ಕರ್ತುರಾಜ್ಞಯಾ ಪ್ರಾಪ್ಯತೇ ಫಲಮ್ ।
ಕರ್ಮ ಕಿಂ ಪರಂ ಕರ್ಮ ತಜ್ಜಡಮ್ ॥ 1 ॥
ಕೃತಿಮಹೋದಧೌ ಪತನಕಾರಣಮ್ ।
ಫಲಮಶಾಶ್ವತಂ ಗತಿನಿರೋಧಕಮ್ ॥ 2 ॥
ಈಶ್ವರಾರ್ಪಿತಂ ನೇಚ್ಛಯಾ ಕೃತಮ್ ।
ಚಿತ್ತಶೋಧಕಂ ಮುಕ್ತಿಸಾಧಕಮ್ ॥ 3 ॥
ಕಾಯವಾಙ್ಮನಃ ಕಾರ್ಯಮುತ್ತಮಮ್ ।
ಪೂಜನಂ ಜಪಶ್ಚಿಂತನಂ ಕ್ರಮಾತ್ ॥ 4 ॥
ಜಗತ ಈಶಧೀ ಯುಕ್ತಸೇವನಮ್ ।
ಅಷ್ಟಮೂರ್ತಿಭೃದ್ದೇವಪೂಜನಮ್ ॥ 5 ॥
ಉತ್ತಮಸ್ತವಾದುಚ್ಚಮಂದತಃ ।
ಚಿತ್ತಜಂ ಜಪಧ್ಯಾನಮುತ್ತಮಮ್ ॥ 6 ॥
ಆಜ್ಯಧಾರಯಾ ಸ್ರೋತಸಾ ಸಮಮ್ ।
ಸರಲಚಿಂತನಂ ವಿರಲತಃ ಪರಮ್ ॥ 7 ॥
ಭೇದಭಾವನಾತ್ ಸೋಽಹಮಿತ್ಯಸೌ ।
ಭಾವನಾಽಭಿದಾ ಪಾವನೀ ಮತಾ ॥ 8 ॥
ಭಾವಶೂನ್ಯಸದ್ಭಾವಸುಸ್ಥಿತಿಃ ।
ಭಾವನಾಬಲಾದ್ಭಕ್ತಿರುತ್ತಮಾ ॥ 9 ॥
ಹೃತ್ಸ್ಥಲೇ ಮನಃ ಸ್ವಸ್ಥತಾ ಕ್ರಿಯಾ ।
ಭಕ್ತಿಯೋಗಬೋಧಾಶ್ಚ ನಿಶ್ಚಿತಮ್ ॥ 10 ॥
ವಾಯುರೋಧನಾಲ್ಲೀಯತೇ ಮನಃ ।
ಜಾಲಪಕ್ಷಿವದ್ರೋಧಸಾಧನಮ್ ॥ 11 ॥
ಚಿತ್ತವಾಯವಶ್ಚಿತ್ಕ್ರಿಯಾಯುತಾಃ ।
ಶಾಖಯೋರ್ದ್ವಯೀ ಶಕ್ತಿಮೂಲಕಾ ॥ 12 ॥
ಲಯವಿನಾಶನೇ ಉಭಯರೋಧನೇ ।
ಲಯಗತಂ ಪುನರ್ಭವತಿ ನೋ ಮೃತಮ್ ॥ 13 ॥
ಪ್ರಾಣಬಂಧನಾಲ್ಲೀನಮಾನಸಮ್ ।
ಏಕಚಿಂತನಾನ್ನಾಶಮೇತ್ಯದಃ ॥ 14 ॥
ನಷ್ಟಮಾನಸೋತ್ಕೃಷ್ಟಯೋಗಿನಃ ।
ಕೃತ್ಯಮಸ್ತಿ ಕಿಂ ಸ್ವಸ್ಥಿತಿಂ ಯತಃ ॥ 15 ॥
ದೃಶ್ಯವಾರಿತಂ ಚಿತ್ತಮಾತ್ಮನಃ ।
