atha daśamō’dhyāyaḥ ।
vibhūtiyōgaḥ
śrībhagavānuvācha ।
bhūya ēva mahābāhō śṛṇu mē paramaṃ vachaḥ ।
yattē’haṃ prīyamāṇāya vakṣyāmi hitakāmyayā ॥ 1 ॥
na mē viduḥ suragaṇāḥ prabhavaṃ na maharṣayaḥ ।
ahamādirhi dēvānāṃ maharṣīṇāṃ cha sarvaśaḥ ॥ 2 ॥
yō māmajamanādiṃ cha vētti lōkamahēśvaram ।
asammūḍhaḥ sa martyēṣu sarvapāpaiḥ pramuchyatē ॥ 3 ॥
buddhirjñānamasammōhaḥ kṣamā satyaṃ damaḥ śamaḥ ।
sukhaṃ duḥkhaṃ bhavō’bhāvō bhayaṃ chābhayamēva cha ॥ 4 ॥
ahiṃsā samatā tuṣṭistapō dānaṃ yaśō’yaśaḥ ।
bhavanti bhāvā bhūtānāṃ matta ēva pṛthagvidhāḥ ॥ 5 ॥
maharṣayaḥ sapta pūrvē chatvārō manavastathā ।
madbhāvā mānasā jātā yēṣāṃ lōka imāḥ prajāḥ ॥ 6 ॥
ētāṃ vibhūtiṃ yōgaṃ cha mama yō vētti tattvataḥ ।
sō’vikampēna yōgēna yujyatē nātra saṃśayaḥ ॥ 7 ॥
ahaṃ sarvasya prabhavō mattaḥ sarvaṃ pravartatē ।
iti matvā bhajantē māṃ budhā bhāvasamanvitāḥ ॥ 8 ॥
machchittā madgataprāṇā bōdhayantaḥ parasparam ।
kathayantaścha māṃ nityaṃ tuṣyanti cha ramanti cha ॥ 9 ॥
tēṣāṃ satatayuktānāṃ bhajatāṃ prītipūrvakam ।
dadāmi buddhiyōgaṃ taṃ yēna māmupayānti tē ॥ 10 ॥
tēṣāmēvānukampārthamahamajñānajaṃ tamaḥ ।
nāśayāmyātmabhāvasthō jñānadīpēna bhāsvatā ॥ 11 ॥
arjuna uvācha ।
paraṃ brahma paraṃ dhāma pavitraṃ paramaṃ bhavān ।
puruṣaṃ śāśvataṃ divyamādidēvamajaṃ vibhum ॥ 12 ॥
āhustvāmṛṣayaḥ sarvē dēvarṣirnāradastathā ।
asitō dēvalō vyāsaḥ svayaṃ chaiva bravīṣi mē ॥ 13 ॥
sarvamētadṛtaṃ manyē yanmāṃ vadasi kēśava ।
na hi tē bhagavanvyaktiṃ vidurdēvā na dānavāḥ ॥ 14 ॥
svayamēvātmanātmānaṃ vēttha tvaṃ puruṣōttama ।
bhūtabhāvana bhūtēśa dēvadēva jagatpatē ॥ 15 ॥
vaktumarhasyaśēṣēṇa divyā hyātmavibhūtayaḥ ।
yābhirvibhūtibhirlōkānimāṃstvaṃ vyāpya tiṣṭhasi ॥ 16 ॥
kathaṃ vidyāmahaṃ yōgiṃstvāṃ sadā parichintayan ।
kēṣu kēṣu cha bhāvēṣu chintyō’si bhagavanmayā ॥ 17 ॥
vistarēṇātmanō yōgaṃ vibhūtiṃ cha janārdana ।
bhūyaḥ kathaya tṛptirhi śṛṇvatō nāsti mē’mṛtam ॥ 18 ॥
śrībhagavānuvācha ।
hanta tē kathayiṣyāmi divyā hyātmavibhūtayaḥ ।
prādhānyataḥ kuruśrēṣṭha nāstyantō vistarasya mē ॥ 19 ॥
ahamātmā guḍākēśa sarvabhūtāśayasthitaḥ ।
ahamādiścha madhyaṃ cha bhūtānāmanta ēva cha ॥ 20 ॥
ādityānāmahaṃ viṣṇurjyōtiṣāṃ raviraṃśumān ।
marīchirmarutāmasmi nakṣatrāṇāmahaṃ śaśī ॥ 21 ॥
