[kṛṣṇayajurvēda-ntaittarīya brāhmaṇa 3-4-1-1]

śrī gurubhyō namaḥ । hariḥ ōm ।

brahma̍ṇē brāhma̠ṇamāla̍bhatē । kṣa̠ttrāya̍ rāja̠nyam̎ । ma̠rudbhyō̠ vaiśyam̎ । tapa̍sē śū̠dram । tama̍sē̠ taska̍ram । nāra̍kāya vīra̠haṇam̎ । pā̠pmanē̎ klī̠bam । ā̠kra̠yāyā̍yō̠gūm ।
kāmā̍ya pugg‍ścha̠lūm । ati̍kruṣṭāya māga̠dham ॥ 1 ॥

gī̠tāya̍ sū̠tam । nṛ̠ttāya̍ śailū̠ṣam । dharmā̍ya sabhācha̠ram । na̠rmāya̍ rē̠bham । nari̍ṣṭhāyai bhīma̠lam । hasā̍ya̠ kārim̎ । ā̠na̠ndāya̍ strīṣa̠kham । pra̠mudē̍ kumārīpu̠tram । mē̠dhāyai̍ rathakā̠ram । dhairyā̍ya̠ takṣā̍ṇam ॥ 2 ॥

śramā̍ya kaulā̠lam । mā̠yāyai̍ kārmā̠ram । rū̠pāya̍ maṇikā̠ram । śubhē̍ va̠pam । śa̠ra̠vyā̍yā iṣukā̠ram । hē̠tyai dha̍nvakā̠ram । karma̍ṇē jyākā̠ram । di̠ṣṭāya̍ rajjusa̠rgam । mṛ̠tyavē̍ mṛga̠yum । anta̍kāya śva̠nitam̎ ॥ 3 ॥

sa̠ndhayē̍ jā̠ram । gē̠hāyō̍papa̠tim । nir-ṛ̍tyai parivi̠ttam । ārtyai̍ parivividā̠nam । arā̎dhyai didhiṣū̠patim̎ । pa̠vitrā̍ya bhi̠ṣajam̎ । pra̠jñānā̍ya nakṣatrada̠r​śam । niṣkṛ̍tyai pēśaskā̠rīm । balā̍yōpa̠dām । varṇā̍yānū̠rudham̎ ॥ 4 ॥

na̠dībhya̍ḥ pauñji̠ṣṭam । ṛ̠kṣīkā̎bhyō̠ naiṣā̍dam । pu̠ru̠ṣa̠vyā̠ghrāya̍ du̠rmadam̎ । pra̠yudbhya̠ unma̍ttam । ga̠ndha̠rvā̠psa̠rābhyō̠ vrātyam̎ । sa̠rpa̠dē̠va̠ja̠nēbhyō-‘pra̍tipadam । avē̎bhyaḥ kita̠vam । i̠ryatā̍yā̠ aki̍tavam । pi̠śā̠chēbhyō̍ bidalakā̠ram । yā̠tu̠dhānē̎bhyaḥ kaṇṭakakā̠ram ॥ 5 ॥

u̠thsā̠dēbhya̍ḥ ku̠bjam । pra̠mudē̍ vāma̠nam । dvā̠rbhya-ssrā̠mam । svapnā̍yā̠ndham । adha̍rmāya badhi̠ram । sa̠ñjñānā̍ya smarakā̠rīm । pra̠kā̠mōdyā̍yōpa̠sadam̎ । ā̠śi̠kṣāyai̎ pra̠śninam̎ । u̠pa̠śi̠kṣāyā̍ abhipra̠śninam̎ । ma̠ryādā̍yai praśnavivā̠kam ॥ 6 ॥

