కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే షష్ఠః ప్రశ్నః – యాజమానకాణ్డం
ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥
స-న్త్వా॑ సిఞ్చామి॒ యజు॑షా ప్ర॒జామాయు॒ర్ధన॑-ఞ్చ । బృహ॒స్పతి॑ప్రసూతో॒ యజ॑మాన ఇ॒హ మా రి॑షత్ ॥ ఆజ్య॑మసి స॒త్యమ॑సి స॒త్యస్యాద్ధ్య॑ఖ్షమసి హ॒విర॑సి వైశ్వాన॒రం-వైఀ᳚శ్వదే॒వ-ముత్పూ॑తశుష్మగ్ం స॒త్యౌజా॒-స్సహో॑-ఽసి॒ సహ॑మానమసి॒ సహ॒స్వారా॑తీ॒-స్సహ॑స్వారాతీయ॒త-స్సహ॑స్వ॒ పృత॑నా॒-స్సహ॑స్వ పృతన్య॒తః । స॒హస్ర॑వీర్యమసి॒ తన్మా॑ జి॒న్వాజ్య॒స్యాజ్య॑మసి స॒త్యస్య॑ స॒త్యమ॑సి స॒త్యాయు॑- [స॒త్యాయుః॑, అ॒సి॒ స॒త్యశు॑ష్మమసి] 1
-రసి స॒త్యశు॑ష్మమసి స॒త్యేన॑ త్వా॒-ఽభి ఘా॑రయామి॒ తస్య॑ తే భఖ్షీయ పఞ్చా॒నా-న్త్వా॒ వాతా॑నాం-యఀ॒న్త్రాయ॑ ధ॒ర్త్రాయ॑ గృహ్ణామి పఞ్చా॒నా-న్త్వ॑ర్తూ॒నాం-యఀ॒న్త్రాయ॑ ధ॒ర్త్రాయ॑ గృహ్ణామి పఞ్చా॒నా-న్త్వా॑ ది॒శాం-యఀ॒న్త్రాయ॑ ధ॒ర్త్రాయ॑ గృహ్ణామి పఞ్చా॒నా-న్త్వా॑ పఞ్చజ॒నానాం᳚-యఀ॒న్త్రాయ॑ ధ॒ర్త్రాయ॑ గృహ్ణామి చ॒రోస్త్వా॒ పఞ్చ॑బిలస్య య॒న్త్రాయ॑ ధ॒ర్త్రాయ॑ గృహ్ణామి॒ బ్రహ్మ॑ణస్త్వా॒ తేజ॑సే య॒న్త్రాయ॑ ధ॒ర్త్రాయ॑ గృహ్ణామి ఖ్ష॒త్రస్య॒ త్వౌజ॑సే య॒న్త్రాయ॑ [ ] 2
ధ॒ర్త్రాయ॑ గృహ్ణామి వి॒శే త్వా॑ య॒న్త్రాయ॑ ధ॒ర్త్రాయ॑ గృహ్ణామి సు॒వీర్యా॑య త్వా గృహ్ణామి సుప్రజా॒స్త్వాయ॑ త్వా గృహ్ణామి రా॒యస్పోషా॑య త్వా గృహ్ణామి బ్రహ్మవర్చ॒సాయ॑ త్వా గృహ్ణామి॒ భూర॒స్మాకగ్ం॑ హ॒విర్దే॒వానా॑-మా॒శిషో॒ యజ॑మానస్య దే॒వానా᳚-న్త్వా దే॒వతా᳚భ్యో గృహ్ణామి॒ కామా॑య త్వా గృహ్ణామి ॥ 3 ॥
(స॒త్యాయు॒-రోజ॑సే య॒న్త్రాయ॒-త్రయ॑స్త్రిగ్ంశచ్చ) (అ. 1)
ధ్రు॒వో॑-ఽసి ధ్రు॒వో॑-ఽహగ్ం స॑జా॒తేషు॑ భూయాస॒-న్ధీర॒శ్చేత్తా॑ వసు॒విదు॒గ్రో᳚-ఽస్యు॒గ్రో॑-ఽహగ్ం స॑జా॒తేషు॑ భూయాస-ము॒గ్రశ్చేత్తా॑ వసు॒విద॑భి॒-భూర॑స్యభి॒భూర॒హగ్ం స॑జా॒తేషు॑ భూయాసమభి॒భూశ్చేత్తా॑ వసు॒వి-ద్యు॒నజ్మి॑ త్వా॒ బ్రహ్మ॑ణా॒ దైవ్యే॑న హ॒వ్యాయా॒స్మై వోఢ॒వే జా॑తవేదః ॥ ఇన్ధా॑నాస్త్వా సుప్ర॒జస॑-స్సు॒వీరా॒ జ్యోగ్జీ॑వేమ బలి॒హృతో॑ వ॒య-న్తే᳚ ॥ యన్మే॑ అగ్నే అ॒స్య య॒జ్ఞస్య॒ రిష్యా॒- [రిష్యా᳚త్, ద్యద్వా॒] 4
-ద్యద్వా॒ స్కన్దా॒-దాజ్య॑స్యో॒త వి॑ష్ణో । తేన॑ హన్మి స॒పత్న॑-న్దుర్మరా॒యుమైన॑-న్దధామి॒ నిర్-ఋ॑త్యా ఉ॒పస్థే᳚ । భూ-ర్భువ॒-స్సువ॒రుచ్ఛు॑ష్మో అగ్నే॒ యజ॑మానాయైధి॒ నిశు॑ష్మో అభి॒దాస॑తే । అగ్నే॒ దేవే᳚ద్ధ॒ మన్వి॑ద్ధ॒ మన్ద్ర॑జి॒హ్వా-మ॑ర్త్యస్య తే హోతర్మూ॒ర్ధన్నా జి॑ఘర్మి రా॒యస్పోషా॑య సుప్రజా॒స్త్వాయ॑ సు॒వీర్యా॑య॒ మనో॑-ఽసి ప్రాజాప॒త్య-మ్మన॑సా మా భూ॒తేనా వి॑శ॒ వాగ॑స్యై॒న్ద్రీ స॑పత్న॒ఖ్షయ॑ణీ [ ] 5
వా॒చా మే᳚న్ద్రి॒యేణా వి॑శ వస॒న్తమృ॑తూ॒నా-మ్ప్రీ॑ణామి॒ స మా᳚ ప్రీ॒తః ప్రీ॑ణాతు గ్రీ॒ష్మమృ॑తూ॒నా-మ్ప్రీ॑ణామి॒ స మా᳚ ప్రీ॒తః ప్రీ॑ణాతు వ॒ర్॒షా ఋ॑తూ॒నా-మ్ప్రీ॑ణామి॒ తా మా᳚ ప్రీ॒తాః ప్రీ॑ణన్తు శ॒రద॑మృతూ॒నా-మ్ప్రీ॑ణామి॒ సా మా᳚ ప్రీ॒తా ప్రీ॑ణాతు హేమన్తశిశి॒రావృ॑తూ॒నా-మ్ప్రీ॑ణామి॒ తౌ మా᳚ ప్రీ॒తౌ ప్రీ॑ణీతా-మ॒గ్నీషోమ॑యో-ర॒హ-న్దే॑వయ॒జ్యయా॒ చఖ్షు॑ష్మా-న్భూయాసమ॒గ్నేర॒హ-న్దే॑వయ॒జ్యయా᳚-ఽన్నా॒దో భూ॑యాస॒- [భూ॑యాసమ్, దబ్ధి॑ర॒స్యద॑బ్ధో] 6
