vināyakō vighnarājō gaurīputrō gaṇēśvaraḥ ।
skandāgrajō’vyayaḥ pūtō dakṣō’dhyakṣō dvijapriyaḥ ॥ 1 ॥
agnigarvachChidindraśrīpradō vāṇīpradāyakaḥ ।
sarvasiddhipradaḥ śarvatanayaḥ śarvarīpriyaḥ ॥ 2 ॥
sarvātmakaḥ sṛṣṭikartā dēvānīkārchitaḥ śivaḥ ।
siddhibuddhipradaḥ śāntō brahmachārī gajānanaḥ ॥ 3 ॥
dvaimāturō munistutyō bhaktavighnavināśanaḥ ।
ēkadantaśchaturbāhuśchaturaḥ śaktisaṃyutaḥ ॥ 4 ॥
lambōdaraḥ śūrpakarṇō harirbrahmaviduttamaḥ ।
kāvyō grahapatiḥ kāmī sōmasūryāgnilōchanaḥ ॥ 5 ॥
pāśāṅkuśadharaśchaṇḍō guṇātītō nirañjanaḥ ।
akalmaṣaḥ svayaṃ siddhaḥ siddhārchitapadāmbujaḥ ॥ 6 ॥
bījāpūraphalāsaktō varadaḥ śāśvataḥ kṛtī ।
dvijapriyō vītabhayō gadī chakrīkṣuchāpadhṛt ॥ 7 ॥
śrīdō’ja utpalakaraḥ śrīpatistutiharṣitaḥ ।
kulādribhēttā jaṭilaśchandrachūḍō’marēśvaraḥ ॥ 8 ॥
nāgayajñōpavītī cha kalikalmaṣanāśanaḥ ।
sthūlakaṇṭhaḥ svayaṅkartā sāmaghōṣapriyaḥ paraḥ ॥ 9 ॥
sthūlatuṇḍō’graṇīrdhīrō vāgīśaḥ siddhidāyakaḥ ।
dūrvābilvapriyaḥ kāntaḥ pāpahārī samāhitaḥ ॥ 10 ॥
āśritaśrīkaraḥ saumyō bhaktavāñChitadāyakaḥ ।
śāntō’chyutārchyaḥ kaivalyō sachchidānandavigrahaḥ ॥ 11 ॥
jñānī dayāyutō dāntō brahmadvēṣavivarjitaḥ ।
pramattadaityabhayadō vyaktamūrtiramūrtimān ॥ 12 ॥
śailēndratanujōtsaṅgakhēlanōtsukamānasaḥ ।
svalāvaṇyasudhāsārajitamanmathavigrahaḥ ॥ 13 ॥
samastajagadādhārō māyī mūṣakavāhanaḥ ।
ramārchitō vidhiśchaiva śrīkaṇṭhō vibudhēśvaraḥ ॥ 14 ॥
chintāmaṇidvīpapatiḥ paramātmā gajānanaḥ ।
hṛṣṭastuṣṭaḥ prasannātmā sarvasiddhipradāyakaḥ ॥ 15 ॥
aṣṭōttaraśatēnaivaṃ nāmnāṃ vighnēśvaraṃ vibhum ।
yaḥ pūjayēdanēnaiva bhaktyā siddhivināyakam ॥ 16 ॥
dūrvādaḻaiḥ bilvapatraiḥ puṣpairvā chandanākṣataiḥ ।
sarvānkāmānavāpnōti sarvavighnaiḥ pramuchyatē ॥ 17 ॥
iti bhaviṣyōttarapurāṇē vināyakāṣṭōttaraśatanāma stōtram ।