atītya bālyaṃ jagatāṃ patē tvamupētya paugaṇḍavayō manōjñam ।
upēkṣya vatsāvanamutsavēna prāvartathā gōgaṇapālanāyām ॥1॥
upakramasyānuguṇaiva sēyaṃ marutpurādhīśa tava pravṛttiḥ ।
gōtrāparitrāṇakṛtē’vatīrṇastadēva dēvā”rabhathāstadā yat ॥2॥
kadāpi rāmēṇa samaṃ vanāntē vanaśriyaṃ vīkṣya charan sukhēna ।
śrīdāmanāmnaḥ svasakhasya vāchā mōdādagā dhēnukakānanaṃ tvam ॥3॥
uttālatālīnivahē tvaduktyā balēna dhūtē’tha balēna dōrbhyām ।
mṛduḥ kharaśchābhyapatatpurastāt phalōtkarō dhēnukadānavō’pi ॥4॥
samudyatō dhainukapālanē’haṃ kathaṃ vadhaṃ dhainukamadya kurvē ।
itīva matvā dhruvamagrajēna suraughayōddhāramajīghanastvam ॥5॥
tadīyabhṛtyānapi jambukatvēnōpāgatānagrajasaṃyutastvam ।
jambūphalānīva tadā nirāsthastālēṣu khēlan bhagavan nirāsthaḥ ॥6॥
vinighnati tvayyatha jambukaughaṃ sanāmakatvādvaruṇastadānīm ।
bhayākulō jambukanāmadhēyaṃ śrutiprasiddhaṃ vyadhitēti manyē ॥7॥
tavāvatārasya phalaṃ murārē sañjātamadyēti surairnutastvam ।
satyaṃ phalaṃ jātamihēti hāsī bālaiḥ samaṃ tālaphalānyabhuṅkthāḥ ॥8॥
madhudravasrunti bṛhanti tāni phalāni mēdōbharabhṛnti bhuktvā ।
tṛptaiścha dṛptairbhavanaṃ phalaughaṃ vahadbhirāgāḥ khalu bālakaistvam ॥9॥
hatō hatō dhēnuka ityupētya phalānyadadbhirmadhurāṇi lōkaiḥ ।
jayēti jīvēti nutō vibhō tvaṃ marutpurādhīśvara pāhi rōgāt ॥10॥