-న్దబ్ధి॑ర॒స్యద॑బ్ధో భూయాసమ॒ము-న్ద॑భేయ-మ॒గ్నీషోమ॑యో-ర॒హ-న్దే॑వయ॒జ్యయా॑ వృత్ర॒హా భూ॑యాసమిన్ద్రాగ్ని॒యోర॒హ-న్దే॑వయ॒జ్యయే᳚న్ద్రియా॒వ్య॑న్నా॒దో భూ॑యాస॒మిన్ద్ర॑స్యా॒-ఽహ-న్దే॑వయ॒జ్యయే᳚న్ద్రియా॒వీ భూ॑యాస-మ్మహే॒న్ద్రస్యా॒-ఽహ-న్దే॑వయ॒జ్యయా॑ జే॒మాన॑-మ్మహి॒మాన॑-ఙ్గమేయమ॒గ్నే-స్స్వి॑ష్ట॒కృతో॒-ఽహ-న్దే॑వయ॒జ్యయా ఽఽయు॑ష్మాన్. య॒జ్ఞేన॑ ప్రతి॒ష్ఠా-ఙ్గ॑మేయమ్ ॥ 7 ॥
(రిష్యా᳚-థ్సపత్న॒ఖ్షయ॑ణ్య-న్నా॒దో భూ॑యాస॒గ్ం॒-షట్త్రిగ్ం॑శచ్చ) (అ. 2)
అ॒గ్నిర్మా॒ దురి॑ష్టా-త్పాతు సవి॒తా-ఽఘశగ్ం॑సా॒ద్యో మే-ఽన్తి॑ దూ॒రే॑-ఽరాతీ॒యతి॒ తమే॒తేన॑ జేష॒గ్ం॒ సురూ॑పవర్షవర్ణ॒ ఏహీ॒మా-న్భ॒ద్రా-న్దుర్యాగ్ం॑ అ॒భ్యేహి॒ మామను॑వ్రతా॒ న్యు॑ శీ॒ర్॒షాణి॑ మృఢ్వ॒మిడ॒ ఏహ్యది॑త॒ ఏహి॒ సర॑స్వ॒త్యేహి॒ రన్తి॑రసి॒ రమ॑తిరసి సూ॒నర్య॑సి॒ జుష్టే॒ జుష్టి॑-న్తే-ఽశీ॒యోప॑హూత ఉపహ॒వ- [ఉపహ॒వమ్, తే॒-ఽశీ॒య॒ సా ] 8
-న్తే॑-ఽశీయ॒ సా మే॑ స॒త్యా-ఽఽశీర॒స్య య॒జ్ఞస్య॑ భూయా॒దరే॑డతా॒ మన॑సా॒ తచ్ఛ॑కేయం-యఀ॒జ్ఞో దివగ్ం॑ రోహతు య॒జ్ఞో దివ॑-ఙ్గచ్ఛతు॒ యో దే॑వ॒యానః॒ పన్థా॒స్తేన॑ య॒జ్ఞో దే॒వాగ్ం అప్యే᳚త్వ॒స్మాస్విన్ద్ర॑ ఇన్ద్రి॒య-న్ద॑ధాత్వ॒స్మాన్రాయ॑ ఉ॒త య॒జ్ఞా-స్స॑చన్తామ॒స్మాసు॑ సన్త్వా॒శిష॒-స్సా నః॑ ప్రి॒యా సు॒ప్రతూ᳚ర్తిర్మ॒ఘోనీ॒ జుష్టి॑రసి జు॒షస్వ॑ నో॒ జుష్టా॑ నో- [జుష్టా॑ నః, అ॒సి॒ జుష్టి॑-న్తే] 9
-ఽసి॒ జుష్టి॑-న్తే గమేయ॒-మ్మనో॒ జ్యోతి॑-ర్జుషతా॒మాజ్యం॒-విఀచ్ఛి॑న్నం-యఀ॒జ్ఞగ్ం సమి॒మ-న్ద॑ధాతు । బృహ॒స్పతి॑-స్తనుతామి॒మన్నో॒ విశ్వే॑ దే॒వా ఇ॒హ మా॑దయన్తామ్ ॥ బ్రద్ధ్న॒ పిన్వ॑స్వ॒ దద॑తో మే॒ మా ఖ్షా॑యి కుర్వ॒తో మే॒ మోప॑ దస-త్ప్ర॒జాప॑తే-ర్భా॒గో᳚-ఽస్యూర్జ॑స్వా॒-న్పయ॑స్వా-న్ప్రాణాపా॒నౌ మే॑ పాహి సమానవ్యా॒నౌ మే॑ పాహ్యుదానవ్యా॒నౌ మే॑ పా॒హ్యఖ్షి॑తో॒-ఽస్యఖ్షి॑త్యై త్వా॒ మా మే᳚ ఖ్షేష్ఠా అ॒ముత్రా॒ముష్మి॑-ల్లోఀ॒కే ॥ 10 ॥
(ఉ॒ప॒హ॒వం-జుష్టా॑న-స్త్వా॒ షట్ చ॑) (అ. 3)
బ॒ర్॒హిషో॒-ఽహ-న్దే॑వయ॒జ్యయా᳚ ప్ర॒జావా᳚-న్భూయాస॒-న్నరా॒శగ్ంస॑స్యా॒హ-న్దే॑వయ॒జ్యయా॑ పశు॒మా-న్భూ॑యాసమ॒గ్నే-స్స్వి॑ష్ట॒కృతో॒-ఽహ-న్దే॑వయ॒జ్యయా-ఽఽయు॑ష్మాన్. య॒జ్ఞేన॑ ప్రతి॒ష్ఠా-ఙ్గ॑మేయమ॒గ్నేర॒హ-ముజ్జి॑తి॒-మనూజ్జే॑ష॒గ్ం॒ సోమ॑స్యా॒హ – ముజ్జి॑తి॒-మనూజ్జే॑షమ॒గ్నేర॒హ-ముజ్జి॑తి॒-మనూజ్జే॑ష-మ॒గ్నీషోమ॑యోర॒హ-ముజ్జి॑తి॒-మనూజ్జే॑ష-మిన్ద్రాగ్ని॒యోర॒హ-ముజ్జి॑తి॒-మనూజ్జే॑ష॒-మిన్ద్ర॑స్యా॒-ఽహ- [-మిన్ద్ర॑స్యా॒-ఽహమ్, ఉజ్జి॑తి॒మనూజ్జే॑షం] 11
-ముజ్జి॑తి॒మనూజ్జే॑ష-మ్మహే॒న్ద్రస్యా॒హముజ్జి॑తి॒- మనూజ్జే॑షమ॒గ్నే-స్స్వి॑ష్ట॒కృతో॒-ఽహ ముజ్జి॑తి॒-మనూజ్జే॑షం॒-వాఀజ॑స్య మా ప్రస॒వేనో᳚-ద్గ్రా॒భేణోద॑గ్రభీత్ । అథా॑ స॒పత్నా॒గ్ం॒ ఇన్ద్రో॑ మే నిగ్రా॒భేణాధ॑రాగ్ం అకః ॥ ఉ॒ద్గ్రా॒భ-ఞ్చ॑ నిగ్రా॒భ-ఞ్చ॒ బ్రహ్మ॑ దే॒వా అ॑వీవృధన్న్ । అథా॑ స॒పత్నా॑నిన్ద్రా॒గ్నీ మే॑ విషూ॒చీనా॒న్ వ్య॑స్యతామ్ ॥ ఏమా అ॑గ్మన్నా॒శిషో॒ దోహ॑కామా॒ ఇన్ద్ర॑వన్తో [ఇన్ద్ర॑వన్తః, వ॒నా॒మ॒హే॒ ధు॒ఖ్షీ॒మహి॑] 12
వనామహే ధుఖ్షీ॒మహి॑ ప్ర॒జామిష᳚మ్ ॥ రోహి॑తేన త్వా॒-ఽగ్ని-ర్దే॒వతా᳚-ఙ్గమయతు॒ హరి॑భ్యా॒-న్త్వేన్ద్రో॑ దే॒వతా᳚-ఙ్గమయ॒త్వేత॑శేన త్వా॒ సూర్యో॑ దే॒వతా᳚-ఙ్గమయతు॒ వి తే॑ ముఞ్చామి రశ॒నా వి ర॒శ్మీన్ వి యోక్త్రా॒ యాని॑ పరి॒చర్త॑నాని ధ॒త్తాద॒స్మాసు॒ ద్రవి॑ణం॒-యఀచ్చ॑ భ॒ద్ర-మ్ప్ర ణో᳚ బ్రూతా-ద్భాగ॒ధా-న్దే॒వతా॑సు ॥ విష్ణో᳚-శ్శం॒యోఀర॒హ-న్దే॑వయ॒జ్యయా॑ య॒జ్ఞేన॑ ప్రతి॒ష్ఠా-ఙ్గ॑మేయ॒గ్ం॒ సోమ॑స్యా॒హ-న్దే॑వయ॒జ్యయా॑ [దే॑వయ॒జ్యయా᳚, సు॒రేతా॒] 13
