agrē paśyāmi tējō nibiḍatarakalāyāvalīlōbhanīyaṃ
pīyūṣāplāvitō’haṃ tadanu tadudarē divyakaiśōravēṣam ।
tāruṇyārambharamyaṃ paramasukharasāsvādarōmāñchitāṅgai-
rāvītaṃ nāradādyairvilasadupaniṣatsundarīmaṇḍalaiścha ॥1॥
nīlābhaṃ kuñchitāgraṃ ghanamamalataraṃ saṃyataṃ chārubhaṅgyā
ratnōttaṃsābhirāmaṃ valayitamudayachchandrakaiḥ piñChajālaiḥ ।
mandārasraṅnivītaṃ tava pṛthukabarībhāramālōkayē’haṃ
snigdhaśvētōrdhvapuṇḍrāmapi cha sulalitāṃ phālabālēnduvīthīm ॥2
hṛdyaṃ pūrṇānukampārṇavamṛdulaharīchañchalabhrūvilāsai-
rānīlasnigdhapakṣmāvaliparilasitaṃ nētrayugmaṃ vibhō tē ।
sāndrachChāyaṃ viśālāruṇakamaladalākāramāmugdhatāraṃ
kāruṇyālōkalīlāśiśiritabhuvanaṃ kṣipyatāṃ mayyanāthē ॥3॥
uttuṅgōllāsināsaṃ harimaṇimukuraprōllasadgaṇḍapālī-
vyālōlatkarṇapāśāñchitamakaramaṇīkuṇḍaladvandvadīpram ।
unmīladdantapaṅktisphuradaruṇatarachChāyabimbādharāntaḥ-
prītiprasyandimandasmitamadhurataraṃ vaktramudbhāsatāṃ mē ॥4॥
bāhudvandvēna ratnōjjvalavalayabhṛtā śōṇapāṇipravālē-
nōpāttāṃ vēṇunālī prasṛtanakhamayūkhāṅgulīsaṅgaśārām ।
kṛtvā vaktrāravindē sumadhuravikasadrāgamudbhāvyamānaiḥ
śabdabrahmāmṛtaistvaṃ śiśiritabhuvanaiḥ siñcha mē karṇavīthīm ॥5॥
utsarpatkaustubhaśrītatibhiraruṇitaṃ kōmalaṃ kaṇṭhadēśaṃ
vakṣaḥ śrīvatsaramyaṃ taralatarasamuddīprahārapratānam ।
nānāvarṇaprasūnāvalikisalayinīṃ vanyamālāṃ vilōla-
llōlambāṃ lambamānāmurasi tava tathā bhāvayē ratnamālām ॥6॥
aṅgē pañchāṅgarāgairatiśayavikasatsaurabhākṛṣṭalōkaṃ
līnānēkatrilōkīvitatimapi kṛśāṃ bibhrataṃ madhyavallīm ।
śakrāśmanyastataptōjjvalakanakanibhaṃ pītachēlaṃ dadhānaṃ
dhyāyāmō dīptaraśmisphuṭamaṇiraśanākiṅkiṇīmaṇḍitaṃ tvām ॥7॥
ūrū chārū tavōrū ghanamasṛṇaruchau chittachōrau ramāyāḥ
viśvakṣōbhaṃ viśaṅkya dhruvamaniśamubhau pītachēlāvṛtāṅgau ।
ānamrāṇāṃ purastānnyasanadhṛtasamastārthapālīsamudga-
chChāyaṃ jānudvayaṃ cha kramapṛthulamanōjñē cha jaṅghē niṣēvē ॥8॥
mañjīraṃ mañjunādairiva padabhajanaṃ śrēya ityālapantaṃ
pādāgraṃ bhrāntimajjatpraṇatajanamanōmandarōddhārakūrmam ।
uttuṅgātāmrarājannakharahimakarajyōtsnayā chā’śritānāṃ
santāpadhvāntahantrīṃ tatimanukalayē maṅgalāmaṅgulīnām ॥9॥
yōgīndrāṇāṃ tvadaṅgēṣvadhikasumadhuraṃ muktibhājāṃ nivāsō
bhaktānāṃ kāmavarṣadyutarukisalayaṃ nātha tē pādamūlam ।
nityaṃ chittasthitaṃ mē pavanapurapatē kṛṣṇa kāruṇyasindhō
hṛtvā niśśēṣatāpān pradiśatu paramānandasandōhalakṣmīm ॥10॥
ajñātvā tē mahatvaṃ yadiha nigaditaṃ viśvanātha kṣamēthāḥ
stōtraṃ chaitatsahasrōttaramadhikataraṃ tvatprasādāya bhūyāt ।
dvēdhā nārāyaṇīyaṃ śrutiṣu cha januṣā stutyatāvarṇanēna
sphītaṃ līlāvatārairidamiha kurutāmāyurārōgyasaukhyam ॥11॥