tridivavardhakivardhitakauśalaṃ tridaśadattasamastavibhūtimat ।
jaladhimadhyagataṃ tvamabhūṣayō navapuraṃ vapurañchitarōchiṣā ॥1॥
daduṣi rēvatabhūbhṛti rēvatīṃ halabhṛtē tanayāṃ vidhiśāsanāt ।
mahitamutsavaghōṣamapūpuṣaḥ samuditairmuditaiḥ saha yādavaiḥ ॥2॥
atha vidarbhasutāṃ khalu rukmiṇīṃ praṇayinīṃ tvayi dēva sahōdaraḥ ।
svayamaditsata chēdimahībhujē svatamasā tamasādhumupāśrayan ॥3॥
chiradhṛtapraṇayā tvayi bālikā sapadi kāṅkṣitabhaṅgasamākulā ।
tava nivēdayituṃ dvijamādiśat svakadanaṃ kadanaṅgavinirmitam ॥4॥
dvijasutō’pi cha tūrṇamupāyayau tava puraṃ hi durāśadurāsadam ।
mudamavāpa cha sādarapūjitaḥ sa bhavatā bhavatāpahṛtā svayam ॥5॥
sa cha bhavantamavōchata kuṇḍinē nṛpasutā khalu rājati rukmiṇī ।
tvayi samutsukayā nijadhīratārahitayā hi tayā prahitō’smyaham ॥6॥
tava hṛtā’smi puraiva guṇairahaṃ harati māṃ kila chēdinṛpō’dhunā ।
ayi kṛpālaya pālaya māmiti prajagadē jagadēkapatē tayā ॥7॥
aśaraṇāṃ yadi māṃ tvamupēkṣasē sapadi jīvitamēva jahāmyaham ।
iti girā sutanōratanōt bhṛśaṃ suhṛdayaṃ hṛdayaṃ tava kātaram ॥8॥
akathayastvamathainamayē sakhē tadadhikā mama manmathavēdanā ।
nṛpasamakṣamupētya harāmyahaṃ tadayi tāṃ dayitāmasitēkṣaṇām ॥9॥
pramuditēna cha tēna samaṃ tadā rathagatō laghu kuṇḍinamēyivān ।
gurumarutpuranāyaka mē bhavān vitanutāṃ tanutāṃ nikhilāpadām ॥10॥