సు॒రేతా॒ రేతో॑ ధిషీయ॒ త్వష్టు॑ర॒హ-న్దే॑వయ॒జ్యయా॑ పశూ॒నాగ్ం రూ॒ప-మ్పు॑షేయ-న్దే॒వానా॒-మ్పత్నీ॑ర॒గ్ని-ర్గృ॒హప॑తి-ర్య॒జ్ఞస్య॑ మిథు॒న-న్తయో॑ర॒హ-న్దే॑వయ॒జ్యయా॑ మిథు॒నేన॒ ప్రభూ॑యాసం-వేఀ॒దో॑-ఽసి॒ విత్తి॑రసి వి॒దేయ॒ కర్మా॑-ఽసి క॒రుణ॑మసి క్రి॒యాసగ్ం॑ స॒నిర॑సి సని॒తా-ఽసి॑ స॒నేయ॑-ఙ్ఘృ॒తవ॑న్త-ఙ్కులా॒యినగ్ం॑ రా॒యస్పోషగ్ం॑ సహ॒స్రిణం॑-వేఀ॒దో ద॑దాతు వా॒జిన᳚మ్ ॥ 14 ॥
(ఇన్ద్ర॑స్యా॒హ-మిన్ద్ర॑వన్తః॒-సోమ॑స్యా॒హ-న్దే॑వయ॒జ్యయా॒-చతు॑శ్చత్వారిగ్ంశచ్చ) (అ. 4)
ఆ ప్యా॑యతా-న్ధ్రు॒వా ఘృ॒తేన॑ య॒జ్ఞంయఀ ॑జ్ఞ॒-మ్ప్రతి॑ దేవ॒యద్భ్యః॑ । సూ॒ర్యాయా॒ ఊధో-ఽది॑త్యా ఉ॒పస్థ॑ ఉ॒రుధా॑రా పృథి॒వీ య॒జ్ఞే అ॒స్మిన్న్ ॥ ప్ర॒జాప॑తే-ర్వి॒భాన్నామ॑ లో॒కస్తస్మిగ్గ్॑స్త్వా దధామి స॒హ యజ॑మానేన॒ సద॑సి॒ సన్మే॑ భూయా॒-స్సర్వ॑మసి॒ సర్వ॑-మ్మే భూయాః పూ॒ర్ణమ॑సి పూ॒ర్ణ-మ్మే॑ భూయా॒ అఖ్షి॑తమసి॒ మా మే᳚ ఖ్షేష్ఠాః॒ ప్రాచ్యా᳚-న్ది॒శి దే॒వా ఋ॒త్విజో॑ మార్జయన్తా॒-న్దఖ్షి॑ణాయా- [దఖ్షి॑ణాయామ్, ది॒శి] 15
న్ది॒శి మాసాః᳚ పి॒తరో॑ మార్జయన్తా-మ్ప్ర॒తీచ్యా᳚-న్ది॒శి గృ॒హాః ప॒శవో॑ మార్జయన్తా॒ముదీ᳚చ్యా-న్ది॒శ్యాప॒ ఓష॑ధయో॒ వన॒స్పత॑యో మార్జయన్తామూ॒ర్ధ్వాయా᳚-న్ది॒శి య॒జ్ఞ-స్సం॑వఀథ్స॒రో య॒జ్ఞప॑తి-ర్మార్జయన్తాం॒-విఀష్ణోః॒ క్రమో᳚-ఽస్యభిమాతి॒హా గా॑య॒త్రేణ॒ ఛన్ద॑సా పృథి॒వీమను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణోః॒ క్రమో᳚-ఽస్యభిశస్తి॒హా త్రైష్టు॑భేన॒ ఛన్ద॑సా॒ ఽన్తరి॑ఖ్ష॒మను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణోః॒ క్రమో᳚-ఽస్యరాతీయ॒తో హ॒న్తా జాగ॑తేన॒ ఛన్ద॑సా॒ దివ॒మను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణోః॒ క్రమో॑-ఽసి శత్రూయ॒తో హ॒న్తా-ఽఽను॑ష్టుభేన॒ ఛన్ద॑సా॒ దిశో-ఽను॒ వి క్ర॑మే॒ నిర్భ॑క్త॒-స్స య-న్ద్వి॒ష్మః ॥ 16 ॥
(దఖ్షి॑ణాయా – మ॒న్తరి॑ఖ్ష॒మను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణో॒- రేకా॒న్నత్రి॒గ్ం॒శచ్చ॑) (అ. 5)
అగ॑న్మ॒ సువ॒-స్సువ॑రగన్మ స॒న్దృశ॑స్తే॒ మా ఛి॑థ్సి॒ యత్తే॒ తప॒స్తస్మై॑ తే॒ మా-ఽఽ వృ॑ఖ్షి సు॒భూర॑సి॒ శ్రేష్ఠో॑ రశ్మీ॒నామా॑యు॒ర్ధా అ॒స్యాయు॑ర్మే ధేహి వర్చో॒ధా అ॑సి॒ వర్చో॒ మయి॑ ధేహీ॒దమ॒హమ॒ము-మ్భ్రాతృ॑వ్యమా॒భ్యో ది॒గ్భ్యో᳚-ఽస్యై ది॒వో᳚-ఽస్మాద॒న్తరి॑ఖ్షాద॒స్యై పృ॑థి॒వ్యా అ॒స్మాద॒న్నాద్యా॒న్నిర్భ॑జామి॒ నిర్భ॑క్త॒-స్స య-న్ద్వి॒ష్మః ॥ 17 ॥
స-ఞ్జ్యోతి॑షా-ఽభూవమై॒న్ద్రీ-మా॒వృత॑-మ॒న్వావ॑ర్తే॒ సమ॒హ-మ్ప్ర॒జయా॒ స-మ్మయా᳚ ప్ర॒జా సమ॒హగ్ం రా॒యస్పోషే॑ణ॒ స-మ్మయా॑ రా॒యస్పోష॒-స్సమి॑ద్ధో అగ్నే మే దీదిహి సమే॒ద్ధా తే॑ అగ్నే దీద్యాసం॒-వఀసు॑మాన్. య॒జ్ఞో వసీ॑యా-న్భూయాస॒మగ్న॒ ఆయూగ్ం॑షి పవస॒ ఆ సు॒వోర్జ॒మిష॑-ఞ్చ నః । ఆ॒రే బా॑ధస్వ దు॒చ్ఛునా᳚మ్ ॥ అగ్నే॒ పవ॑స్వ॒ స్వపా॑ అ॒స్మే వర్చ॑-స్సు॒వీర్య᳚మ్ ॥ 18 ॥
దధ॒త్పోషగ్ం॑ ర॒యి-మ్మయి॑ । అగ్నే॑ గృహపతే సుగృహప॒తిర॒హ-న్త్వయా॑ గృ॒హప॑తినా భూయాసగ్ం సుగృహప॒తిర్మయా॒ త్వ-ఙ్గృ॒హప॑తినా భూయా-శ్శ॒తగ్ం హిమా॒స్తామా॒శిష॒మా శా॑సే॒ తన్త॑వే॒ జ్యోతి॑ష్మతీ॒-న్తామా॒శిష॒మా శా॑సే॒-ఽముష్మై॒ జ్యోతి॑ష్మతీ॒-ఙ్కస్త్వా॑ యునక్తి॒ స త్వా॒ విము॑ఞ్చ॒త్వగ్నే᳚ వ్రతపతే వ్ర॒తమ॑చారిష॒-న్తద॑శక॒-న్తన్మే॑-ఽరాధి య॒జ్ఞో బ॑భూవ॒ స ఆ [స ఆ, బ॒భూ॒వ॒ స] 19
