా పవనాశినీ ।
ప్రజాపతిః పరిశ్రాంతా పర్వతస్తనమండలా ॥ 93 ॥
పద్మప్రియా పద్మసంస్థా పద్మాక్షీ పద్మసంభవా ।
పద్మపత్రా పద్మపదా పద్మినీ ప్రియభాషిణీ ॥ 94 ॥
పశుపాశవినిర్ముక్తా పురంధ్రీ పురవాసినీ ।
పుష్కలా పురుషా పర్వా పారిజాతసుమప్రియా ॥ 95 ॥
పతివ్రతా పవిత్రాంగీ పుష్పహాసపరాయణా ।
ప్రజ్ఞావతీసుతా పౌత్రీ పుత్రపూజ్యా పయస్వినీ ॥ 96 ॥
పట్టిపాశధరా పంక్తిః పితృలోకప్రదాయినీ ।
పురాణీ పుణ్యశీలా చ ప్రణతార్తివినాశినీ ॥ 97 ॥
ప్రద్యుమ్నజననీ పుష్టా పితామహపరిగ్రహా ।
పుండరీకపురావాసా పుండరీకసమాననా ॥ 98 ॥
పృథుజంఘా పృథుభుజా పృథుపాదా పృథూదరీ ।
ప్రవాలశోభా పింగాక్షీ పీతవాసాః ప్రచాపలా ॥ 99 ॥
ప్రసవా పుష్టిదా పుణ్యా ప్రతిష్ఠా ప్రణవాగతిః ।
పంచవర్ణా పంచవాణీ పంచికా పంజరస్థితా ॥ 100 ॥
పరమాయా పరజ్యోతిః పరప్రీతిః పరాగతిః ।
పరాకాష్ఠా పరేశానీ పావనీ పావకద్యుతిః ॥ 101 ॥
పుణ్యభద్రా పరిచ్ఛేద్యా పుష్పహాసా పృథూదరీ ।
పీతాంగీ పీతవసనా పీతశయ్యా పిశాచినీ ॥ 102 ॥
పీతక్రియా పిశాచఘ్నీ పాటలాక్షీ పటుక్రియా ।
పంచభక్షప్రియాచారా పూతనాప్రాణఘాతినీ ॥ 103 ॥
పున్నాగవనమధ్యస్థా పుణ్యతీర్థనిషేవితా ।
పంచాంగీ చ పరాశక్తిః పరమాహ్లాదకారిణీ ॥ 104 ॥
పుష్పకాండస్థితా పూషా పోషితాఖిలవిష్టపా ।
ప్రాణప్రియా పంచశిఖా పన్నగోపరిశాయినీ ॥ 105 ॥
పంచమాత్రాత్మికా పృథ్వీ పథికా పృథుదోహినీ ।
పురాణన్యాయమీమాంసా పాటలీ పుష్పగంధినీ ॥ 106 ॥
పుణ్యప్రజా పారదాత్రీ పరమార్గైకగోచరా ।
ప్రవాలశోభా పూర్ణాశా ప్రణవా పల్లవోదరీ ॥ 107 ॥
ఫలినీ ఫలదా ఫల్గుః ఫూత్కారీ ఫలకాకృతిః ।
ఫణీంద్రభోగశయనా ఫణిమండలమండితా ॥ 108 ॥
బాలబాలా బహుమతా బాలాతపనిభాంశుకా ।
బలభద్రప్రియా వంద్యా బడవా బుద్ధిసంస్తుతా ॥ 109 ॥
బందీదేవీ బిలవతీ బడిశఘ్నీ బలిప్రియా ।
బాంధవీ బోధితా బుద్ధిర్బంధూకకుసుమప్రియా ॥ 110 ॥
బాలభానుప్రభాకారా బ్రాహ్మీ బ్రాహ్మణదేవతా ।
బృహస్పతిస్తుతా బృందా బృందావనవిహారిణీ ॥ 111 ॥
బాలాకినీ బిలాహారా బిలవాసా బహూదకా ।
బహునేత్రా బహుపదా బహుకర్ణావతంసికా ॥ 112 ॥
బహుబాహుయుతా బీజరూపిణీ బహురూపిణీ ।
బిందునాదకలాతీతా బిందునాదస్వరూపిణీ ॥ 113 ॥
బద్ధగోధాంగులిత్రాణా బదర్యాశ్రమవాసినీ ।
బృందారకా బృహత్స్కంధా బృహతీ బాణపాతినీ ॥ 114 ॥
బృందాధ్యక్షా బహునుతా వనితా బహువిక్రమా ।
బద్ధపద్మాసనాసీనా బిల్వపత్రతలస్థితా ॥ 115 ॥
బోధిద్రుమనిజావాసా బడిస్థా బిందుదర్పణా ।
బాలా బాణాసనవతీ బడబానలవేగినీ ॥ 116 ॥
బ్రహ్మాండబహిరంతఃస్థా బ్రహ్మకంకణసూత్రిణీ ।
భవానీ భీషణవతీ భావినీ భయహారిణీ ॥ 117 ॥
