tvaṃ hi brahmaiva sākṣāt paramurumahimannakṣarāṇāmakāra-
stārō mantrēṣu rājñāṃ manurasi muniṣu tvaṃ bhṛgurnāradō’pi ।
prahlādō dānavānāṃ paśuṣu cha surabhiḥ pakṣiṇāṃ vainatēyō
nāgānāmasyanantassurasaridapi cha srōtasāṃ viśvamūrtē ॥1॥
brahmaṇyānāṃ balistvaṃ kratuṣu cha japayajñō’si vīrēṣu pārthō
bhaktānāmuddhavastvaṃ balamasi balināṃ dhāma tējasvināṃ tvam ।
nāstyantastvadvibhūtērvikasadatiśayaṃ vastu sarvaṃ tvamēva
tvaṃ jīvastvaṃ pradhānaṃ yadiha bhavadṛtē tanna kiñchit prapañchē ॥2॥
dharmaṃ varṇāśramāṇāṃ śrutipathavihitaṃ tvatparatvēna bhaktyā
kurvantō’ntarvirāgē vikasati śanakaiḥ santyajantō labhantē ।
sattāsphūrtipriyatvātmakamakhilapadārthēṣu bhinnēṣvabhinnaṃ
nirmūlaṃ viśvamūlaṃ paramamahamiti tvadvibōdhaṃ viśuddham ॥3॥
jñānaṃ karmāpi bhaktistritayamiha bhavatprāpakaṃ tatra tāva-
nnirviṇṇānāmaśēṣē viṣaya iha bhavēt jñānayōgē’dhikāraḥ ।
saktānāṃ karmayōgastvayi hi vinihitō yē tu nātyantasaktāḥ
nāpyatyantaṃ viraktāstvayi cha dhṛtarasā bhaktiyōgō hyamīṣām ॥4॥
jñānaṃ tvadbhaktatāṃ vā laghu sukṛtavaśānmartyalōkē labhantē
tasmāttatraiva janma spṛhayati bhagavan nākagō nārakō vā ।
āviṣṭaṃ māṃ tu daivādbhavajalanidhipōtāyitē martyadēhē
tvaṃ kṛtvā karṇadhāraṃ gurumanuguṇavātāyitastārayēthāḥ ॥5॥
avyaktaṃ mārgayantaḥ śrutibhirapi nayaiḥ kēvalajñānalubdhāḥ
kliśyantē’tīva siddhiṃ bahutarajanuṣāmanta ēvāpnuvanti ।
dūrasthaḥ karmayōgō’pi cha paramaphalē nanvayaṃ bhaktiyōga-
stvāmūlādēva hṛdyastvaritamayi bhavatprāpakō vardhatāṃ mē ॥6॥
jñānāyaivātiyatnaṃ munirapavadatē brahmatattvaṃ tu śṛṇvan
gāḍhaṃ tvatpādabhaktiṃ śaraṇamayati yastasya muktiḥ karāgrē ।
tvaddhyānē’pīha tulyā punarasukaratā chittachāñchalyahētō-
rabhyāsādāśu śakyaṃ tadapi vaśayituṃ tvatkṛpāchārutābhyām ॥7॥
nirviṇṇaḥ karmamārgē khalu viṣamatamē tvatkathādau cha gāḍhaṃ
jātaśraddhō’pi kāmānayi bhuvanapatē naiva śaknōmi hātum ।
tadbhūyō niśchayēna tvayi nihitamanā dōṣabuddhyā bhajaṃstān
puṣṇīyāṃ bhaktimēva tvayi hṛdayagatē maṅkṣu naṅkṣyanti saṅgāḥ ॥8॥
kaśchit klēśārjitārthakṣayavimalamatirnudyamānō janaughaiḥ
prāgēvaṃ prāha viprō na khalu mama janaḥ kālakarmagrahā vā।
chētō mē duḥkhahētustadiha guṇagaṇaṃ bhāvayatsarvakārī-
tyuktvā śāntō gatastvāṃ mama cha kuru vibhō tādṛśī chittaśāntim ॥9॥
ailaḥ prāgurvaśīṃ pratyativivaśamanāḥ sēvamānaśchiraṃ tāṃ
gāḍhaṃ nirvidya bhūyō yuvatisukhamidaṃ kṣudramēvēti gāyan ।
tvadbhaktiṃ prāpya pūrṇaḥ sukhataramacharattadvaduddhūtasaṅgaṃ
bhaktōttaṃsaṃ kriyā māṃ pavanapurapatē hanta mē rundhi rōgān ॥10॥