ṛtyai̎ stē̠nahṛ̍dayam । vaira̍hatyāya̠ piśu̍nam । vivi̍ttyai kṣa̠ttāram̎ । aupa̍draṣṭāya saṅgrahī̠tāram̎ । balā̍yānucha̠ram । bhū̠mnē pa̍riṣka̠ndam । pri̠yāya̍ priyavā̠dinam̎ । ari̍ṣṭyā aśvasā̠dam । mēdhā̍ya vāsaḥ palpū̠līm । pra̠kā̠māya̍ rajayi̠trīm ॥ 7 ॥

bhāyai̍ dārvāhā̠ram । pra̠bhāyā̍ āgnē̠ndham । nāka̍sya pṛ̠ṣṭhāyā̍bhiṣē̠ktāram̎ । bra̠dhnasya̍ vi̠ṣṭapā̍ya pātranirṇē̠gam । dē̠va̠lō̠kāya̍ pēśi̠tāram̎ । ma̠nu̠ṣya̠lō̠kāya̍ prakari̠tāram̎ । sarvē̎bhyō lō̠kēbhya̍ upasē̠ktāram̎ । ava̍rtyai va̠dhāyō̍pamanthi̠tāram̎ । su̠va̠rgāya̍ lō̠kāya̍ bhāga̠dugham̎ । var​ṣi̍ṣṭhāya̠ nākā̍ya parivē̠ṣṭāram̎ ॥ 8 ॥

armē̎bhyō hasti̠pam । ja̠vāyā̎śva̠pam । puṣṭyai̍ gōpā̠lam । tēja̍sē-‘japā̠lam । vī̠ryā̍yāvipā̠lam । irā̍yai kī̠nāśam̎ । kī̠lālā̍ya surākā̠ram । bha̠drāya̍ gṛha̠pam । śrēya̍sē vitta̠dham । adhya̍kṣāyānukṣa̠ttāram̎ ॥ 9 ॥

ma̠nyavē̍-‘yastā̠pam । krōdhā̍ya nisa̠ram । śōkā̍yābhisa̠ram । u̠tkū̠la̠vi̠kū̠lābhyā̎-ntri̠sthinam̎ । yōgā̍ya yō̠ktāram̎ । kṣēmā̍ya vimō̠ktāram̎ । vapu̍ṣē mānaskṛ̠tam । śīlā̍yāñjanīkā̠ram । nir-ṛ̍tyai kōśakā̠rīm । ya̠māyā̠sūm ॥ 10 ॥

ya̠myai̍ yama̠sūm । atha̍rva̠bhyō-‘va̍tōkām । sa̠ṃva̠thsa̠rāya̍ paryā̠riṇī̎m । pa̠ri̠va̠thsa̠rāyāvi̍jātām । i̠dā̠va̠thsa̠rāyā̍pa̠skadva̍rīm । i̠dva̠tsa̠rāyā̠tītva̍rīm । va̠thsa̠rāya̠ vija̍rjarām । sa̠ṃva̠thsa̠rāya̠ pali̍knīm । vanā̍ya vana̠pam । a̠nyatō̍-‘raṇyāya dāva̠pam ॥ 11 ॥

sarō̎bhyō dhaiva̠ram । vēśa̍ntābhyō̠ dāśam̎ । u̠pa̠sthāva̍rībhyō̠ baindam̎ । na̠ḍva̠lābhya̍-śśauṣka̠lam । pā̠ryā̍ya kaiva̠rtam । a̠vā̠ryā̍ya mārgā̠ram । tī̠rthēbhya̍ ā̠ndam । viṣa̍mēbhyō mainā̠lam । svanē̎bhya̠ḥ parṇa̍kam । guhā̎bhya̠ḥ kirā̍tam । sānu̍bhyō̠ jambha̍kam । parva̍tēbhya̠ḥ kimpū̍ruṣam ॥ 12 ॥

pra̠ti̠śrutkā̍yā ṛtu̠lam । ghōṣā̍ya bha̠ṣam । antā̍ya bahuvā̠dinam̎ । a̠na̠ntāya̠ mūkam̎ । maha̍sē vīṇāvā̠dam । krōśā̍ya tūṇava̠dhmam । ā̠kra̠ndāya̍ dundubhyāghā̠tam । a̠va̠ra̠spa̠rāya̍ śaṅkha̠dhmam । ṛ̠bhubhyō̍-‘jinasandhā̠yam । sā̠dhyēbhya̍ścharma̠mṇam ॥ 13 ॥