ಚಿತ್ತ್ವದರ್ಶನಂ ತತ್ತ್ವದರ್ಶನಮ್ ॥ 16 ॥
ಮಾನಸಂ ತು ಕಿಂ ಮಾರ್ಗಣೇ ಕೃತೇ ।
ನೈವ ಮಾನಸಂ ಮಾರ್ಗ ಆರ್ಜವಾತ್ ॥ 17 ॥
ವೃತ್ತಯಸ್ತ್ವಹಂ ವೃತ್ತಿಮಾಶ್ರಿತಾಃ ।
ವೃತ್ತಯೋ ಮನೋ ವಿದ್ಧ್ಯಹಂ ಮನಃ ॥ 18 ॥
ಅಹಮಯಂ ಕುತೋ ಭವತಿ ಚಿನ್ವತಃ ।
ಅಯಿ ಪತತ್ಯಹಂ ನಿಜವಿಚಾರಣಮ್ ॥ 19 ॥
ಅಹಮಿ ನಾಶಭಾಜ್ಯಹಮಹಂತಯಾ ।
ಸ್ಫುರತಿ ಹೃತ್ಸ್ವಯಂ ಪರಮಪೂರ್ಣಸತ್ ॥ 20 ॥
ಇದಮಹಂ ಪದಾಽಭಿಖ್ಯಮನ್ವಹಮ್ ।
ಅಹಮಿಲೀನಕೇಽಪ್ಯಲಯಸತ್ತಯಾ ॥ 21 ॥
ವಿಗ್ರಹೇಂದ್ರಿಯಪ್ರಾಣಧೀತಮಃ ।
ನಾಹಮೇಕಸತ್ತಜ್ಜಡಂ ಹ್ಯಸತ್ ॥ 22 ॥
ಸತ್ತ್ವಭಾಸಿಕಾ ಚಿತ್ಕ್ವವೇತರಾ ।
ಸತ್ತಯಾ ಹಿ ಚಿಚ್ಚಿತ್ತಯಾ ಹ್ಯಹಮ್ ॥ 23 ॥
ಈಶಜೀವಯೋರ್ವೇಷಧೀಭಿದಾ ।
ಸತ್ಸ್ವಭಾವತೋ ವಸ್ತು ಕೇವಲಮ್ ॥ 24 ॥
ವೇಷಹಾನತಃ ಸ್ವಾತ್ಮದರ್ಶನಮ್ ।
ಈಶದರ್ಶನಂ ಸ್ವಾತ್ಮರೂಪತಃ ॥ 25 ॥
ಆತ್ಮಸಂಸ್ಥಿತಿಃ ಸ್ವಾತ್ಮದರ್ಶನಮ್ ।
ಆತ್ಮನಿರ್ದ್ವಯಾದಾತ್ಮನಿಷ್ಠತಾ ॥ 26 ॥
ಜ್ಞಾನವರ್ಜಿತಾಽಜ್ಞಾನಹೀನಚಿತ್ ।
ಜ್ಞಾನಮಸ್ತಿ ಕಿಂ ಜ್ಞಾತುಮಂತರಮ್ ॥ 27 ॥
ಕಿಂ ಸ್ವರೂಪಮಿತ್ಯಾತ್ಮದರ್ಶನೇ ।
ಅವ್ಯಯಾಽಭವಾಽಽಪೂರ್ಣಚಿತ್ಸುಖಮ್ ॥ 28 ॥
ಬಂಧಮುಕ್ತ್ಯತೀತಂ ಪರಂ ಸುಖಮ್ ।
ವಿಂದತೀಹ ಜೀವಸ್ತು ದೈವಿಕಃ ॥ 29 ॥
ಅಹಮಪೇತಕಂ ನಿಜವಿಭಾನಕಮ್ ।
ಮಹದಿದಂತಪೋ ರಮನವಾಗಿಯಮ್ ॥ 30 ॥