॥ dvitīya muṇḍakē dvitīyaḥ khaṇḍaḥ ॥
āvi-ssannihita-ṅguhāchara-nnāma
mahatpadamatraita-thsamarpitam ।
ējatprāṇannimiṣachcha yadētajjānatha
sadasadvarēṇya-mparaṃ vijñānādyadvariṣṭha-mprajānām ॥ 1॥
yadarchimadyadaṇubhyō-‘ṇu cha
yasmiँllōkā nihitā lōkinaścha ।
tadētadakṣara-mbrahma sa prāṇastadu vāṅmanaḥ
tadētatsatya-ntadamṛta-ntadvēddhavyaṃ sōmya viddhi ॥ 2॥
dhanur gṛhītvaupaniṣada-mmahāstraṃ
śaraṃ hyupāsā niśitaṃ sandhayīta ।
āyamya tadbhāvagatēna chētasā
lakṣya-ntadēvākṣaraṃ sōmya viddhi ॥ 3॥
praṇavō dhanu-śśārō hyātmā brahma tallakṣyamuchyatē ।
apramattēna vēddhavyaṃ śarava-ttanmayō bhavēt ॥ 4॥
yasmi-ndyauḥ pṛthivī chāntarikṣamōtaṃ
mana-ssaha prāṇaiścha sarvaiḥ ।
tamēvaika-ñjānatha ātmānamanyā vāchō
vimuñchathāmṛtasyaiṣa sētuḥ ॥ 5॥
arā iva rathanābhau saṃhatā yatra nāḍyaḥ ।
sa ēṣō-‘ntaścharatē bahudhā jāyamānaḥ ।
ōmityēva-ndhyāyatha ātmānaṃ svasti vaḥ
pārāya tamasaḥ parastāt ॥ 6॥
ya-ssarvajña-ssarvavid yasyaiṣa mahimā bhuvi ।
divyē brahmapurē hyēṣa vyōmnyātmā pratiṣṭhitaḥ ॥
manōmayaḥ prāṇaśarīranētā
pratiṣṭhitō-‘nnē hṛdayaṃ sannidhāya ।
tad vijñānēna paripaśyanti dhīrā
ānandarūpamamṛtaṃ yad vibhāti ॥ 7॥
bhidyatē hṛdayagranthiśChidyantē sarvasaṃśayāḥ ।
kṣīyantē chāsya karmāṇi tasmi-ndṛṣṭē parāvarē ॥ 8॥
hiraṇmayē parē kōśē viraja-mbrahma niṣkalam ।
tachChubhra-ñjyōtiṣa-ñjyōtistad yadātmavidō viduḥ ॥ 9॥
na tatra sūryō bhāti na chandratārakaṃ
nēmā vidyutō bhānti kutō-‘yamagniḥ ।
tamēva bhāntamanubhāti sarvaṃ
tasya bhāsā sarvamidaṃ vibhāti ॥ 10॥
brahmaivēdamamṛta-mpurastād brahma paśchād brahma dakṣiṇataśchōttarēṇa ।
adhaśchōrdhva-ñcha prasṛta-mbrahmaivēdaṃ viśvamidaṃ variṣṭham ॥ 11॥
॥ iti muṇḍakōpaniṣadi dvitīyamuṇḍakē dvitīyaḥ khaṇḍaḥ ॥