బ॑భూవ॒ స ప్రజ॑జ్ఞే॒ స వా॑వృధే । స దే॒వానా॒మధి॑పతి-ర్బభూవ॒ సో అ॒స్మాగ్ం అధి॑పతీన్ కరోతు వ॒యగ్గ్ స్యా॑మ॒ పత॑యో రయీ॒ణామ్ ॥ గోమాగ్ం॑ అ॒గ్నే-ఽవి॑మాగ్ం అ॒శ్వీ య॒జ్ఞో నృ॒వథ్స॑ఖా॒ సద॒మిద॑ప్రమృ॒ష్యః ।ఇడా॑వాగ్ం ఏ॒షో అ॑సుర ప్ర॒జావా᳚-న్దీ॒ర్ఘో ర॒యిః పృ॑థుబు॒ద్ధ్న-స్స॒భావాన్॑ ॥ 20 ॥
(ద్వి॒ష్మః-సు॒వీర్య॒గ్ం॒-స ఆ-పఞ్చ॑త్రిగ్ంశచ్చ) (అ. 6)
యథా॒ వై స॑మృతసో॒మా ఏ॒వం-వాఀ ఏ॒తే స॑మృతయ॒జ్ఞా యద్ద॑ర్శపూర్ణమా॒సౌ కస్య॒ వా-ఽహ॑ దే॒వా య॒జ్ఞమా॒గచ్ఛ॑న్తి॒ కస్య॑ వా॒ న బ॑హూ॒నాం-యఀజ॑మానానాం॒-యోఀ వై దే॒వతాః॒ పూర్వః॑ పరిగృ॒హ్ణాతి॒ స ఏ॑నా॒-శ్శ్వో భూ॒తే య॑జత ఏ॒తద్వై దే॒వానా॑-మా॒యత॑నం॒-యఀదా॑హవ॒నీయో᳚-ఽన్త॒రా-ఽగ్నీ ప॑శూ॒నా-ఙ్గార్హ॑పత్యో మను॒ష్యా॑ణా-మన్వాహార్య॒పచ॑నః పితృ॒ణామ॒గ్ని-ఙ్గృ॑హ్ణాతి॒ స్వ ఏ॒వాయత॑నే దే॒వతాః॒ పరి॑ [దే॒వతాః॒ పరి॑, గృ॒హ్ణా॒తి॒ తా-శ్శ్వో] 21
గృహ్ణాతి॒ తా-శ్శ్వో భూ॒తే య॑జతే వ్ర॒తేన॒ వై మేద్ధ్యో॒ -ఽగ్ని-ర్వ్ర॒తప॑తి-ర్బ్రాహ్మ॒ణో వ్ర॑త॒భృ-ద్వ్ర॒త-ము॑పై॒ష్య-న్బ్రూ॑యా॒దగ్నే᳚ వ్రతపతే వ్ర॒త-ఞ్చ॑రిష్యా॒మీత్య॒గ్ని-ర్వై దే॒వానాం᳚-వ్రఀ॒తప॑తి॒స్తస్మా॑ ఏ॒వ ప్ర॑తి॒ప్రోచ్య॑ వ్ర॒తమా ల॑భతే బ॒ర్॒హిషా॑ పూ॒ర్ణమా॑సే వ్ర॒తముపై॑తి వ॒థ్సైర॑మావా॒స్యా॑యామే॒తద్ధ్యే॑తయో॑-రా॒యత॑నముప॒స్తీర్యః॒ పూర్వ॑శ్చా॒గ్నిరప॑ర॒శ్చేత్యా॑హు-ర్మను॒ష్యా॑ [-ర్మను॒ష్యాః᳚, ఇన్న్వా] 22
ఇన్న్వా ఉప॑స్తీర్ణ-మి॒చ్ఛన్తి॒ కిము॑ దే॒వా యేషా॒-న్నవా॑వసాన॒-ముపా᳚స్మి॒ఞ్ఛ్వో య॒ఖ్ష్యమా॑ణే దే॒వతా॑ వసన్తి॒ య ఏ॒వం-విఀ॒ద్వాన॒గ్ని-ము॑పస్తృ॒ణాతి॒ యజ॑మానేన గ్రా॒మ్యాశ్చ॑ ప॒శవో॑-ఽవ॒రుద్ధ్యా॑ ఆర॒ణ్యాశ్చేత్యా॑హు॒-ర్య-ద్గ్రా॒మ్యాను॑ప॒వస॑తి॒ తేన॑ గ్రా॒మ్యానవ॑ రున్ధే॒ యదా॑ర॒ణ్యస్యా॒-ఽశ్ఞాతి॒ తేనా॑ర॒ణ్యాన్. యదనా᳚శ్వా-నుప॒వసే᳚-త్పితృదేవ॒త్య॑-స్స్యాదార॒ణ్యస్యా᳚-శ్ఞాతీన్ద్రి॒యం- [శ్ఞాతీన్ద్రి॒యమ్, వా ఆ॑ర॒ణ్యం-] 23
-వాఀ ఆ॑ర॒ణ్య-మి॑న్ద్రి॒య-మే॒వా-ఽఽత్మ-న్ధ॑త్తే॒ యదనా᳚శ్వా-నుప॒వసే॒-త్ఖ్షోధు॑క-స్స్యా॒ద్య-ద॑శ్ఞీ॒యాద్రు॒-ద్రో᳚-ఽస్య ప॒శూన॒భి మ॑న్యేతా॒-ఽపో᳚-ఽశ్ఞాతి॒ తన్నేవా॑శి॒త-న్నేవా-ఽన॑శిత॒-న్న ఖ్షోధు॑కో॒ భవ॑తి॒ నాస్య॑ రు॒ద్రః ప॒శూన॒భి మ॑న్యతే॒ వజ్రో॒ వై య॒జ్ఞః, ఖ్షు-త్ఖలు॒ వై మ॑ను॒ష్య॑స్య॒ భ్రాతృ॑వ్యో॒ యదనా᳚-ఽశ్వానుప॒వస॑తి॒ వజ్రే॑ణై॒వ సా॒ఖ్షా-త్ఖ్షుధ॒-మ్భ్రాతృ॑వ్యగ్ం హన్తి ॥ 24 ॥
(పరి॑-మను॒ష్యా॑-ఇన్ద్రి॒యగ్ం-సా॒ఖ్షాత్-త్రీణి॑ చ) (అ. 7)
యో వై శ్ర॒ద్ధామనా॑రభ్య య॒జ్ఞేన॒ యజ॑తే॒ నాస్యే॒ష్టాయ॒ శ్రద్ద॑ధతే॒-ఽపః ప్ర ణ॑యతి శ్ర॒ద్ధా వా ఆప॑-శ్శ్ర॒ద్ధామే॒వా-ఽఽరభ్య॑ య॒జ్ఞేన॑ యజత ఉ॒భయే᳚-ఽస్య దేవమను॒ష్యా ఇ॒ష్టాయ॒ శ్రద్ద॑ధతే॒ తదా॑హు॒రతి॒ వా ఏ॒తా వర్త్ర॑-న్నేద॒న్త్యతి॒ వాచ॒-మ్మనో॒ వావైతా నాతి॑ నేద॒న్తీతి॒ మన॑సా॒ ప్ర ణ॑యతీ॒యం-వైఀ మనో॒- [మనః॑, అ॒నయై॒వైనాః॒] 25
-ఽనయై॒వైనాః॒ ప్ర ణ॑య॒త్య-స్క॑న్నహవి-ర్భవతి॒ య ఏ॒వం-వేఀద॑ యజ్ఞాయు॒ధాని॒ స-మ్భ॑రతి య॒జ్ఞో వై య॑జ్ఞాయు॒ధాని॑ య॒జ్ఞమే॒వ తథ్స-మ్భ॑రతి॒ యదేక॑మేకగ్ం స॒మ్భరే᳚త్-పితృదేవ॒త్యా॑ని స్యు॒ర్య-థ్స॒హ సర్వా॑ణి మాను॒షాణి॒ ద్వేద్వే॒ సమ్భ॑రతి యాజ్యానువా॒క్య॑యోరే॒వ రూ॒ప-ఙ్క॑రో॒త్యథో॑ మిథు॒నమే॒వయో వై దశ॑ యజ్ఞాయు॒ధాని॒ వేద॑ ముఖ॒తో᳚-ఽస్య య॒జ్ఞః క॑ల్పతే॒ స్ఫ్య- [క॑ల్పతే॒ స్ఫ్యః, చ॒ క॒పాలా॑ని] 26
