ramājānē jānē yadiha tava bhaktēṣu vibhavō
na sadyassampadyastadiha madakṛttvādaśaminām ।
praśāntiṃ kṛtvaiva pradiśasi tataḥ kāmamakhilaṃ
praśāntēṣu kṣipraṃ na khalu bhavadīyē chyutikathā ॥1॥
sadyaḥ prasādaruṣitān vidhiśaṅkarādīn
kēchidvibhō nijaguṇānuguṇaṃ bhajantaḥ ।
bhraṣṭā bhavanti bata kaṣṭamadīrghadṛṣṭyā
spaṣṭaṃ vṛkāsura udāharaṇaṃ kilāsmin ॥2॥
śakunijaḥ sa tu nāradamēkadā
tvaritatōṣamapṛchChadadhīśvaram ।
sa cha didēśa girīśamupāsituṃ
na tu bhavantamabandhumasādhuṣu ॥3॥
tapastaptvā ghōraṃ sa khalu kupitaḥ saptamadinē
śiraḥ Chitvā sadyaḥ puraharamupasthāpya purataḥ ।
atikṣudraṃ raudraṃ śirasi karadānēna nidhanaṃ
jagannāthādvavrē bhavati vimukhānāṃ kva śubhadhīḥ ॥4॥
mōktāraṃ bandhamuktō hariṇapatiriva prādravatsō’tha rudraṃ
daityāt bhītyā sma dēvō diśi diśi valatē pṛṣṭhatō dattadṛṣṭiḥ ।
tūṣṇīkē sarvalōkē tava padamadhirōkṣyantamudvīkṣya śarvaṃ
dūrādēvāgratastvaṃ paṭuvaṭuvapuṣā tasthiṣē dānavāya ॥5॥
bhadraṃ tē śākunēya bhramasi kimadhunā tvaṃ piśāchasya vāchā
sandēhaśchēnmaduktau tava kimu na karōṣyaṅgulīmaṅgamaulau ।
itthaṃ tvadvākyamūḍhaḥ śirasi kṛtakaraḥ sō’patachChinnapātaṃ
bhraṃśō hyēvaṃ parōpāsiturapi cha gatiḥ śūlinō’pi tvamēva ॥6॥
bhṛguṃ kila sarasvatīnikaṭavāsinastāpasā-
strimūrtiṣu samādiśannadhikasattvatāṃ vēditum ।
ayaṃ punaranādarāduditaruddharōṣē vidhau
harē’pi cha jihiṃsiṣau girijayā dhṛtē tvāmagāt ॥7॥
suptaṃ ramāṅkabhuvi paṅkajalōchanaṃ tvāṃ
viprē vinighnati padēna mudōtthitastvam ।
sarvaṃ kṣamasva munivarya bhavēt sadā mē
tvatpādachinhamiha bhūṣaṇamityavādīḥ ॥8॥
niśchitya tē cha sudṛḍhaṃ tvayi baddhabhāvāḥ
sārasvatā munivarā dadhirē vimōkṣam ।
tvāmēvamachyuta punaśchyutidōṣahīnaṃ
sattvōchchayaikatanumēva vayaṃ bhajāmaḥ ॥9॥
jagatsṛṣṭyādau tvāṃ nigamanivahairvandibhiriva
stutaṃ viṣṇō sachchitparamarasanirdvaitavapuṣam ।
parātmānaṃ bhūman paśupavanitābhāgyanivahaṃ
paritāpaśrāntyai pavanapuravāsin paribhajē ॥10॥