viśuddhaṃ paraṃ sachchidānandarūpaṃ
guṇādhāramādhārahīnaṃ varēṇyam ।
mahāntaṃ vibhāntaṃ guhāntaṃ guṇāntaṃ
sukhāntaṃ svayaṃ dhāma rāmaṃ prapadyē ॥ 1 ॥
śivaṃ nityamēkaṃ vibhuṃ tārakākhyaṃ
sukhākāramākāraśūnyaṃ sumānyam ।
mahēśaṃ kalēśaṃ surēśaṃ parēśaṃ
narēśaṃ nirīśaṃ mahīśaṃ prapadyē ॥ 2 ॥
yadāvarṇayatkarṇamūlē’ntakālē
śivō rāma rāmēti rāmēti kāśyām ।
tadēkaṃ paraṃ tārakabrahmarūpaṃ
bhajē’haṃ bhajē’haṃ bhajē’haṃ bhajē’ham ॥ 3 ॥
mahāratnapīṭhē śubhē kalpamūlē
sukhāsīnamādityakōṭiprakāśam ।
sadā jānakīlakṣmaṇōpētamēkaṃ
sadā rāmachandraṃ bhajē’haṃ bhajē’ham ॥ 4 ॥
kvaṇadratnamañjīrapādāravindaṃ
lasanmēkhalāchārupītāmbarāḍhyam ।
mahāratnahārōllasatkaustubhāṅgaṃ
nadachchañcharīmañjarīlōlamālam ॥ 5 ॥
lasachchandrikāsmēraśōṇādharābhaṃ
samudyatpataṅgēndukōṭiprakāśam ।
namadbrahmarudrādikōṭīraratna
sphuratkāntinīrājanārādhitāṅghrim ॥ 6 ॥
puraḥ prāñjalīnāñjanēyādibhaktān
svachinmudrayā bhadrayā bōdhayantam ।
bhajē’haṃ bhajē’haṃ sadā rāmachandraṃ
tvadanyaṃ na manyē na manyē na manyē ॥ 7 ॥
yadā matsamīpaṃ kṛtāntaḥ samētya
prachaṇḍaprakōpairbhaṭairbhīṣayēnmām ।
tadāviṣkarōṣi tvadīyaṃ svarūpaṃ
sadāpatpraṇāśaṃ sakōdaṇḍabāṇam ॥ 8 ॥
nijē mānasē mandirē sannidhēhi
prasīda prasīda prabhō rāmachandra ।
sasaumitriṇā kaikayīnandanēna
svaśaktyānubhaktyā cha saṃsēvyamāna ॥ 9 ॥
svabhaktāgragaṇyaiḥ kapīśairmahīśai-
-ranīkairanēkaiścha rāma prasīda ।
namastē namō’stvīśa rāma prasīda
praśādhi praśādhi prakāśaṃ prabhō mām ॥ 10 ॥
tvamēvāsi daivaṃ paraṃ mē yadēkaṃ
suchaitanyamētattvadanyaṃ na manyē ।
yatō’bhūdamēyaṃ viyadvāyutējō
jalōrvyādikāryaṃ charaṃ chācharaṃ cha ॥ 11 ॥
namaḥ sachchidānandarūpāya tasmai
namō dēvadēvāya rāmāya tubhyam ।
namō jānakījīvitēśāya tubhyaṃ
namaḥ puṇḍarīkāyatākṣāya tubhyam ॥ 12 ॥
namō bhaktiyuktānuraktāya tubhyaṃ
namaḥ puṇyapuñjaikalabhyāya tubhyam ।
namō vēdavēdyāya chādyāya puṃsē
namaḥ sundarāyēndirāvallabhāya ॥ 13 ॥
namō viśvakartrē namō viśvahartrē
namō viśvabhōktrē namō viśvamātrē ।
namō viśvanētrē namō viśvajētrē
namō viśvapitrē namō viśvamātrē ॥ 14 ॥
namastē namastē samastaprapañcha-
-prabhōgaprayōgapramāṇapravīṇa ।
madīyaṃ manastvatpadadvandvasēvāṃ