భద్రకాలీ భుజంగాక్షీ భారతీ భారతాశయా ।
భైరవీ భీషణాకారా భూతిదా భూతిమాలినీ ॥ 118 ॥
భామినీ భోగనిరతా భద్రదా భూరివిక్రమా ।
భూతవాసా భృగులతా భార్గవీ భూసురార్చితా ॥ 119 ॥
భాగీరథీ భోగవతీ భవనస్థా భిషగ్వరా ।
భామినీ భోగినీ భాషా భవానీ భూరిదక్షిణా ॥ 120 ॥
భర్గాత్మికా భీమవతీ భవబంధవిమోచినీ ।
భజనీయా భూతధాత్రీరంజితా భువనేశ్వరీ ॥ 121 ॥
భుజంగవలయా భీమా భేరుండా భాగధేయినీ ।
మాతా మాయా మధుమతీ మధుజిహ్వా మధుప్రియా ॥ 122 ॥
మహాదేవీ మహాభాగా మాలినీ మీనలోచనా ।
మాయాతీతా మధుమతీ మధుమాంసా మధుద్రవా ॥ 123 ॥
మానవీ మధుసంభూతా మిథిలాపురవాసినీ ।
మధుకైటభసంహర్త్రీ మేదినీ మేఘమాలినీ ॥ 124 ॥
మందోదరీ మహామాయా మైథిలీ మసృణప్రియా ।
మహాలక్ష్మీర్మహాకాలీ మహాకన్యా మహేశ్వరీ ॥ 125 ॥
మాహేంద్రీ మేరుతనయా మందారకుసుమార్చితా ।
మంజుమంజీరచరణా మోక్షదా మంజుభాషిణీ ॥ 126 ॥
మధురద్రావిణీ ముద్రా మలయా మలయాన్వితా ।
మేధా మరకతశ్యామా మాగధీ మేనకాత్మజా ॥ 127 ॥
మహామారీ మహావీరా మహాశ్యామా మనుస్తుతా ।
మాతృకా మిహిరాభాసా ముకుందపదవిక్రమా ॥ 128 ॥
మూలాధారస్థితా ముగ్ధా మణిపూరకవాసినీ ।
మృగాక్షీ మహిషారూఢా మహిషాసురమర్దినీ ॥ 129 ॥
యోగాసనా యోగగమ్యా యోగా యౌవనకాశ్రయా ।
యౌవనీ యుద్ధమధ్యస్థా యమునా యుగధారిణీ ॥ 130 ॥
యక్షిణీ యోగయుక్తా చ యక్షరాజప్రసూతినీ ।
యాత్రా యానవిధానజ్ఞా యదువంశసముద్భవా ॥ 131 ॥
యకారాదిహకారాంతా యాజుషీ యజ్ఞరూపిణీ ।
యామినీ యోగనిరతా యాతుధానభయంకరీ ॥ 132 ॥
రుక్మిణీ రమణీ రామా రేవతీ రేణుకా రతిః ।
రౌద్రీ రౌద్రప్రియాకారా రామమాతా రతిప్రియా ॥ 133 ॥
రోహిణీ రాజ్యదా రేవా రమా రాజీవలోచనా ।
రాకేశీ రూపసంపన్నా రత్నసింహాసనస్థితా ॥ 134 ॥
రక్తమాల్యాంబరధరా రక్తగంధానులేపనా ।
రాజహంససమారూఢా రంభా రక్తబలిప్రియా ॥ 135 ॥
రమణీయయుగాధారా రాజితాఖిలభూతలా ।
రురుచర్మపరీధానా రథినీ రత్నమాలికా ॥ 136 ॥
రోగేశీ రోగశమనీ రావిణీ రోమహర్షిణీ ।
రామచంద్రపదాక్రాంతా రావణచ్ఛేదకారిణీ ॥ 137 ॥
రత్నవస్త్రపరిచ్ఛన్నా రథస్థా రుక్మభూషణా ।
లజ్జాధిదేవతా లోలా లలితా లింగధారిణీ ॥ 138 ॥
లక్ష్మీర్లోలా లుప్తవిషా లోకినీ లోకవిశ్రుతా ।
లజ్జా లంబోదరీ దేవీ లలనా లోకధారిణీ ॥ 139 ॥
వరదా వందితా విద్యా వైష్ణవీ విమలాకృతిః ।
వారాహీ విరజా వర్షా వరలక్ష్మీర్విలాసినీ ॥ 140 ॥
వినతా వ్యోమమధ్యస్థా వారిజాసనసంస్థితా ।
వారుణీ వేణుసంభూతా వీతిహోత్రా విరూపిణీ ॥ 141 ॥
వాయుమండలమధ్యస్థా విష్ణురూపా విధిప్రియా ।
విష్ణుపత్నీ విష్ణుమతీ విశాలాక్షీ వసుంధరా ॥ 142 ॥
వామదేవప్రియా వేలా వజ్రిణీ వసుదోహినీ ।