-శ్చ॑ క॒పాలా॑ని చాగ్నిహోత్ర॒హవ॑ణీ చ॒ శూర్ప॑-ఞ్చ కృష్ణాజి॒న-ఞ్చ॒ శమ్యా॑ చో॒లూఖ॑ల-ఞ్చ॒ ముస॑ల-ఞ్చ దృ॒షచ్చోప॑లా చై॒తాని॒ వై దశ॑ యజ్ఞాయు॒ధాని॒ య ఏ॒వం-వేఀద॑ ముఖ॒తో᳚-ఽస్య య॒జ్ఞః క॑ల్పతే॒ యో వై దే॒వేభ్యః॑ ప్రతి॒ప్రోచ్య॑ య॒జ్ఞేన॒ యజ॑తే జు॒షన్తే᳚-ఽస్య దే॒వా హ॒వ్యగ్ం హ॒వి-ర్ని॑రు॒ప్యమా॑ణమ॒భి మ॑న్త్రయేతా॒-ఽగ్నిగ్ం హోతా॑రమి॒హ తగ్ం హు॑వ॒ ఇతి॑ [ ] 27
దే॒వేభ్య॑ ఏ॒వ ప్ర॑తి॒ప్రోచ్య॑ య॒జ్ఞేన॑ యజతే జు॒షన్తే᳚-ఽస్య దే॒వా హ॒వ్యమే॒ష వై య॒జ్ఞస్య॒ గ్రహో॑ గృహీ॒త్వైవ య॒జ్ఞేన॑ యజతే॒ తదు॑ది॒త్వా వాచం॑-యఀచ్ఛతి య॒జ్ఞస్య॒ ధృత్యా॒ అథో॒ మన॑సా॒ వై ప్ర॒జాప॑తి-ర్య॒జ్ఞమ॑తనుత॒ మన॑సై॒వ త-ద్య॒జ్ఞ-న్త॑నుతే॒ రఖ్ష॑సా॒-మన॑న్వవచారాయ॒ యో వై య॒జ్ఞం-యోఀగ॒ ఆగ॑తే యు॒నక్తి॑ యు॒ఙ్క్తే యు॑ఞ్జా॒నేషు॒ కస్త్వా॑ యునక్తి॒ స త్వా॑ యున॒క్త్వి-( ) -త్యా॑హ ప్ర॒జాప॑తి॒-ర్వై కః ప్ర॒జాప॑తినై॒వైనం॑-యుఀనక్తి యు॒ఙ్క్తే యు॑ఞ్జా॒నేషు॑ ॥ 28 ॥
(వైమ॒నః-స్ఫ్య-ఇతి॑-యున॒క్త్వే-కా॑దశ చ) (అ. 8)
ప్ర॒జాప॑తి-ర్య॒జ్ఞాన॑సృజతా-గ్నిహో॒త్ర-ఞ్చా᳚గ్నిష్టో॒మ-ఞ్చ॑ పౌర్ణమా॒సీ-ఞ్చో॒క్థ్య॑-ఞ్చామావా॒స్యా᳚-ఞ్చాతిరా॒త్ర-ఞ్చ॒ తానుద॑మిమీత॒ యావ॑దగ్నిహో॒త్ర-మాసీ॒-త్తావా॑నగ్నిష్టో॒మో యావ॑తీ పౌర్ణమా॒సీ తావా॑ను॒క్థ్యో॑ యావ॑త్యమావా॒స్యా॑ తావా॑నతిరా॒త్రో య ఏ॒వం-విఀ॒ద్వాన॑గ్నిహో॒త్ర-ఞ్జు॒హోతి॒ యావ॑దగ్నిష్టో॒మేనో॑ పా॒ప్నోతి॒ తావ॒దుపా᳚-ఽఽప్నోతి॒ య ఏ॒వం-విఀ॒ద్వా-న్పౌ᳚ర్ణమా॒సీం-యఀజ॑తే॒ యావ॑దు॒క్థ్యే॑నోపా॒ప్నోతి॒ [యావ॑దు॒క్థ్యే॑నోపా॒ప్నోతి॑, తావ॒దుపా᳚-ఽఽప్నోతి॒] 29
తావ॒దుపా᳚-ఽఽప్నోతి॒ య ఏ॒వం-విఀ॒ద్వాన॑మావా॒స్యాం᳚-యఀజ॑తే॒ యావ॑దతిరా॒త్రేణో॑పా॒ప్నోతి॒ తావ॒దుపా᳚-ఽఽప్నోతి పరమే॒ష్ఠినో॒ వా ఏ॒ష య॒జ్ఞో-ఽగ్ర॑ ఆసీ॒-త్తేన॒ స ప॑ర॒మా-ఙ్కాష్ఠా॑మగచ్ఛ॒-త్తేన॑ ప్ర॒జాప॑తి-న్ని॒రవా॑సాయయ॒-త్తేన॑ ప్ర॒జాప॑తిః పర॒మా-ఙ్కాష్ఠా॑మగచ్ఛ॒-త్తేనేన్ద్ర॑-న్ని॒రవా॑సాయయ॒-త్తేనేన్ద్రః॑ పర॒మా-ఙ్కాష్ఠా॑మగచ్ఛ॒-త్తేనా॒-ఽగ్నీషోమౌ॑ ని॒రవా॑సాయయ॒-త్తేనా॒గ్నీషోమౌ॑ ప॒రమా-ఙ్కాష్ఠా॑మగచ్ఛతాం॒-యఀ [కాష్ఠా॑మగచ్ఛతాం॒-యః, ఀఏ॒వం-విఀ॒ద్వా-న్ద॑ర్శపూర్ణమా॒సౌ] 30
ఏ॒వం-విఀ॒ద్వా-న్ద॑ర్శపూర్ణమా॒సౌ యజ॑తే పర॒మామే॒వ కాష్ఠా᳚-ఙ్గచ్ఛతి॒ యో వై ప్రజా॑తేన య॒జ్ఞేన॒ యజ॑తే॒ ప్ర ప్ర॒జయా॑ ప॒శుభి॑-ర్మిథు॒నై-ర్జా॑యతే॒ ద్వాద॑శ॒ మాసా᳚-స్సంవఀథ్స॒రో ద్వాద॑శ ద్వ॒న్ద్వాని॑ దర్శపూర్ణమా॒సయో॒స్తాని॑ స॒మ్పాద్యా॒నీత్యా॑హు-ర్వ॒థ్స-ఞ్చో॑పావసృ॒జత్యు॒ఖా-ఞ్చాధి॑ శ్రయ॒త్యవ॑ చ॒ హన్తి॑ దృ॒షదౌ॑ చ స॒మాహ॒న్త్యధి॑ చ॒ వప॑తే క॒పాలా॑ని॒ చోప॑ దధాతి పురో॒డాశ॑-ఞ్చా- [పురో॒డాశ॑-ఞ్చ, అ॒ధి॒శ్రయ॒త్యాజ్య॑-ఞ్చ] 31
-ఽధి॒శ్రయ॒త్యాజ్య॑-ఞ్చ స్తమ్బయ॒జుశ్చ॒ హర॑త్య॒భి చ॑ గృహ్ణాతి॒ వేది॑-ఞ్చ పరి గృ॒హ్ణాతి॒ పత్నీ᳚-ఞ్చ॒ సన్న॑హ్యతి॒ ప్రోఖ్ష॑ణీశ్చా ఽఽసా॒దయ॒త్యాజ్య॑-ఞ్చై॒తాని॒ వై ద్వాద॑శ ద్వ॒న్ద్వాని॑ దర్శపూర్ణమా॒సయో॒స్తాని॒ య ఏ॒వగ్ం స॒మ్పాద్య॒ యజ॑తే॒ ప్రజా॑తేనై॒వ య॒జ్ఞేన॑ యజతే॒ ప్ర ప్ర॒జయా॑ ప॒శుభి॑-ర్మిథు॒నై-ర్జా॑యతే ॥ 32 ॥
(ఉ॒క్థ్యే॑నోపా॒ప్నోత్య॑-గచ్ఛతాం॒-యః ఀ- పు॑రో॒డాశం॑-చత్వారి॒గ్ం॒శచ్చ॑) (అ. 9)
