sthitassa kamalōdbhavastava hi nābhipaṅkēruhē
kutaḥ svididamambudhāvuditamityanālōkayan ।
tadīkṣaṇakutūhalāt pratidiśaṃ vivṛttānana-
śchaturvadanatāmagādvikasadaṣṭadṛṣṭyambujām ॥1॥
mahārṇavavighūrṇitaṃ kamalamēva tatkēvalaṃ
vilōkya tadupāśrayaṃ tava tanuṃ tu nālōkayan ।
ka ēṣa kamalōdarē mahati nissahāyō hyahaṃ
kutaḥ svididambujaṃ samajanīti chintāmagāt ॥2॥
amuṣya hi sarōruhaḥ kimapi kāraṇaṃ sambhvē-
diti sma kṛtaniśchayassa khalu nālarandhrādhvanā ।
svayōgabalavidyayā samavarūḍhavān prauḍhadhī –
stvadīyamatimōhanaṃ na tu kalēvaraṃ dṛṣṭavān ॥3॥
tataḥ sakalanālikāvivaramārgagō mārgayan
prayasya śatavatsaraṃ kimapi naiva sandṛṣṭavān ।
nivṛtya kamalōdarē sukhaniṣaṇṇa ēkāgradhīḥ
samādhibalamādadhē bhavadanugrahaikāgrahī ॥4॥
śatēna parivatsarairdṛḍhasamādhibandhōllasat-
prabōdhaviśadīkṛtaḥ sa khalu padminīsambhavaḥ ।
adṛṣṭacharamadbhutaṃ tava hi rūpamantardṛśā
vyachaṣṭa parituṣṭadhīrbhujagabhōgabhāgāśrayam ॥5॥
kirīṭamukuṭōllasatkaṭakahārakēyūrayuṅ-
maṇisphuritamēkhalaṃ suparivītapītāmbaram ।
kalāyakusumaprabhaṃ galatalōllasatkaustubhaṃ
vapustadayi bhāvayē kamalajanmē darśitam ॥6॥
śrutiprakaradarśitaprachuravaibhava śrīpatē
harē jaya jaya prabhō padamupaiṣi diṣṭyā dṛśōḥ ।
kuruṣva dhiyamāśu mē bhuvananirmitau karmaṭhā-
miti druhiṇavarṇitasvaguṇabaṃhimā pāhi mām ॥7॥
labhasva bhuvanatrayīrachanadakṣatāmakṣatāṃ
gṛhāṇa madanugrahaṃ kuru tapaścha bhūyō vidhē ।
bhavatvakhilasādhanī mayi cha bhaktiratyutkaṭē-
tyudīrya giramādadhā muditachētasaṃ vēdhasam ॥8॥
śataṃ kṛtatapāstataḥ sa khalu divyasaṃvatsarā-
navāpya cha tapōbalaṃ matibalaṃ cha pūrvādhikam ।
udīkṣya kila kampitaṃ payasi paṅkajaṃ vāyunā
bhavadbalavijṛmbhitaḥ pavanapāthasī pītavān ॥9॥
tavaiva kṛpayā punassarasijēna tēnaiva saḥ
prakalpya bhuvanatrayīṃ pravavṛtē prajānirmitau ।
tathāvidhakṛpābharō gurumarutpurādhīśvara
tvamāśu paripāhi māṃ gurudayōkṣitairīkṣitaiḥ ॥10॥