vidhātuṃ pravṛttaṃ suchaitanyasiddhyai ॥ 15 ॥
śilāpi tvadaṅghrikṣamāsaṅgirēṇu
prasādāddhi chaitanyamādhatta rāma ।
narastvatpadadvandvasēvāvidhānā-
-tsuchaitanyamētīti kiṃ chitramatra ॥ 16 ॥
pavitraṃ charitraṃ vichitraṃ tvadīyaṃ
narā yē smarantyanvahaṃ rāmachandra ।
bhavantaṃ bhavāntaṃ bharantaṃ bhajantō
labhantē kṛtāntaṃ na paśyantyatō’ntē ॥ 17 ॥
sa puṇyaḥ sa gaṇyaḥ śaraṇyō mamāyaṃ
narō vēda yō dēvachūḍāmaṇiṃ tvām ।
sadākāramēkaṃ chidānandarūpaṃ
manōvāgagamyaṃ paraṃ dhāma rāma ॥ 18 ॥
prachaṇḍapratāpaprabhāvābhibhūta-
-prabhūtārivīra prabhō rāmachandra ।
balaṃ tē kathaṃ varṇyatē’tīva bālyē
yatō’khaṇḍi chaṇḍīśakōdaṇḍadaṇḍam ॥ 19 ॥
daśagrīvamugraṃ saputraṃ samitraṃ
sariddurgamadhyastharakṣōgaṇēśam ।
bhavantaṃ vinā rāma vīrō narō vā
surō vā’marō vā jayētkastrilōkyām ॥ 20 ॥
sadā rāma rāmēti rāmāmṛtaṃ tē
sadārāmamānandaniṣyandakandam ।
pibantaṃ namantaṃ sudantaṃ hasantaṃ
hanūmantamantarbhajē taṃ nitāntam ॥ 21 ॥
sadā rāma rāmēti rāmāmṛtaṃ tē
sadārāmamānandaniṣyandakandam ।
pibannanvahaṃ nanvahaṃ naiva mṛtyō-
-rbibhēmi prasādādasādāttavaiva ॥ 22 ॥
asītāsamētairakōdaṇḍabhūṣai-
-rasaumitrivandyairachaṇḍapratāpaiḥ ।
alaṅkēśakālairasugrīvamitrai-
-rarāmābhidhēyairalaṃ daivatairnaḥ ॥ 23 ॥
avīrāsanasthairachinmudrikāḍhyai-
-rabhaktāñjanēyāditattvaprakāśaiḥ ।
amandāramūlairamandāramālai-
-rarāmābhidhēyairalaṃ daivatairnaḥ ॥ 24 ॥
asindhuprakōpairavandyapratāpai-
-rabandhuprayāṇairamandasmitāḍhyaiḥ ।
adaṇḍapravāsairakhaṇḍaprabōdhai-
-rarāmābhidhēyairalaṃ daivatairnaḥ ॥ 25 ॥
harē rāma sītāpatē rāvaṇārē
kharārē murārē’surārē parēti ।
lapantaṃ nayantaṃ sadākālamēvaṃ
samālōkayālōkayāśēṣabandhō ॥ 26 ॥
namastē sumitrāsuputrābhivandya
namastē sadā kaikayīnandanēḍya ।
namastē sadā vānarādhīśavandya
namastē namastē sadā rāmachandra ॥ 27 ॥
prasīda prasīda prachaṇḍapratāpa
prasīda prasīda prachaṇḍārikāla ।
prasīda prasīda prapannānukampin
prasīda prasīda prabhō rāmachandra ॥ 28 ॥
bhujaṅgaprayātaṃ paraṃ vēdasāraṃ
mudā rāmachandrasya bhaktyā cha nityam ।
paṭhansantataṃ chintayansvāntaraṅgē
sa ēva svayaṃ rāmachandraḥ sa dhanyaḥ ॥ 29 ॥
iti śrīmachChaṅkarāchārya kṛtaṃ śrī rāma bhujaṅgaprayāta stōtram ।