Print Friendly, PDF & Email

atha ēkādaśō’dhyāyaḥ ।
viśvarūpasandarśanayōgaḥ

arjuna uvācha ।
madanugrahāya paramaṃ guhyamadhyātmasañjñitam ।
yattvayōktaṃ vachastēna mōhō’yaṃ vigatō mama ॥ 1 ॥

bhavāpyayau hi bhūtānāṃ śrutau vistaraśō mayā ।
tvattaḥ kamalapatrākṣa māhātmyamapi chāvyayam ॥ 2 ॥

ēvamētadyathāttha tvamātmānaṃ paramēśvara ।
draṣṭumichChāmi tē rūpamaiśvaraṃ puruṣōttama ॥ 3 ॥

manyasē yadi tachChakyaṃ mayā draṣṭumiti prabhō ।
yōgēśvara tatō mē tvaṃ darśayātmānamavyayam ॥ 4 ॥

śrībhagavānuvācha ।
paśya mē pārtha rūpāṇi śataśō’tha sahasraśaḥ ।
nānāvidhāni divyāni nānāvarṇākṛtīni cha ॥ 5 ॥

paśyādityānvasūnrudrānaśvinau marutastathā ।
bahūnyadṛṣṭapūrvāṇi paśyāścharyāṇi bhārata ॥ 6 ॥

ihaikasthaṃ jagatkṛtsnaṃ paśyādya sacharācharam ।
mama dēhē guḍākēśa yachchānyaddraṣṭumichChasi ॥ 7 ॥

na tu māṃ śakyasē draṣṭumanēnaiva svachakṣuṣā ।
divyaṃ dadāmi tē chakṣuḥ paśya mē yōgamaiśvaram ॥ 8 ॥

sañjaya uvācha ।
ēvamuktvā tatō rājanmahāyōgēśvarō hariḥ ।
darśayāmāsa pārthāya paramaṃ rūpamaiśvaram ॥ 9 ॥

anēkavaktranayanamanēkādbhutadarśanam ।
anēkadivyābharaṇaṃ divyānēkōdyatāyudham ॥ 10 ॥

divyamālyāmbaradharaṃ divyagandhānulēpanam ।
sarvāścharyamayaṃ dēvamanantaṃ viśvatōmukham ॥ 11 ॥

divi sūryasahasrasya bhavēdyugapadutthitā ।
yadi bhāḥ sadṛśī sā syādbhāsastasya mahātmanaḥ ॥ 12 ॥

tatraikasthaṃ jagatkṛtsnaṃ pravibhaktamanēkadhā ।
apaśyaddēvadēvasya śarīrē pāṇḍavastadā ॥ 13 ॥

tataḥ sa vismayāviṣṭō hṛṣṭarōmā dhanañjayaḥ ।
praṇamya śirasā dēvaṃ kṛtāñjalirabhāṣata ॥ 14 ॥

arjuna uvācha ।
paśyāmi dēvāṃstava dēva dēhē sarvāṃstathā bhūtaviśēṣasaṅghān।
brahmāṇamīśaṃ kamalāsanasthamṛṣīṃścha sarvānuragāṃścha divyān ॥ 15 ॥

anēkabāhūdaravaktranētraṃ paśyāmi tvāṃ sarvatō’nantarūpam।
nāntaṃ na madhyaṃ na punastavādiṃ paśyāmi viśvēśvara viśvarūpa ॥ 16 ॥

kirīṭinaṃ gadinaṃ chakriṇaṃ cha tējōrāśiṃ sarvatō dīptimantam।
paśyāmi tvāṃ durnirīkṣyaṃ samantāddīptānalārkadyutimapramēyam ॥ 17 ॥

tvamakṣaraṃ paramaṃ vēditavyaṃ tvamasya viśvasya paraṃ nidhānam।
tvamavyayaḥ śāśvatadharmagōptā sanātanastvaṃ puruṣō matō mē ॥ 18 ॥

anādimadhyāntamanantavīryamanantabāhuṃ śaśisūryanētram।
paśyāmi tvāṃ dīptahutāśavaktraṃ svatējasā viśvamidaṃ tapantam ॥ 19 ॥

dyāvāpṛthivyōridamantaraṃ hi vyāptaṃ tvayaikēna diśaścha sarvāḥ।
dṛṣṭvādbhutaṃ rūpamugraṃ tavēdaṃ lōkatrayaṃ pravyathitaṃ mahātman ॥ 20 ॥

amī hi tvāṃ surasaṅghā viśanti kēchidbhītāḥ prāñjalayō gṛṇanti।
svastītyuktvā maharṣisiddhasaṅghāḥ stuvanti tvāṃ stutibhiḥ puṣkalābhiḥ ॥ 21 ॥