vēdānāṃ sāmavēdō’smi dēvānāmasmi vāsavaḥ ।
indriyāṇāṃ manaśchāsmi bhūtānāmasmi chētanā ॥ 22 ॥
rudrāṇāṃ śaṅkaraśchāsmi vittēśō yakṣarakṣasām ।
vasūnāṃ pāvakaśchāsmi mēruḥ śikhariṇāmaham ॥ 23 ॥
purōdhasāṃ cha mukhyaṃ māṃ viddhi pārtha bṛhaspatim ।
sēnānīnāmahaṃ skandaḥ sarasāmasmi sāgaraḥ ॥ 24 ॥
maharṣīṇāṃ bhṛgurahaṃ girāmasmyēkamakṣaram ।
yajñānāṃ japayajñō’smi sthāvarāṇāṃ himālayaḥ ॥ 25 ॥
aśvatthaḥ sarvavṛkṣāṇāṃ dēvarṣīṇāṃ cha nāradaḥ ।
gandharvāṇāṃ chitrarathaḥ siddhānāṃ kapilō muniḥ ॥ 26 ॥
uchchaiḥśravasamaśvānāṃ viddhi māmamṛtōdbhavam ।
airāvataṃ gajēndrāṇāṃ narāṇāṃ cha narādhipam ॥ 27 ॥
āyudhānāmahaṃ vajraṃ dhēnūnāmasmi kāmadhuk ।
prajanaśchāsmi kandarpaḥ sarpāṇāmasmi vāsukiḥ ॥ 28 ॥
anantaśchāsmi nāgānāṃ varuṇō yādasāmaham ।
pitṝṇāmaryamā chāsmi yamaḥ saṃyamatāmaham ॥ 29 ॥
prahlādaśchāsmi daityānāṃ kālaḥ kalayatāmaham ।
mṛgāṇāṃ cha mṛgēndrō’haṃ vainatēyaścha pakṣiṇām ॥ 30 ॥
pavanaḥ pavatāmasmi rāmaḥ śastrabhṛtāmaham ।
jhaṣāṇāṃ makaraśchāsmi srōtasāmasmi jāhnavī ॥ 31 ॥
sargāṇāmādirantaścha madhyaṃ chaivāhamarjuna ।
adhyātmavidyā vidyānāṃ vādaḥ pravadatāmaham ॥ 32 ॥
akṣarāṇāmakārō’smi dvandvaḥ sāmāsikasya cha ।
ahamēvākṣayaḥ kālō dhātāhaṃ viśvatōmukhaḥ ॥ 33 ॥
mṛtyuḥ sarvaharaśchāhamudbhavaścha bhaviṣyatām ।
kīrtiḥ śrīrvākcha nārīṇāṃ smṛtirmēdhā dhṛtiḥ kṣamā ॥ 34 ॥
bṛhatsāma tathā sāmnāṃ gāyatrī Chandasāmaham ।
māsānāṃ mārgaśīrṣō’hamṛtūnāṃ kusumākaraḥ ॥ 35 ॥
dyūtaṃ Chalayatāmasmi tējastējasvināmaham ।
jayō’smi vyavasāyō’smi sattvaṃ sattvavatāmaham ॥ 36 ॥
vṛṣṇīnāṃ vāsudēvō’smi pāṇḍavānāṃ dhanañjayaḥ ।
munīnāmapyahaṃ vyāsaḥ kavīnāmuśanā kaviḥ ॥ 37 ॥
daṇḍō damayatāmasmi nītirasmi jigīṣatām ।
maunaṃ chaivāsmi guhyānāṃ jñānaṃ jñānavatāmaham ॥ 38 ॥
yachchāpi sarvabhūtānāṃ bījaṃ tadahamarjuna ।
na tadasti vinā yatsyānmayā bhūtaṃ charācharam ॥ 39 ॥
nāntō’sti mama divyānāṃ vibhūtīnāṃ parantapa ।
ēṣa tūddēśataḥ prōktō vibhūtērvistarō mayā ॥ 40 ॥
yadyadvibhūtimatsattvaṃ śrīmadūrjitamēva vā ।
tattadēvāvagachCha tvaṃ mama tējōṃ’śasambhavam ॥ 41 ॥
athavā bahunaitēna kiṃ jñātēna tavārjuna ।
viṣṭabhyāhamidaṃ kṛtsnamēkāṃśēna sthitō jagat ॥ 42 ॥
ōṃ tatsaditi śrīmadbhagavadgītāsūpaniṣatsu brahmavidyāyāṃ yōgaśāstrē śrīkṛṣṇārjunasaṃvādē
vibhūtiyōgō nāma daśamō’dhyāyaḥ ॥10 ॥