yatsēvanēna pitṛmātṛsahōdarāṇāṃ
chittaṃ na mōhamahimā malinaṃ karōti ।
itthaṃ samīkṣya tava bhaktajanānmurārē
mūkō’smi tē’ṅghrikamalaṃ tadatīva dhanyam ॥ 1 ॥
yē yē vilagnamanasaḥ sukhamāptukāmāḥ
tē tē bhavanti jagadudbhavamōhaśūnyāḥ ।
dṛṣṭvā vinaṣṭadhanadhānyagṛhānmurārē
mūkō’smi tē’ṅghrikamalaṃ tadatīva dhanyam ॥ 2 ॥
vastrāṇi digvalayamāvasatiḥ śmaśānē
pātraṃ kapālamapi muṇḍavibhūṣaṇāni ।
rudrē prasādamachalaṃ tava vīkṣya śaurē
mūkō’smi tē’ṅghrikamalaṃ tadatīva dhanyam ॥ 3 ॥
yatkīrtigāyanaparasya vidhātṛsūnōḥ
kaupīnamaiṇamajinaṃ vipulāṃ vibhūtim ।
svasyārtha digbhramaṇamīkṣya tu sārvakālaṃ
mūkō’smi tē’ṅghrikamalaṃ tadatīva dhanyam ॥ 4 ॥
yadvīkṣaṇē dhṛtadhiyāmaśanaṃ phalādi
vāsō’pi nirjinavanē girikandarāsu ।
vāsāṃsi valkalamayāni vilōkya chaivaṃ
mūkō’smi tē’ṅghrikamalaṃ tadatīva dhanyam ॥ 5 ॥
stōtraṃ pādāmbujasyaitachChrīśasya vijitēndriyaḥ ।
paṭhitvā tatpadaṃ yāti ślōkārthajñastu yō naraḥ ॥ 6 ॥
iti murāri pañcharatnam ।