bī̠bha̠thsāyai̍ paulka̠sam । bhūtyai̍ jāgara̠ṇam । abhū̎tyai svapa̠nam । tu̠lāyai̍ vāṇi̠jam । varṇā̍ya hiraṇyakā̠ram । viśvē̎bhyō dē̠vēbhya̍-ssidhma̠lam । pa̠śchā̠ddō̠ṣāya̍ glā̠vam । ṛtyai̍ janavā̠dinam̎ । vyṛ̍ddhyā apaga̠lbham । sa̠g̠ṃ‍śa̠rāya̍ pra̠chChidam̎ ॥ 14 ॥

hasā̍ya pugg‍ścha̠lūmāla̍bhatē । vī̠ṇā̠vā̠da-ṅgaṇa̍ka-ṅgī̠tāya̍ । yāda̍sē śābu̠lyām । na̠rmāya̍ bhadrava̠tīm । tū̠ṣṇa̠va̠dhma-ṅgrā̍ma̠ṇya̍-mpāṇisaṅghā̠ta-nnṛ̠ttāya̍ । mōdā̍yānu̠krōśa̍kam । ā̠na̠ndāya̍ tala̠vam ॥ 15 ॥

a̠kṣa̠rā̠jāya̍ kita̠vam । kṛ̠tāya̍ sabhā̠vinam̎ । trētā̍yā ādinavada̠r​śam । dvā̠pa̠rāya̍ bahi̠-ssadam̎ । kala̍yē sabhāsthā̠ṇum । du̠ṣkṛ̠tāya̍ cha̠rakā̍chāryam । adhva̍nē brahmachā̠riṇam̎ । pi̠śā̠chēbhya̍-ssaila̠gam । pi̠pā̠sāyai̍ gōvya̠chCham । nir-ṛ̍tyai gōghā̠tam । kṣu̠dhē gō̍vika̠rtam । kṣu̠ttṛ̠ṣṇābhyā̠-ntam । yō gāṃ vi̠kṛnta̍nta-mmā̠g̠ṃsa-mbhikṣa̍māṇa upa̠tiṣṭha̍tē ॥ 16 ॥

bhūmyai̍ pīṭhasa̠rpiṇa̠māla̍bhatē । a̠gnayē-‘g̍ṃsa̠lam । vā̠yavē̍ chāṇḍā̠lam । a̠ntari̍kṣāya vagṃśana̠rtinam̎ । di̠vē kha̍la̠tim । sūryā̍ya harya̠kṣam । cha̠ndrama̍sē mirmi̠ram । nakṣa̍trēbhyaḥ ki̠lāsam̎ । ahnē̍ śu̠kla-mpi̍ṅga̠lam । rātri̍yai kṛ̠ṣṇa-mpi̍ṅgā̠kṣam ॥ 17 ॥

vā̠chē puru̍ṣa̠māla̍bhatē । prā̠ṇama̍pā̠naṃ vyā̠namu̍dā̠nagṃ sa̍mā̠na-ntānvā̠yavē̎ । sūryā̍ya̠ chakṣu̠rāla̍bhatē । mana̍ścha̠ndrama̍sē । di̠gbhya-śśrōtram̎ । pra̠jāpa̍tayē̠ puru̍ṣam ॥ 18 ॥

athai̠tānarū̍pēbhya̠ āla̍bhatē । ati̍hrasva̠mati̍dīrgham । ati̍kṛśa̠matyag̍ṃsalam । ati̍śukla̠mati̍kṛṣṇam । ati̍ślakṣṇa̠mati̍lōmaśam । ati̍kiriṭa̠mati̍danturam । ati̍mirmira̠mati̍mēmiṣam । ā̠śāyai̍ jā̠mim । pra̠tī̠kṣāyai̍ kumā̠rīm ॥ 19 ॥