ధ్రు॒వో॑-ఽసి ధ్రు॒వో॑-ఽహగ్ం స॑జా॒తేషు॑ భూయాస॒మిత్యా॑హ ధ్రు॒వానే॒వైనా᳚న్ కురుత ఉ॒గ్రో᳚-ఽస్యు॒గ్రో॑-ఽహగ్ం స॑జా॒తేషు॑ భూయాస॒-మిత్యా॒హాప్ర॑తివాదిన ఏ॒వైనా᳚న్ కురుతే-ఽభి॒భూర॑స్యభి॒భూర॒హగ్ం స॑జా॒తేషు॑ భూయాస॒మిత్యా॑హ॒ య ఏ॒వైన॑-మ్ప్రత్యు॒త్పిపీ॑తే॒ తముపా᳚స్యతే యు॒నజ్మి॑ త్వా॒ బ్రహ్మ॑ణా॒ దైవ్యే॒నేత్యా॑హై॒ష వాఅ॒గ్నేర్యోగ॒స్తేనై॒ – [వాఅ॒గ్నేర్యోగ॒స్తేన॑, ఏ॒వైనం॑-యుఀనక్తి] 33
వైనం॑-యుఀనక్తి య॒జ్ఞస్య॒ వై సమృ॑ద్ధేన దే॒వా-స్సు॑వ॒ర్గం-లోఀ॒కమా॑యన్. య॒జ్ఞస్య॒ వ్యృ॑ద్ధే॒నాసు॑రా॒-న్పరా॑భావయ॒న్. యన్మే॑ అగ్నే అ॒స్య య॒జ్ఞస్య॒ రిష్యా॒దిత్యా॑హ య॒జ్ఞస్యై॒వ తథ్సమృ॑ద్ధేన॒ యజ॑మాన-స్సువ॒ర్గం-లోఀ॒కమే॑తి య॒జ్ఞస్య॒ వ్యృ॑ద్ధేన॒ భ్రాతృ॑వ్యా॒-న్పరా॑ భావయత్యగ్నిహో॒త్ర-మే॒తాభి॒-ర్వ్యాహృ॑తీభి॒రుప॑ సాదయేద్యజ్ఞము॒ఖం-వాఀ అ॑గ్నిహో॒త్ర-మ్బ్రహ్మై॒తా వ్యాహృ॑తయో యజ్ఞము॒ఖ ఏ॒వ బ్రహ్మ॑ – [బ్రహ్మ॑, కు॒రు॒తే॒ సం॒వఀ॒థ్స॒రే] 34
కురుతే సంవఀథ్స॒రే ప॒ర్యాగ॑త ఏ॒తాభి॑రే॒వోప॑ సాదయే॒-ద్బ్రహ్మ॑ణై॒వోభ॒యత॑-స్సంవఀథ్స॒ర-మ్పరి॑ గృహ్ణాతి దర్శపూర్ణమా॒సౌ చా॑తుర్మా॒స్యాన్యా॒లభ॑మాన ఏ॒తాభి॒-ర్వ్యాహృ॑తీభిర్-హ॒వీగ్ష్యాసా॑దయే-ద్యజ్ఞము॒ఖం-వైఀ ద॑ర్శపూర్ణమా॒సౌ చా॑తుర్మా॒స్యాని॒ బ్రహ్మై॒తా వ్యాహృ॑తయో యజ్ఞము॒ఖ ఏ॒వ బ్రహ్మ॑ కురుతే సంవఀథ్స॒రే ప॒ర్యాగ॑త ఏ॒తాభి॑రే॒వాసా॑దయే॒-ద్బ్రహ్మ॑ణై॒వోభ॒యత॑-స్సంవఀథ్స॒ర-మ్పరి॑గృహ్ణాతి॒ యద్వై య॒జ్ఞస్య॒ సామ్నా᳚ క్రి॒యతే॑ రా॒ష్ట్రం- [రా॒ష్ట్రమ్, య॒జ్ఞస్యా॒-శీర్గ॑చ్ఛతి॒] 35
-యఀ॒జ్ఞస్యా॒-శీర్గ॑చ్ఛతి॒ యదృ॒చా విశం॑-యఀ॒జ్ఞస్యా॒- శీర్గ॑చ్ఛ॒త్యథ॑ బ్రాహ్మ॒ణో॑-ఽనా॒శీర్కే॑ణ య॒జ్ఞేన॑ యజతే సామిధే॒నీ-ర॑నువ॒ఖ్ష్యన్నే॒తా వ్యాహృ॑తీః పు॒రస్తా᳚ద్దద్ధ్యా॒-ద్బ్రహ్మై॒వ ప్ర॑తి॒పద॑-ఙ్కురుతే॒ తథా᳚ బ్రాహ్మ॒ణ-స్సాశీ᳚ర్కేణ య॒జ్ఞేన॑ యజతే॒ య-ఙ్కా॒మయే॑త॒ యజ॑మాన॒-మ్భ్రాతృ॑వ్యమస్య య॒జ్ఞస్యా॒శీర్గ॑చ్ఛే॒దితి॒ తస్యై॒తా వ్యాహృ॑తీః పురోనువా॒క్యా॑యా-న్దద్ధ్యా-ద్భ్రాతృవ్యదేవ॒త్యా॑ వై పు॑రోనువా॒క్యా᳚ భ్రాతృ॑వ్యమే॒వాస్య॑ య॒జ్ఞస్యా॒-[య॒జ్ఞస్యా॑, ఆ॒శీర్గ॑చ్ఛతి॒] 36
-ఽఽశీర్గ॑చ్ఛతి॒ యాన్ కా॒మయే॑త॒ యజ॑మానాన్-థ్స॒మావ॑త్యేనాన్ య॒జ్ఞస్యా॒ ఽఽశీర్గ॑చ్ఛే॒దితి॒ తేషా॑మే॒తా వ్యాహృ॑తీః పురోనువా॒క్యా॑యా అర్ధ॒ర్చ ఏకా᳚-న్దద్ధ్యా-ద్యా॒జ్యా॑యై పు॒రస్తా॒దేకాం᳚-యాఀ॒జ్యా॑యా అర్ధ॒ర్చ ఏకా॒-న్తథై॑నాన్-థ్స॒మావ॑తీ య॒జ్ఞస్యా॒ ఽఽశీర్గ॑చ్ఛతి॒ యథా॒ వై ప॒ర్జన్య॒-స్సువృ॑ష్టం॒-వఀర్ష॑త్యే॒వం-యఀ॒జ్ఞో యజ॑మానాయ వర్షతి॒ స్థల॑యోద॒క-మ్ప॑రిగృ॒హ్ణన్త్యా॒శిషా॑ య॒జ్ఞం-యఀజ॑మానః॒ పరి॑ గృహ్ణాతి॒ మనో॑-ఽసి ప్రాజాప॒త్యం- [ప్రాజాప॒త్యమ్, మన॑సా] 37
-మన॑సా మా భూ॒తేనా-ఽఽవి॒శేత్యా॑హ॒ మనో॒ వై ప్రా॑జాప॒త్య-మ్ప్రా॑జాప॒త్యో య॒జ్ఞో మన॑ ఏ॒వ య॒జ్ఞమా॒త్మ-న్ధ॑త్తే॒ వాగ॑స్యై॒న్ద్రీ స॑పత్న॒ఖ్షయ॑ణీ వా॒చా మే᳚న్ద్రి॒యేణా-ఽఽవి॒శేత్యా॑హై॒న్ద్రీ వై వాగ్వాచ॑-మే॒వైన్ద్రీ- మా॒త్మ-న్ధ॑త్తే ॥ 38 ॥
(తేనై॒-వ బ్రహ్మ॑- రా॒ష్ట్రమే॒-వాస్య॑ య॒జ్ఞస్య॑-ప్రాజాప॒త్యగ్ం-షట్త్రిగ్ం॑శచ్చ) (అ. 10)
యో వై స॑ప్తద॒శ-మ్ప్ర॒జాప॑తిం-యఀ॒జ్ఞమ॒న్వాయ॑త్తం॒-వేఀద॒ ప్రతి॑ య॒జ్ఞేన॑ తిష్ఠతి॒ న య॒జ్ఞా-ద్భ్రగ్ం॑శత॒ ఆ శ్రా॑వ॒యేతి॒ చతు॑రఖ్షర॒మస్తు॒ శ్రౌష॒డితి॒ చతు॑రఖ్షరం॒-యఀజేతి॒ ద్వ్య॑ఖ్షరం॒-యేఀ యజా॑మహ॒ ఇతి॒ పఞ్చా᳚ఖ్షర-న్ద్వ్యఖ్ష॒రో వ॑షట్కా॒ర ఏ॒ష వై స॑ప్తద॒శః ప్ర॒జాప॑తి-ర్య॒జ్ఞమ॒న్వాయ॑త్తో॒ య ఏ॒వం-వేఀద॒ ప్రతి॑ య॒జ్ఞేన॑ తిష్ఠతి॒ న య॒జ్ఞాద్- భ్రగ్ం॑శతే॒ యో వై య॒జ్ఞస్య॒ ప్రాయ॑ణ-మ్ప్రతి॒ష్ఠా- [ప్రతి॒ష్ఠామ్, ఉ॒దయ॑నం॒-వేఀద॒] 39
