śrī śiva uvācha
śṛṇu dēvi mahāguhyaṃ paraṃ puṇyavivardhanaṃ .
śarabhēśāṣṭakaṃ mantraṃ vakṣyāmi tava tattvataḥ ॥
ṛṣinyāsādikaṃ yattatsarvapūrvavadācharēt .
dhyānabhēdaṃ viśēṣēṇa vakṣyāmyahamataḥ śivē ॥
dhyānaṃ
jvalanakuṭilakēśaṃ sūryachandrāgninētraṃ
niśitataranakhāgrōddhūtahēmābhadēham ।
śarabhamatha munīndraiḥ sēvyamānaṃ sitāṅgaṃ
praṇatabhayavināśaṃ bhāvayētpakṣirājam ॥
atha stōtraṃ
dēvādidēvāya jaganmayāya śivāya nālīkanibhānanāya ।
śarvāya bhīmāya śarādhipāya namō’stu tubhyaṃ śarabhēśvarāya ॥ 1 ॥
harāya bhīmāya haripriyāya bhavāya śāntāya parātparāya ।
mṛḍāya rudrāya vilōchanāya namō’stu tubhyaṃ śarabhēśvarāya ॥ 2 ॥
śītāṃśuchūḍāya digambarāya sṛṣṭisthitidhvaṃsanakāraṇāya ।
jaṭākalāpāya jitēndriyāya namō’stu tubhyaṃ śarabhēśvarāya ॥ 3 ॥
kalaṅkakaṇṭhāya bhavāntakāya kapālaśūlāttakarāmbujāya ।
bhujaṅgabhūṣāya purāntakāya namō’stu tubhyaṃ śarabhēśvarāya ॥ 4 ॥
śamādiṣaṭkāya yamāntakāya yamādiyōgāṣṭakasiddhidāya ।
umādhināthāya purātanāya namō’stu tubhyaṃ śarabhēśvarāya ॥ 5 ॥
ghṛṇādipāśāṣṭakavarjitāya khilīkṛtāsmatpathi pūrvagāya ।
guṇādihīnāya guṇatrayāya namō’stu tubhyaṃ śarabhēśvarāya ॥ 6 ॥
kālāya vēdāmṛtakandalāya kalyāṇakautūhalakāraṇāya ।
sthūlāya sūkṣmāya svarūpagāya namō’stu tubhyaṃ śarabhēśvarāya ॥ 7 ॥
pañchānanāyānilabhāskarāya pañchāśadarṇādyaparākṣayāya ।
pañchākṣarēśāya jagaddhitāya namō’stu tubhyaṃ śarabhēśvarāya ॥ 8 ॥
iti śrī śarabhēśāṣṭakam ॥