rudrādityā vasavō yē cha sādhyā viśvē’śvinau marutaśchōṣmapāścha।
gandharvayakṣāsurasiddhasaṅghā vīkṣantē tvāṃ vismitāśchaiva sarvē ॥ 22 ॥

rūpaṃ mahattē bahuvaktranētraṃ mahābāhō bahubāhūrupādam।
bahūdaraṃ bahudaṃṣṭrākarālaṃ dṛṣṭvā lōkāḥ pravyathitāstathāham ॥ 23 ॥

nabhaḥspṛśaṃ dīptamanēkavarṇaṃ vyāttānanaṃ dīptaviśālanētram।
dṛṣṭvā hi tvāṃ pravyathitāntarātmā dhṛtiṃ na vindāmi śamaṃ cha viṣṇō ॥ 24 ॥

daṃṣṭrākarālāni cha tē mukhāni dṛṣṭvaiva kālānalasannibhāni।
diśō na jānē na labhē cha śarma prasīda dēvēśa jagannivāsa ॥ 25 ॥

amī cha tvāṃ dhṛtarāṣṭrasya putrāḥ sarvē sahaivāvanipālasaṅghaiḥ।
bhīṣmō drōṇaḥ sūtaputrastathāsau sahāsmadīyairapi yōdhamukhyaiḥ ॥ 26 ॥

vaktrāṇi tē tvaramāṇā viśanti daṃṣṭrākarālāni bhayānakāni।
kēchidvilagnā daśanāntarēṣu sandṛśyantē chūrṇitairuttamāṅgaiḥ ॥ 27 ॥

yathā nadīnāṃ bahavō’mbuvēgāḥ samudramēvābhimukhā dravanti।
tathā tavāmī naralōkavīrā viśanti vaktrāṇyabhivijvalanti ॥ 28 ॥

yathā pradīptaṃ jvalanaṃ pataṅgā viśanti nāśāya samṛddhavēgāḥ।
tathaiva nāśāya viśanti lōkāstavāpi vaktrāṇi samṛddhavēgāḥ ॥ 29 ॥

lēlihyasē grasamānaḥ samantāllōkānsamagrānvadanairjvaladbhiḥ।
tējōbhirāpūrya jagatsamagraṃ bhāsastavōgrāḥ pratapanti viṣṇō ॥ 30 ॥

ākhyāhi mē kō bhavānugrarūpō namō’stu tē dēvavara prasīda।
vijñātumichChāmi bhavantamādyaṃ na hi prajānāmi tava pravṛttim ॥ 31 ॥

śrībhagavānuvācha ।
kālō’smi lōkakṣayakṛtpravṛddhō lōkānsamāhartumiha pravṛttaḥ।
ṛtē’pi tvāṃ na bhaviṣyanti sarvē yē’vasthitāḥ pratyanīkēṣu yōdhāḥ ॥ 32 ॥

tasmāttvamuttiṣṭha yaśō labhasva jitvā śatrūnbhuṅkṣva rājyaṃ samṛddham।
mayaivaitē nihatāḥ pūrvamēva nimittamātraṃ bhava savyasāchin ॥ 33 ॥

drōṇaṃ cha bhīṣmaṃ cha jayadrathaṃ cha karṇaṃ tathānyānapi yōdhavīrān।
mayā hatāṃstvaṃ jahi mā vyathiṣṭhā yudhyasva jētāsi raṇē sapatnān ॥ 34 ॥

sañjaya uvācha ।
ētachChrutvā vachanaṃ kēśavasya kṛtāñjalirvēpamānaḥ kirīṭī।
namaskṛtvā bhūya ēvāha kṛṣṇaṃ sagadgadaṃ bhītabhītaḥ praṇamya ॥ 35 ॥

arjuna uvācha ।
sthānē hṛṣīkēśa tava prakīrtyā jagatprahṛṣyatyanurajyatē cha।
rakṣāṃsi bhītāni diśō dravanti sarvē namasyanti cha siddhasaṅghāḥ ॥ 36 ॥

kasmāchcha tē na namēranmahātmangarīyasē brahmaṇō’pyādikartrē।
ananta dēvēśa jagannivāsa tvamakṣaraṃ sadasattatparaṃ yat ॥ 37 ॥

tvamādidēvaḥ puruṣaḥ purāṇastvamasya viśvasya paraṃ nidhānam।
vēttāsi vēdyaṃ cha paraṃ cha dhāma tvayā tataṃ viśvamanantarūpa ॥ 38 ॥

