śuddhā niṣkāmadharmaiḥ pravaragurugirā tatsvarūpaṃ paraṃ tē
śuddhaṃ dēhēndriyādivyapagatamakhilavyāptamāvēdayantē ।
nānātvasthaulyakārśyādi tu guṇajavapussaṅgatō’dhyāsitaṃ tē
vahnērdāruprabhēdēṣviva mahadaṇutādīptatāśāntatādi ॥1॥
āchāryākhyādharasthāraṇisamanumilachChiṣyarūpōttarāra-
ṇyāvēdhōdbhāsitēna sphuṭataraparibōdhāgninā dahyamānē ।
karmālīvāsanātatkṛtatanubhuvanabhrāntikāntārapūrē
dāhyābhāvēna vidyāśikhini cha viratē tvanmayī khalvavasthā ॥2॥
ēvaṃ tvatprāptitō’nyō nahi khalu nikhilaklēśahānērupāyō
naikāntātyantikāstē kṛṣivadagadaṣāḍguṇyaṣaṭkarmayōgāḥ ।
durvaikalyairakalyā api nigamapathāstatphalānyapyavāptā
mattāstvāṃ vismarantaḥ prasajati patanē yāntyanantān viṣādān॥3॥
tvallōkādanyalōkaḥ kvanu bhayarahitō yat parārdhadvayāntē
tvadbhītassatyalōkē’pi na sukhavasatiḥ padmabhūḥ padmanābha ।
ēvaṃ bhāvē tvadharmārjitabahutamasāṃ kā kathā nārakāṇāṃ
tanmē tvaṃ Chindhi bandhaṃ varad kṛpaṇabandhō kṛpāpūrasindhō ॥4॥
yāthārthyāttvanmayasyaiva hi mama na vibhō vastutō bandhamōkṣau
māyāvidyātanubhyāṃ tava tu virachitau svapnabōdhōpamau tau ।
baddhē jīvadvimuktiṃ gatavati cha bhidā tāvatī tāvadēkō
bhuṅktē dēhadrumasthō viṣayaphalarasānnāparō nirvyathātmā ॥5॥
jīvanmuktatvamēvaṃvidhamiti vachasā kiṃ phalaṃ dūradūrē
tannāmāśuddhabuddhērna cha laghu manasaśśōdhanaṃ bhaktitō’nyat ।
tanmē viṣṇō kṛṣīṣṭhāstvayi kṛtasakalaprārpaṇaṃ bhaktibhāraṃ
yēna syāṃ maṅkṣu kiñchid guruvachanamilattvatprabōdhastvadātmā ॥6॥
śabdbrahmaṇyapīha prayatitamanasastvāṃ na jānanti kēchit
kaṣṭaṃ vandhyaśramāstē chirataramiha gāṃ bibhratē niṣprasūtim ।
yasyāṃ viśvābhirāmāssakalamalaharā divyalīlāvatārāḥ
sachchitsāndraṃ cha rūpaṃ tava na nigaditaṃ tāṃ na vāchaṃ bhriyāsam ॥7॥
yō yāvān yādṛśō vā tvamiti kimapi naivāvagachChāmi bhūm-
nnēvañchānanyabhāvastvadanubhajanamēvādriyē chaidyavairin ।
tvalliṅgānāṃ tvadaṅghripriyajanasadasāṃ darśanasparśanādi-
rbhūyānmē tvatprapūjānatinutiguṇakarmānukīrtyādarō’pi ॥8॥
yadyallabhyēta tattattava samupahṛtaṃ dēva dāsō’smi tē’haṃ
tvadgēhōnmārjanādyaṃ bhavatu mama muhuḥ karma nirmāyamēva ।
sūryāgnibrāhmaṇātmādiṣu lasitachaturbāhumārādhayē tvāṃ
tvatprēmārdratvarūpō mama satatamabhiṣyandatāṃ bhaktiyōgaḥ ॥9॥
aikyaṃ tē dānahōmavrataniyamatapassāṅkhyayōgairdurāpaṃ
tvatsaṅgēnaiva gōpyaḥ kila sukṛtitamā prāpurānandasāndram ।
bhaktēṣvanyēṣu bhūyassvapi bahumanuṣē bhaktimēva tvamāsāṃ
tanmē tvadbhaktimēva draḍhaya hara gadān kṛṣṇa vātālayēśa ॥10॥