අථ ද්වාදශෝऽධ්යායඃ ।
භක්තියෝගඃ
අර්ජුන උවාච ।
ඒවං සතතයුක්තා යේ භක්තාස්ත්වාං පර්යුපාසතේ ।
යේ චාප්යක්ෂරමව්යක්තං තේෂාං කේ යෝගවිත්තමාඃ ॥ 1 ॥
ශ්රීභගවානුවාච ।
මය්යාවේශ්ය මනෝ යේ මාං නිත්යයුක්තා උපාසතේ ।
ශ්රද්ධයා පරයෝපේතාස්තේ මේ යුක්තතමා මතාඃ ॥ 2 ॥
යේ ත්වක්ෂරමනිර්දේශ්යමව්යක්තං පර්යුපාසතේ ।
සර්වත්රගමචිංත්යං ච කූටස්ථමචලං ධ්රුවම් ॥ 3 ॥
සංනියම්යේංද්රියග්රාමං සර්වත්ර සමබුද්ධයඃ ।
තේ ප්රාප්නුවංති මාමේව සර්වභූතහිතේ රතාඃ ॥ 4 ॥
ක්ලේශෝऽධිකතරස්තේෂාමව්යක්තාසක්තචේතසාම් ।
අව්යක්තා හි ගතිර්දුඃඛං දේහවද්භිරවාප්යතේ ॥ 5 ॥
යේ තු සර්වාණි කර්මාණි මයි සංන්යස්ය මත්පරාඃ ।
අනන්යේනෛව යෝගේන මාං ධ්යායංත උපාසතේ ॥ 6 ॥
තේෂාමහං සමුද්ධර්තා මෘත්යුසංසාරසාගරාත් ।
භවාමි න චිරාත්පාර්ථ මය්යාවේශිතචේතසාම් ॥ 7 ॥
මය්යේව මන ආධත්ස්ව මයි බුද්ධිං නිවේශය ।
නිවසිෂ්යසි මය්යේව අත ඌර්ධ්වං න සංශයඃ ॥ 8 ॥
අථ චිත්තං සමාධාතුං න ශක්නෝෂි මයි ස්ථිරම් ।
අභ්යාසයෝගේන තතෝ මාමිච්ඡාප්තුං ධනංජය ॥ 9 ॥
අභ්යාසේऽප්යසමර්ථෝऽසි මත්කර්මපරමෝ භව ।
මදර්ථමපි කර්මාණි කුර්වන්සිද්ධිමවාප්ස්යසි ॥ 10 ॥
අථෛතදප්යශක්තෝऽසි කර්තුං මද්යෝගමාශ්රිතඃ ।
සර්වකර්මඵලත්යාගං තතඃ කුරු යතාත්මවාන් ॥ 11 ॥
ශ්රේයෝ හි ජ්ඤානමභ්යාසාජ්ජ්ඤානාද්ධ්යානං විශිෂ්යතේ ।
ධ්යානාත්කර්මඵලත්යාගස්ත්යාගාච්ඡාංතිරනංතරම් ॥ 12 ॥
අද්වේෂ්ටා සර්වභූතානාං මෛත්රඃ කරුණ ඒව ච ।
නිර්මමෝ නිරහංකාරඃ සමදුඃඛසුඛඃ ක්ෂමී ॥ 13 ॥
සංතුෂ්ටඃ සතතං යෝගී යතාත්මා දෘඪනිශ්චයඃ ।
මය්යර්පිතමනෝබුද්ධිර්යෝ මද්භක්තඃ ස මේ ප්රියඃ ॥ 14 ॥
යස්මාන්නෝද්විජතේ ලෝකෝ ලෝකාන්නෝද්විජතේ ච යඃ ।
හර්ෂාමර්ෂභයෝද්වේගෛර්මුක්තෝ යඃ ස ච මේ ප්රියඃ ॥ 15 ॥
අනපේක්ෂඃ ශුචිර්දක්ෂ උදාසීනෝ ගතව්යථඃ ।
සර්වාරංභපරිත්යාගී යෝ මද්භක්තඃ ස මේ ප්රියඃ ॥ 16 ॥
යෝ න හෘෂ්යති න ද්වේෂ්ටි න ශෝචති න කාංක්ෂති ।
ශුභාශුභපරිත්යාගී භක්තිමාන්යඃ ස මේ ප්රියඃ ॥ 17 ॥
සමඃ ශත්රෞ ච මිත්රේ ච තථා මානාපමානයෝඃ ।
ශීතෝෂ්ණසුඛදුඃඛේෂු සමඃ සංගවිවර්ජිතඃ ॥ 18 ॥
තුල්යනිංදාස්තුතිර්මෞනී සංතුෂ්ටෝ යේන කේනචිත් ।
අනිකේතඃ ස්ථිරමතිර්භක්තිමාන්මේ ප්රියෝ නරඃ ॥ 19 ॥
යේ තු ධර්ම්යාමෘතමිදං යථෝක්තං පර්යුපාසතේ ।
ශ්රද්දධානා මත්පරමා භක්තාස්තේऽතීව මේ ප්රියාඃ ॥ 20 ॥
ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ ශ්රීකෘෂ්ණාර්ජුනසංවාදේ
භක්තියෝගෝ නාම ද්වාදශෝऽධ්යායඃ ॥12 ॥