ము॒దయ॑నం॒-వేఀద॒ ప్రతి॑ష్ఠితే॒నారి॑ష్టేన య॒జ్ఞేన॑ స॒గ్గ్॒స్థా-ఙ్గ॑చ్ఛ॒త్యాశ్రా॑వ॒యాస్తు॒ శ్రౌష॒డ్యజ॒ యే యజా॑మహే వషట్కా॒ర ఏ॒తద్వై య॒జ్ఞస్య॒ ప్రాయ॑ణమే॒షా ప్ర॑తి॒ష్ఠైతదు॒దయ॑నం॒-యఀ ఏ॒వం-వేఀద॒ ప్రతి॑ష్ఠితే॒నా-ఽరి॑ష్టేన య॒జ్ఞేన॑ స॒గ్గ్॒స్థా-ఙ్గ॑చ్ఛతి॒ యో వై సూ॒నృతా॑యై॒ దోహం॒-వేఀద॑ దు॒హ ఏ॒వైనాం᳚-యఀ॒జ్ఞో వై సూ॒నృతా ఽఽ శ్రా॑వ॒యేత్యైవైనా॑-మహ్వ॒దస్తు॒ [-మహ్వ॒దస్తు॑, శ్రౌష॒డిత్యు॒పావా᳚స్రా॒-] 40
శ్రౌష॒డిత్యు॒పావా᳚స్రా॒-గ్యజేత్యుద॑నైషీ॒ద్యే యజా॑మహ॒ ఇత్యుపా॑-ఽసద-ద్వషట్కా॒రేణ॑ దోగ్ద్ధ్యే॒ష వై సూ॒నృతా॑యై॒ దోహో॒ య ఏ॒వం-వేఀద॑ దు॒హ ఏ॒వైనా᳚-న్దే॒వా వై స॒త్రమా॑సత॒ తేషా॒-న్దిశో॑-ఽదస్య॒న్త ఏ॒తామా॒ర్ద్రా-మ్ప॒ఙ్క్తిమ॑పశ్య॒న్నా శ్రా॑వ॒యేతి॑ పురోవా॒త-మ॑జనయ॒న్నస్తు॒ శ్రౌష॒డిత్య॒భ్రగ్ం సమ॑ప్లావయ॒న్॒. యజేతి॑ వి॒ద్యుత॑- [వి॒ద్యుత॑మ్, అ॒జ॒న॒య॒న్॒ యే] 41
మజనయ॒న్॒ యే యజా॑మహ॒ ఇతి॒ ప్రావ॑ర్షయన్న॒భ్య॑స్తనయన్ వషట్కా॒రేణ॒ తతో॒ వై తేభ్యో॒ దిశః॒ ప్రాప్యా॑యన్త॒ య ఏ॒వం-వేఀద॒ ప్రాస్మై॒ దిశః॑ ప్యాయన్తే ప్ర॒జాప॑తి-న్త్వో॒వేద॑ ప్ర॒జాప॑తి స్త్వంవేఀద॒ య-మ్ప్ర॒జాప॑తి॒-ర్వేద॒ స పుణ్యో॑ భవత్యే॒ష వై ఛ॑న్ద॒స్యః॑ ప్ర॒జాప॑తి॒రా శ్రా॑వ॒యా-ఽస్తు॒ శ్రౌష॒డ్యజ॒ యే యజా॑మహే వషట్కా॒రో య ఏ॒వం-వేఀద॒ పుణ్యో॑ భవతి వస॒న్త- [వస॒న్తమ్, ఋ॒తూ॒నాం] 42
-మృ॑తూ॒నా-మ్ప్రీ॑ణా॒మీత్యా॑హ॒ర్తవో॒ వై ప్ర॑యా॒జా ఋ॒తూనే॒వ ప్రీ॑ణాతి॒ తే᳚-ఽస్మై ప్రీ॒తా య॑థాపూ॒ర్వ-ఙ్క॑ల్పన్తే॒ కల్ప॑న్తే-ఽస్మా ఋ॒తవో॒ య ఏ॒వం-వేఀదా॒గ్నీషోమ॑యోర॒హ-న్దే॑వయ॒జ్యయా॒ చఖ్షు॑ష్మా-న్భూయాస॒మిత్యా॑-హా॒గ్నీషోమా᳚భ్యాం॒-వైఀ య॒జ్ఞశ్చఖ్షు॑ష్మా॒-న్తాభ్యా॑మే॒వ చఖ్షు॑రా॒త్మ-న్ధ॑త్తే॒ ఽగ్నేర॒హ-న్దే॑వయ॒జ్యయా᳚-ఽన్నా॒దో భూ॑యాస॒మిత్యా॑హా॒గ్నిర్వై దే॒వానా॑-మన్నా॒దస్తే నై॒వా- [మన్నా॒దస్తే నై॒వా, అ॒న్నాద్య॑మా॒త్మన్] 43
-ఽన్నాద్య॑మా॒త్మ-న్ధ॑త్తే॒ దబ్ధి॑ర॒స్యద॑బ్ధో భూయాసమ॒ము-న్ద॑భేయ॒మిత్యా॑హై॒తయా॒ వై దబ్ద్ధ్యా॑ దే॒వా అసు॑రానదభ్నువ॒న్తయై॒వ భ్రాతృ॑వ్య-న్దభ్నోత్య॒గ్నీషోమ॑యోర॒హ-న్దే॑వయ॒జ్యయా॑ వృత్ర॒హా భూ॑యాస॒మిత్యా॑హా॒-ఽగ్నీషోమా᳚భ్యాం॒-వాఀ ఇన్ద్రో॑ వృ॒త్రమ॑హ॒న్తాభ్యా॑మే॒వ భ్రాతృ॑వ్యగ్గ్ స్తృణుత ఇన్ద్రాగ్ని॒యోర॒హ-న్దే॑వయ॒జ్యయే᳚న్ద్రియా॒వ్య॑న్నా॒దో భూ॑యాస॒మిత్యా॑హేన్ద్రియా॒వ్యే॑వాన్నా॒దో భ॑వ॒తీన్ద్ర॑స్యా॒- [భ॑వ॒తీన్ద్ర॑స్య, అ॒హ-న్దే॑వయ॒జ్యయే᳚న్ద్రియా॒వీ] 44
-ఽహ-న్దే॑వయ॒జ్యయే᳚న్ద్రియా॒వీ భూ॑యాస॒మిత్యా॑హేన్ద్రియా॒వ్యే॑వ భ॑వతి మహే॒న్ద్రస్యా॒-ఽహ-న్దే॑వయ॒జ్యయా॑ జే॒మాన॑-మ్మహి॒మాన॑-ఙ్గమేయ॒మిత్యా॑హ జే॒మాన॑మే॒వ మ॑హి॒మాన॑-ఙ్గచ్ఛత్య॒గ్నే-స్స్వి॑ష్ట॒కృతో॒-ఽహ-న్దే॑వయ॒జ్యయా ఽఽయు॑ష్మాన్. య॒జ్ఞేన॑ ప్రతి॒ష్ఠా-ఙ్గ॑మేయ॒మిత్యా॒-హాయు॑రే॒వాత్మ-న్ధ॑త్తే॒ ప్రతి॑ య॒జ్ఞేన॑ -తిష్ఠతి ॥ 45 ॥
( ప్ర॒తి॒ష్ఠా-మ॑హ్వ॒దస్తు॑-వి॒ద్యుతం॑వఀస॒న్తన్-తేనై॒వే-న్ద్ర॑స్యా॒-ఽష్టాత్రిగ్ం॑శచ్చ) (అ. 11)
ఇన్ద్రం॑-వోఀ వి॒శ్వత॒స్పరి॒ హవా॑మహే॒ జనే᳚భ్యః । అ॒స్మాక॑మస్తు॒ కేవ॑లః ॥ ఇన్ద్ర॒-న్నరో॑ నే॒మధి॑తా హవన్తే॒ యత్పార్యా॑ యు॒నజ॑తే॒ ధియ॒స్తాః । శూరో॒ నృషా॑తా॒ శవ॑సశ్చకా॒న ఆ గోమ॑తి వ్ర॒జే భ॑జా॒ త్వన్నః॑ ॥ ఇ॒న్ద్రి॒యాణి॑ శతక్రతో॒ యా తే॒ జనే॑షు ప॒ఞ్చసు॑ ॥ ఇన్ద్ర॒ తాని॑ త॒ ఆ వృ॑ణే ॥ అను॑ తే దాయి మ॒హ ఇ॑న్ద్రి॒యాయ॑ స॒త్రా తే॒ విశ్వ॒మను॑ వృత్ర॒హత్యే᳚ । అను॑ [ ] 46
