kvachidatha tapanōparāgakālē puri nidadhat kṛtavarmakāmasūnū ।
yadukulamahilāvṛtaḥ sutīrthaṃ samupagatō’si samantapañchakākhyam ॥1॥
bahutarajanatāhitāya tatra tvamapi punan vinimajya tīrthatōyam ।
dvijagaṇaparimuktavittarāśiḥ samamilathāḥ kurupāṇḍavādimitraiḥ ॥2॥
tava khalu dayitājanaiḥ samētā drupadasutā tvayi gāḍhabhaktibhārā ।
taduditabhavadāhṛtiprakāraiḥ atimumudē samamanyabhāminībhiḥ ॥3॥
tadanu cha bhagavan nirīkṣya gōpānatikutukādupagamya mānayitvā।
chirataravirahāturāṅgarēkhāḥ paśupavadhūḥ sarasaṃ tvamanvayāsīḥ ॥4॥
sapadi cha bhavadīkṣaṇōtsavēna pramuṣitamānahṛdāṃ nitambinīnām ।
atirasaparimuktakañchulīkē parichayahṛdyatarē kuchē nyalaiṣīḥ ॥5॥
ripujanakalahaiḥ punaḥ punarmē samupagatairiyatī vilambanā’bhūt ।
iti kṛtaparirambhaṇētvayi drāk ativivaśā khalu rādhikā nililyē ॥6॥
apagatavirahavyathāstadā tā rahasi vidhāya dadātha tattvabōdham ।
paramasukhachidātmakō’hamātmētyudayatu vaḥ sphuṭamēva chētasīti ॥7॥
sukharasaparimiśritō viyōgaḥ kimapi purā’bhavaduddhavōpadēśaiḥ ।
samabhavadamutaḥ paraṃ tu tāsāṃ paramasukhaikyamayī bhavadvichintā ॥8॥
munivaranivahaistavātha pitrā duritaśamāya śubhāni pṛchChyamānaiḥ ।
tvayi sati kimidaṃ śubhāntaraiḥ rityuruhasitairapi yājitastadā’sau ॥9॥
sumahati yajanē vitāyamānē pramuditamitrajanē sahaiva gōpāḥ ।
yadujanamahitāstrimāsamātraṃ bhavadanuṣaṅgarasaṃ purēva bhēju ḥ ॥10॥
vyapagamasamayē samētya rādhāṃ dṛḍhamupagūhya nirīkṣya vītakhēdām ।
pramuditahṛdayaḥ puraṃ prayātaḥ pavanapurēśvara pāhi māṃ gadēbhyaḥ ॥11॥