ayi sabala murārē pāṇijānuprachāraiḥ
kimapi bhavanabhāgān bhūṣayantau bhavantau ।
chalitacharaṇakañjau mañjumañjīraśiñjā-
śravaṇakutukabhājau chēratuśchāruvēgāt ॥1॥
mṛdu mṛdu vihasantāvunmiṣaddantavantau
vadanapatitakēśau dṛśyapādābjadēśau ।
bhujagalitakarāntavyālagatkaṅkaṇāṅkau
matimaharatamuchchaiḥ paśyatāṃ viśvanṛṇām ॥2॥
anusarati janaughē kautukavyākulākṣē
kimapi kṛtaninādaṃ vyāhasantau dravantau ।
valitavadanapadmaṃ pṛṣṭhatō dattadṛṣṭī
kimiva na vidadhāthē kautukaṃ vāsudēva ॥3॥
drutagatiṣu patantāvutthitau liptapaṅkau
divi munibhirapaṅkaiḥ sasmitaṃ vandyamānau ।
drutamatha jananībhyāṃ sānukampaṃ gṛhītau
muhurapi parirabdhau drāgyuvāṃ chumbitau cha ॥4॥
snutakuchabharamaṅkē dhārayantī bhavantaṃ
taralamati yaśōdā stanyadā dhanyadhanyā ।
kapaṭapaśupa madhyē mugdhahāsāṅkuraṃ tē
daśanamukulahṛdyaṃ vīkṣya vaktraṃ jaharṣa ॥5॥
tadanucharaṇachārī dārakaissākamārā-
nnilayatatiṣu khēlan bālachāpalyaśālī ।
bhavanaśukaviḍālān vatsakāṃśchānudhāvan
kathamapi kṛtahāsairgōpakairvāritō’bhūḥ ॥6॥
haladharasahitastvaṃ yatra yatrōpayātō
vivaśapatitanētrāstatra tatraiva gōpyaḥ ।
vigalitagṛhakṛtyā vismṛtāpatyabhṛtyā
murahara muhuratyantākulā nityamāsan ॥7॥
pratinavanavanītaṃ gōpikādattamichChan
kalapadamupagāyan kōmalaṃ kvāpi nṛtyan ।
sadayayuvatilōkairarpitaṃ sarpiraśnan
kvachana navavipakvaṃ dugdhamapyāpibastvam ॥8॥
mama khalu baligēhē yāchanaṃ jātamāstā-
miha punarabalānāmagratō naiva kurvē ।
iti vihitamatiḥ kiṃ dēva santyajya yāchñāṃ
dadhighṛtamaharastvaṃ chāruṇā chōraṇēna ॥9॥
tava dadhighṛtamōṣē ghōṣayōṣājanānā-
mabhajata hṛdi rōṣō nāvakāśaṃ na śōkaḥ ।
hṛdayamapi muṣitvā harṣasindhau nyadhāstvaṃ
sa mama śamaya rōgān vātagēhādhinātha ॥10॥
śākhāgrē vidhuṃ vilōkya phalamitymbāṃ cha tātaṃ muhuḥ
samprārthyātha tadā tadīyavachasā prōtkṣiptabāhau tvayi।
chitraṃ dēva śaśī sa tē karmagāt kiṃ brūmahē sampataḥ
jyōtirmaṇḍalapūritākhilavapuḥ prāgā virāḍrūpatām ॥ 11॥
kiṃ kiṃ batēdamiti sambhrama bhājamēnaṃ
brahmārṇavē kṣaṇamamuṃ parimajjya tātam ।
māyāṃ punastanaya-mōhamayīṃ vitanvan
ānandachinmaya jaganmaya pāhi rōgāt ॥12॥