వేదాక్షరపరీతాంగీ వాజపేయఫలప్రదా ॥ 143 ॥
వాసవీ వామజననీ వైకుంఠనిలయా వరా ।
వ్యాసప్రియా వర్మధరా వాల్మీకిపరిసేవితా ॥ 144 ॥
శాకంభరీ శివా శాంతా శారదా శరణాగతిః ।
శాతోదరీ శుభాచారా శుంభాసురవిమర్దినీ ॥ 145 ॥
శోభావతీ శివాకారా శంకరార్ధశరీరిణీ ।
శోణా శుభాశయా శుభ్రా శిరఃసంధానకారిణీ ॥ 146 ॥
శరావతీ శరానందా శరజ్జ్యోత్స్నా శుభాననా ।
శరభా శూలినీ శుద్ధా శబరీ శుకవాహనా ॥ 147 ॥
శ్రీమతీ శ్రీధరానందా శ్రవణానందదాయినీ ।
శర్వాణీ శర్వరీవంద్యా షడ్భాషా షడృతుప్రియా ॥ 148 ॥
షడాధారస్థితా దేవీ షణ్ముఖప్రియకారిణీ ।
షడంగరూపసుమతీ సురాసురనమస్కృతా ॥ 149 ॥
సరస్వతీ సదాధారా సర్వమంగలకారిణీ ।
సామగానప్రియా సూక్ష్మా సావిత్రీ సామసంభవా ॥ 150 ॥
సర్వావాసా సదానందా సుస్తనీ సాగరాంబరా ।
సర్వైశ్వర్యప్రియా సిద్ధిః సాధుబంధుపరాక్రమా ॥ 151 ॥
సప్తర్షిమండలగతా సోమమండలవాసినీ ।
సర్వజ్ఞా సాంద్రకరుణా సమానాధికవర్జితా ॥ 152 ॥
సర్వోత్తుంగా సంగహీనా సద్గుణా సకలేష్టదా ।
సరధా సూర్యతనయా సుకేశీ సోమసంహతిః ॥ 153 ॥
హిరణ్యవర్ణా హరిణీ హ్రీంకారీ హంసవాహినీ ।
క్షౌమవస్త్రపరీతాంగీ క్షీరాబ్ధితనయా క్షమా ॥ 154 ॥
గాయత్రీ చైవ సావిత్రీ పార్వతీ చ సరస్వతీ ।
వేదగర్భా వరారోహా శ్రీగాయత్రీ పరాంబికా ॥ 155 ॥
ఇతి సాహస్రకం నామ్నాం గాయత్ర్యాశ్చైవ నారద ।
పుణ్యదం సర్వపాపఘ్నం మహాసంపత్తిదాయకమ్ ॥ 156 ॥
ఏవం నామాని గాయత్ర్యాస్తోషోత్పత్తికరాణి హి ।
అష్టమ్యాం చ విశేషేణ పఠితవ్యం ద్విజైః సహ ॥ 157 ॥
జపం కృత్వా హోమ పూజా ధ్యానం కృత్వా విశేషతః ।
యస్మై కస్మై న దాతవ్యం గాయత్ర్యాస్తు విశేషతః ॥ 158 ॥
సుభక్తాయ సుశిష్యాయ వక్తవ్యం భూసురాయ వై ।
భ్రష్టేభ్యః సాధకేభ్యశ్చ బాంధవేభ్యో న దర్శయేత్ ॥ 159 ॥
యద్గృహే లిఖితం శాస్త్రం భయం తస్య న కస్యచిత్ ।
చంచలాపిస్థిరా భూత్వా కమలా తత్ర తిష్ఠతి ॥ 160 ॥
ఇదం రహస్యం పరమం గుహ్యాద్గుహ్యతరం మహత్ ।
పుణ్యప్రదం మనుష్యాణాం దరిద్రాణాం నిధిప్రదమ్ ॥ 161 ॥
మోక్షప్రదం ముముక్షూణాం కామినాం సర్వకామదమ్ ।
రోగాద్వై ముచ్యతే రోగీ బద్ధో ముచ్యేత బంధనాత్ ॥ 162 ॥
బ్రహ్మహత్యా సురాపానం సువర్ణస్తేయినో నరాః ।
గురుతల్పగతో వాపి పాతకాన్ముచ్యతే సకృత్ ॥ 163 ॥
అసత్ప్రతిగ్రహాచ్చైవాఽభక్ష్యభక్షాద్విశేషతః ।
పాఖండానృతముఖ్యేభ్యః పఠనాదేవ ముచ్యతే ॥ 164 ॥
ఇదం రహస్యమమలం మయోక్తం పద్మజోద్భవ ।
బ్రహ్మసాయుజ్యదం నౄణాం సత్యం సత్యం న సంశయః ॥ 165 ॥
ఇతి శ్రీదేవీభాగవతే మహాపురాణే ద్వాదశస్కంధే గాయత్రీసహస్రనామ స్తోత్ర కథనం నామ షష్ఠోఽధ్యాయః ॥