śakrēṇa saṃyati hatō’pi balirmahātmā
śukrēṇa jīvitatanuḥ kratuvardhitōṣmā ।
vikrāntimān bhayanilīnasurāṃ trilōkīṃ
chakrē vaśē sa tava chakramukhādabhītaḥ ॥1॥
putrārtidarśanavaśādaditirviṣaṇṇā
taṃ kāśyapaṃ nijapatiṃ śaraṇaṃ prapannā ।
tvatpūjanaṃ taduditaṃ hi payōvratākhyaṃ
sā dvādaśāhamacharattvayi bhaktipūrṇā ॥2॥
tasyāvadhau tvayi nilīnamatēramuṣyāḥ
śyāmaśchaturbhujavapuḥ svayamāvirāsīḥ ।
namrāṃ cha tāmiha bhavattanayō bhavēyaṃ
gōpyaṃ madīkṣaṇamiti pralapannayāsīḥ ॥3॥
tvaṃ kāśyapē tapasi sannidadhattadānīṃ
prāptō’si garbhamaditēḥ praṇutō vidhātrā ।
prāsūta cha prakaṭavaiṣṇavadivyarūpaṃ
sā dvādaśīśravaṇapuṇyadinē bhavantam ॥4॥
puṇyāśramaṃ tamabhivarṣati puṣpavarṣai-
rharṣākulē suragaṇē kṛtatūryaghōṣē ।
badhvā’ñjaliṃ jaya jayēti nutaḥ pitṛbhyāṃ
tvaṃ tatkṣaṇē paṭutamaṃ vaṭurūpamādhāḥ ॥5॥
tāvatprajāpatimukhairupanīya mauñjī-
daṇḍājinākṣavalayādibhirarchyamānaḥ ।
dēdīpyamānavapurīśa kṛtāgnikārya-
stvaṃ prāsthithā baligṛhaṃ prakṛtāśvamēdham ॥6॥
gātrēṇa bhāvimahimōchitagauravaṃ prā-
gvyāvṛṇvatēva dharaṇīṃ chalayannāyāsīḥ ।
Chatraṃ parōṣmatiraṇārthamivādadhānō
daṇḍaṃ cha dānavajanēṣviva sannidhātum ॥7॥
tāṃ narmadōttarataṭē hayamēdhaśālā-
māsēduṣi tvayi ruchā tava ruddhanētraiḥ ।
bhāsvān kimēṣa dahanō nu sanatkumārō
yōgī nu kō’yamiti śukramukhaiśśaśaṅkē ॥8॥
ānītamāśu bhṛgubhirmahasā’bhibhūtai-
stvāṃ ramyarūpamasuraḥ pulakāvṛtāṅgaḥ ।
bhaktyā samētya sukṛtī pariṇijya pādau
tattōyamanvadhṛta mūrdhani tīrthatīrtham ॥9॥
prahlādavaṃśajatayā kratubhirdvijēṣu
viśvāsatō nu tadidaṃ ditijō’pi lēbhē ।
yattē padāmbu giriśasya śirōbhilālyaṃ
sa tvaṃ vibhō gurupurālaya pālayēthāḥ ॥10॥