sairandhryāstadanu chiraṃ smarāturāyā
yātō’bhūḥ sulalitamuddhavēna sārdham ।
āvāsaṃ tvadupagamōtsavaṃ sadaiva
dhyāyantyāḥ pratidinavāsasajjikāyāḥ ॥1॥
upagatē tvayi pūrṇamanōrathāṃ pramadasambhramakamprapayōdharām ।
vividhamānanamādadhatīṃ mudā rahasi tāṃ ramayāñchakṛṣē sukham ॥2॥
pṛṣṭā varaṃ punarasāvavṛṇōdvarākī
bhūyastvayā suratamēva niśāntarēṣu ।
sāyujyamastviti vadēt budha ēva kāmaṃ
sāmīpyamastvaniśamityapi nābravīt kim ॥3॥
tatō bhavān dēva niśāsu kāsuchinmṛgīdṛśaṃ tāṃ nibhṛtaṃ vinōdayan ।
adādupaślōka iti śrutaṃ sutaṃ sa nāradāt sāttvatatantravidbababhau ॥4॥
akrūramandiramitō’tha balōddhavābhyā-
mabhyarchitō bahu nutō muditēna tēna ।
ēnaṃ visṛjya vipināgatapāṇḍavēya-
vṛttaṃ vivēditha tathā dhṛtarāṣṭrchēṣṭām ॥5॥
vighātājjāmātuḥ paramasuhṛdō bhōjanṛpatē-
rjarāsandhē rundhatyanavadhiruṣāndhē’tha mathurām ।
rathādyairdyōrlabdhaiḥ katipayabalastvaṃ balayuta-
strayōviṃśatyakṣauhiṇi tadupanītaṃ samahṛthāḥ ॥6॥
baddhaṃ balādatha balēna balōttaraṃ tvaṃ
bhūyō balōdyamarasēna mumōchithainam ।
niśśēṣadigjayasamāhṛtaviśvasainyāt
kō’nyastatō hi balapauruṣavāṃstadānīm ॥7॥
bhagnaḥ sa lagnahṛdayō’pi nṛpaiḥ praṇunnō
yuddhaṃ tvayā vyadhita ṣōḍaśakṛtva ēvam ।
akṣauhiṇīḥ śiva śivāsya jaghantha viṣṇō
sambhūya saikanavatitriśataṃ tadānīm ॥8॥
aṣṭādaśē’sya samarē samupēyuṣi tvaṃ
dṛṣṭvā purō’tha yavanaṃ yavanatrikōṭyā ।
tvaṣṭrā vidhāpya puramāśu payōdhimadhyē
tatrā’tha yōgabalataḥ svajanānanaiṣīḥ ॥9॥
padabhyāṃ tvāṃ padmamālī chakita iva purānnirgatō dhāvamānō
mlēchChēśēnānuyātō vadhasukṛtavihīnēna śailē nyalaiṣīḥ ।
suptēnāṅghryāhatēna drutamatha muchukundēna bhasmīkṛtē’smin
bhūpāyāsmai guhāntē sulalitavapuṣā tasthiṣē bhaktibhājē ॥10॥
aikṣvākō’haṃ viraktō’smyakhilanṛpasukhē tvatprasādaikakāṅkṣī
hā dēvēti stuvantaṃ varavitatiṣu taṃ nispṛhaṃ vīkṣya hṛṣyan ।
muktēstulyāṃ cha bhaktiṃ dhutasakalamalāṃ mōkṣamapyāśu datvā
kāryaṃ hiṃsāviśuddhyai tapa iti cha tadā prāttha lōkapratītyai ॥11॥
tadanu mathurāṃ gatvā hatvā chamūṃ yavanāhṛtāṃ
magadhapatinā mārgē sainyaiḥ purēva nivāritaḥ ।
charamavijayaṃ darpāyāsmai pradāya palāyitō
jaladhinagarīṃ yātō vātālayēśvara pāhi mām ॥12॥