ఖ్ష॒త్రమను॒ సహో॑ యజ॒త్రేన్ద్ర॑ దే॒వేభి॒రను॑ తే నృ॒షహ్యే᳚ ॥ ఆయస్మి᳚న్-థ్స॒ప్తవా॑స॒వా స్తిష్ఠ॑న్తి స్వా॒రుహో॑ యథా । ఋషి॑ర్హ దీర్ఘ॒శ్రుత్త॑మ॒ ఇన్ద్ర॑స్య ఘ॒ర్మో అతి॑థిః ॥ ఆ॒మాసు॑ ప॒క్వమైర॑య॒ ఆ సూర్యగ్ం॑ రోహయో ది॒వి । ఘ॒ర్మ-న్న సామ॑-న్తపతా సువృ॒క్తిభి॒-ర్జుష్ట॒-ఙ్గిర్వ॑ణసే॒ గిరః॑ ॥ ఇన్ద్ర॒మి-ద్గా॒థినో॑ బృ॒హదిన్ద్ర॑-మ॒ర్కేభి॑-ర॒ర్కిణః॑ । ఇన్ద్రం॒-వాఀణీ॑రనూషత ॥ గాయ॑న్తి త్వా గాయ॒త్రిణో- [గాయ॒త్రిణః॑, అర్చ॑న్త్య॒ర్క-మ॒ర్కిణః॑ ।] 47
-ఽర్చ॑న్త్య॒ర్క-మ॒ర్కిణః॑ । బ్ర॒హ్మాణ॑స్త్వా శతక్రత॒వు-ద్వ॒గ్ం॒శ-మి॑వ యేమిరే ॥ అ॒గ్ం॒హో॒ముచే॒ ప్ర భ॑రేమా మనీ॒షామో॑షిష్ఠ॒దావంనే॑ సుమ॒తి-ఙ్గృ॑ణా॒నాః । ఇ॒దమి॑న్ద్ర॒ ప్రతి॑ హ॒వ్య-ఙ్గృ॑భాయ స॒త్యా-స్స॑న్తు॒ యజ॑మానస్య॒ కామాః᳚ ॥ వి॒వేష॒ యన్మా॑ ధి॒షణా॑ జ॒జాన॒ స్తవై॑ పు॒రా పార్యా॒దిన్ద్ర॒-మహ్నః॑ । అగ్ంహ॑సో॒ యత్ర॑ పీ॒పర॒ద్యథా॑ నో నా॒వేవ॒ యాన్త॑ ము॒భయే॑ హవన్తే ॥ ప్ర స॒మ్రాజ॑-మ్ప్రథ॒మ-మ॑ద్ధ్వ॒రాణా॑- [మ॑ద్ధ్వ॒రాణా᳚మ్, అ॒గ్ం॒హో॒ముచం॑] 48
-మగ్ంహో॒ముచం॑-వృఀష॒భం-యఀ॒జ్ఞియా॑నామ్ । అ॒పా-న్నపా॑తమశ్వినా॒ హయ॑న్త-మ॒స్మిన్న॑ర ఇన్ద్రి॒య-న్ధ॑త్త॒మోజః॑ ॥ వి న॑ ఇన్ద్ర॒ మృధో॑ జహి నీ॒చా య॑చ్ఛ పృతన్య॒తః । అ॒ధ॒స్ప॒ద-న్తమీ᳚-ఙ్కృధి॒ యో అ॒స్మాగ్ం అ॑భి॒దాస॑తి ॥ ఇన్ద్ర॑ ఖ్ష॒త్రమ॒భి వా॒మమోజో ఽజా॑యథా వృషభ చర్షణీ॒నామ్ । అపా॑నుదో॒ జన॑-మమిత్ర॒యన్త॑-ము॒రు-న్దే॒వేభ్యో॑ అకృణో-రు లో॒కమ్ ॥ మృ॒గో న భీ॒మః కు॑చ॒రో గి॑రి॒ష్ఠాః ప॑రా॒వత [ప॑రా॒వతః॑, ఆ జ॑గామా॒ పర॑స్యాః ।] 49
ఆ జ॑గామా॒ పర॑స్యాః । సృ॒కగ్ం స॒గ్ం॒శాయ॑ ప॒విమి॑న్ద్ర తి॒గ్మం-విఀ శత్రూ᳚-న్తాఢి॒ విమృధో॑ నుదస్వ ॥ వి శత్రూ॒న్॒. వి మృధో॑ నుద॒ వివృ॒త్రస్య॒ హనూ॑ రుజ । వి మ॒న్యుమి॑న్ద్ర భామి॒తో॑-ఽమిత్ర॑స్యా-ఽభి॒దాస॑తః ॥ త్రా॒తార॒-మిన్ద్ర॑-మవి॒తార॒-మిన్ద్ర॒గ్ం॒ హవే॑హవే సు॒హవ॒గ్ం॒ శూర॒మిన్ద్ర᳚మ్ । హు॒వే ను శ॒క్ర-మ్పు॑రుహూ॒తమిన్ద్రగ్గ్॑ స్వ॒స్తి నో॑ మ॒ఘవా॑ ధా॒త్విన్ద్రః॑ ॥ మా తే॑ అ॒స్యాగ్ం [అ॒స్యాగ్ం, స॒హ॒సా॒వ॒-న్పరి॑ష్టావ॒ఘాయ॑] 50
స॑హసావ॒-న్పరి॑ష్టావ॒ఘాయ॑ భూమ హరివః పరా॒దై । త్రాయ॑స్వ నో ఽవృ॒కేభి॒-ర్వరూ॑థై॒-స్తవ॑ ప్రి॒యాస॑-స్సూ॒రిషు॑ స్యామ ॥ అన॑వస్తే॒ రథ॒మశ్వా॑య తఖ్ష॒-న్త్వష్టా॒ వజ్ర॑-మ్పురుహూత ద్యు॒మన్త᳚మ్ । బ్ర॒హ్మాణ॒ ఇన్ద్ర॑-మ్మ॒హయ॑న్తో అ॒ర్కైరవ॑ర్ధయ॒న్నహ॑యే॒ హన్త॒వా ఉ॑ ॥ వృష్ణే॒ య-త్తే॒ వృష॑ణో అ॒ర్కమర్చా॒నిన్ద్ర॒ గ్రావా॑ణో॒ అది॑తి-స్స॒జోషాః᳚ । అ॒న॒శ్వాసో॒ యే ప॒వయో॑-ఽర॒థా ఇన్ద్రే॑షితా అ॒భ్యవ॑ర్త న్త॒ దస్యూన్॑ ॥ 51 ॥
(వృ॒త్ర॒హత్యే-ఽను॑-గాయ॒త్రిణో᳚-ఽద్ధ॒రాణాం᳚-పరా॒వతో॒-ఽస్యా-మ॒ష్టాచ॑త్వారిగ్ంశచ్చ) (అ. 12)
(సన్త్వా॑ సిఞ్చామి-ధ్రు॒వో᳚-ఽస్య॒గ్నిర్మా॑-బ॒ర్॒హిషో॒-ఽహ-మా ప్యా॑యతా॒-మగ॑న్మ॒-యథా॒ వై-యో వై శ్ర॒ద్ధాం- ప్ర॒జాప॑తి॒-ర్యజ్ఞాన్-ధ్రు॒వో॑-ఽసీత్యా॑హ॒-యో వై స॑ప్తద॒శ-మిన్ద్రం॑-వోఀ॒-ద్వాద॑శ । )
(సన్త్వా॑-బ॒ర్॒హిషో॒-ఽహంయఀథా॒ వా-ఏ॒వం-విఀ॒ద్వా-ఞ్ఛ్రౌష॑ట్-థ్సాహసావ॒-న్నేక॑పఞ్చా॒శత్ ।)
(సన్త్వా॑, సిఞ్చామి॒ దస్యూన్॑)
॥ హరిః॑ ఓమ్ ॥
॥ కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే షష్ఠః ప్రశ్న-స్సమాప్తః ॥