udgachChatastava karādamṛtaṃ haratsu
daityēṣu tānaśaraṇānanunīya dēvān ।
sadyastirōdadhitha dēva bhavatprabhāvā-
dudyatsvayūthyakalahā ditijā babhūvuḥ ॥1॥
śyāmāṃ ruchā’pi vayasā’pi tanuṃ tadānīṃ
prāptō’si tuṅgakuchamaṇḍalabhaṅgurāṃ tvam ।
pīyūṣakumbhakalahaṃ parimuchya sarvē
tṛṣṇākulāḥ pratiyayustvadurōjakumbhē ॥2॥
kā tvaṃ mṛgākṣi vibhajasva sudhāmimāmi-
tyārūḍharāgavivaśānabhiyāchatō’mūn ।
viśvasyatē mayi kathaṃ kulaṭā’smi daityā
ityālapannapi suviśvasitānatānīḥ ॥3॥
mōdāt sudhākalaśamēṣu dadatsu sā tvaṃ
duśchēṣṭitaṃ mama sahadhvamiti bruvāṇā ।
paṅktiprabhēdavinivēśitadēvadaityā
līlāvilāsagatibhiḥ samadāḥ sudhāṃ tām ॥4॥
asmāsviyaṃ praṇayiṇītyasurēṣu tēṣu
jōṣaṃ sthitēṣvatha samāpya sudhāṃ surēṣu ।
tvaṃ bhaktalōkavaśagō nijarūpamētya
svarbhānumardhaparipītasudhaṃ vyalāvīḥ ॥5॥
tvattaḥ sudhāharaṇayōgyaphalaṃ parēṣu
datvā gatē tvayi suraiḥ khalu tē vyagṛhṇan ।
ghōrē’tha mūrChati raṇē balidaityamāyā-
vyāmōhitē suragaṇē tvamihāvirāsīḥ ॥6॥
tvaṃ kālanēmimatha mālimukhāñjaghantha
śakrō jaghāna balijambhavalān sapākān ।
śuṣkārdraduṣkaravadhē namuchau cha lūnē
phēnēna nāradagirā nyaruṇō raṇaṃ tvam ॥7॥
yōṣāvapurdanujamōhanamāhitaṃ tē
śrutvā vilōkanakutūhalavān mahēśaḥ ।
bhūtaissamaṃ girijayā cha gataḥ padaṃ tē
stutvā’bravīdabhimataṃ tvamathō tirōdhāḥ ॥8॥
ārāmasīmani cha kandukaghātalīlā-
lōlāyamānanayanāṃ kamanīṃ manōjñām ।
tvāmēṣa vīkṣya vigaladvasanāṃ manōbhū-
vēgādanaṅgaripuraṅga samāliliṅga ॥9॥
bhūyō’pi vidrutavatīmupadhāvya dēvō
vīryapramōkṣavikasatparamārthabōdhaḥ ।
tvanmānitastava mahattvamuvācha dēvyai
tattādṛśastvamava vātanikētanātha ॥10॥