atha tṛtīyastōtram
kuru bhuṅkṣva cha karma nijaṃ niyataṃ haripādavinamradhiyā satatam ।
harirēva parō harirēva guruḥ harirēva jagatpitṛmātṛgatiḥ ॥ 1॥
na tatō’styaparaṃ jagadīḍyatamaṃ (jagatīḍyatamaṃ) paramātparataḥ puruṣōttamataḥ ।
tadalaṃ bahulōkavichintanayā pravaṇaṃ kuru mānasamīśapadē ॥ 2॥
yatatō’pi harēḥ padasaṃsmaraṇē sakalaṃ hyaghamāśu layaṃ vrajati ।
smaratastu vimuktipadaṃ paramaṃ sphuṭamēṣyati tatkimapākriyatē ॥ 3॥
śaṛṇutāmalasatyavachaḥ paramaṃ śapathēritaṃ uchChritabāhuyugam ।
na harēḥ paramō na harēḥ sadṛśaḥ paramaḥ sa tu sarva chidātmagaṇāt ॥ 4॥
yadi nāma parō na bhavēta (bhavētsa) hariḥ kathamasya vaśē jagadētadabhūt ।
yadi nāma na tasya vaśē sakalaṃ kathamēva tu nityasukhaṃ na bhavēt ॥ 5॥
na cha karmavimāmala kālaguṇaprabhṛtīśamachittanu taddhi yataḥ ।
chidachittanu sarvamasau tu hariryamayēditi vaidikamasti vachaḥ ॥ 6॥
vyavahārabhidā’pi gurōrjagatāṃ na tu chittagatā sa hi chōdyaparam ।
bahavaḥ puruṣāḥ puruṣapravarō harirityavadatsvayamēva hariḥ ॥ 7॥
chaturānana pūrvavimuktagaṇā harimētya tu pūrvavadēva sadā ।
niyatōchchavinīchatayaiva nijāṃ sthitimāpuriti sma paraṃ vachanam ॥ 8॥
ānandatīrthasannāmnā pūrṇaprajñābhidhāyujā ।
kṛtaṃ haryaṣṭakaṃ bhaktyā paṭhataḥ prīyatē hariḥ ॥ 9॥
iti śrīmadānandatīrthabhagavatpādāchārya virachitaṃ
dvādaśastōtrēṣu tṛtīyastōtraṃ sampūrṇam