vāyuryamō’gnirvaruṇaḥ śaśāṅkaḥ prajāpatistvaṃ prapitāmahaścha।
namō namastē’stu sahasrakṛtvaḥ punaścha bhūyō’pi namō namastē ॥ 39 ॥

namaḥ purastādatha pṛṣṭhatastē namō’stu tē sarvata ēva sarva।
anantavīryāmitavikramastvaṃ sarvaṃ samāpnōṣi tatō’si sarvaḥ ॥ 40 ॥

sakhēti matvā prasabhaṃ yaduktaṃ hē kṛṣṇa hē yādava hē sakhēti।
ajānatā mahimānaṃ tavēdaṃ mayā pramādātpraṇayēna vāpi ॥ 41 ॥

yachchāvahāsārthamasatkṛtō’si vihāraśayyāsanabhōjanēṣu।
ēkō’thavāpyachyuta tatsamakṣaṃ tatkṣāmayē tvāmahamapramēyam ॥ 42 ॥

pitāsi lōkasya charācharasya tvamasya pūjyaścha gururgarīyān।
na tvatsamō’styabhyadhikaḥ kutō’nyō lōkatrayē’pyapratimaprabhāva ॥ 43 ॥

tasmātpraṇamya praṇidhāya kāyaṃ prasādayē tvāmahamīśamīḍyam।
pitēva putrasya sakhēva sakhyuḥ priyaḥ priyāyārhasi dēva sōḍhum ॥ 44 ॥

adṛṣṭapūrvaṃ hṛṣitō’smi dṛṣṭvā bhayēna cha pravyathitaṃ manō mē।
tadēva mē darśaya dēvarūpaṃ prasīda dēvēśa jagannivāsa ॥ 45 ॥

kirīṭinaṃ gadinaṃ chakrahastamichChāmi tvāṃ draṣṭumahaṃ tathaiva।
tēnaiva rūpēṇa chaturbhujēna sahasrabāhō bhava viśvamūrtē ॥ 46 ॥

śrībhagavānuvācha ।
mayā prasannēna tavārjunēdaṃ rūpaṃ paraṃ darśitamātmayōgāt।
tējōmayaṃ viśvamanantamādyaṃ yanmē tvadanyēna na dṛṣṭapūrvam ॥ 47 ॥

na vēdayajñādhyayanairna dānairna cha kriyābhirna tapōbhirugraiḥ।
ēvaṃrūpaḥ śakya ahaṃ nṛlōkē draṣṭuṃ tvadanyēna kurupravīra ॥ 48 ॥

mā tē vyathā mā cha vimūḍhabhāvō dṛṣṭvā rūpaṃ ghōramīdṛṅmamēdam।
vyapētabhīḥ prītamanāḥ punastvaṃ tadēva mē rūpamidaṃ prapaśya ॥ 49 ॥

sañjaya uvācha ।
ityarjunaṃ vāsudēvastathōktvā svakaṃ rūpaṃ darśayāmāsa bhūyaḥ।
āśvāsayāmāsa cha bhītamēnaṃ bhūtvā punaḥ saumyavapurmahātmā ॥ 50 ॥

arjuna uvācha ।
dṛṣṭvēdaṃ mānuṣaṃ rūpaṃ tava saumyaṃ janārdana ।
idānīmasmi saṃvṛttaḥ sachētāḥ prakṛtiṃ gataḥ ॥ 51 ॥

śrībhagavānuvācha ।
sudurdarśamidaṃ rūpaṃ dṛṣṭavānasi yanmama ।
dēvā apyasya rūpasya nityaṃ darśanakāṅkṣiṇaḥ ॥ 52 ॥

nāhaṃ vēdairna tapasā na dānēna na chējyayā ।
śakya ēvaṃvidhō draṣṭuṃ dṛṣṭavānasi māṃ yathā ॥ 53 ॥

bhaktyā tvananyayā śakya ahamēvaṃvidhō’rjuna ।
jñātuṃ draṣṭuṃ cha tattvēna pravēṣṭuṃ cha parantapa ॥ 54 ॥

matkarmakṛnmatparamō madbhaktaḥ saṅgavarjitaḥ ।
nirvairaḥ sarvabhūtēṣu yaḥ sa māmēti pāṇḍava ॥ 55 ॥

ōṃ tatsaditi śrīmadbhagavadgītāsūpaniṣatsu brahmavidyāyāṃ yōgaśāstrē śrīkṛṣṇārjunasaṃvādē

viśvarūpadarśanayōgō nāmaikādaśō’dhyāyaḥ ॥11 ॥