॥ સપ્તમઃ સર્ગઃ ॥
॥ નાગરનારાયણઃ ॥
અત્રાંતરે ચ કુલટાકુલવર્ત્મપાત-સંજાતપાતક ઇવ સ્ફુટલાંછનશ્રીઃ ।
વૃંદાવનાંતરમદીપયદંશુજાલૈ-ર્દિક્સુંદરીવદનચંદનબિંદુરિંદુઃ ॥ 40 ॥
પ્રસરતિ શશધરબિંબે વિહિતવિલંબે ચ માધવે વિધુરા ।
વિરચિતવિવિધવિલાપં સા પરિતાપં ચકારોચ્ચૈઃ ॥ 41 ॥
॥ ગીતં 13 ॥
કથિતસમયેઽપિ હરિરહહ ન યયૌ વનમ્ ।
મમ વિફલમિદમમલરૂપમપિ યૌવનમ્ ॥
યામિ હે કમિહ શરણં સખીજનવચનવંચિતા ॥ 1 ॥
યદનુગમનાય નિશિ ગહનમપિ શીલિતમ્ ।
તેન મમ હૃદયમિદમસમશરકીલિતમ્ ॥ 2 ॥
મમ મરણમેવ વરમતિવિતથકેતના ।
કિમિહ વિષહામિ વિરહાનલચેતના ॥ 3 ॥
મામહહ વિધુરયતિ મધુરમધુયામિની ।
કાપિ હરિમનુભવતિ કૃતસુકૃતકામિની ॥ 4 ॥
અહહ કલયામિ વલયાદિમણીભૂષણમ્ ।
હરિવિરહદહનવહનેન બહુદૂષણમ્ ॥ 5 ॥
કુસુમસુકુમારતનુમતનુશરલીલયા ।
સ્રગપિ હૃદિ હંતિ મામતિવિષમશીલયા ॥ 6 ॥
અહમિહ નિવસામિ નગણિતવનવેતસા ।
સ્મરતિ મધુસૂદનો મામપિ ન ચેતસા ॥ 7 ॥
હરિચરણશરણજયદેવકવિભારતી ।
વસતુ હૃદિ યુવતિરિવ કોમલકલાવતી ॥ 8 ॥
તત્કિં કામપિ કામિનીમભિસૃતઃ કિં વા કલાકેલિભિ-ર્બદ્ધો બંધુભિરંધકારિણિ વનોપાંતે કિમુ ભ્રામ્યતિ ।
કાંતઃ ક્લાંતમના મનાગપિ પથિ પ્રસ્થાતુમેવાક્ષમઃ સંકેતીકૃતમંજુવંજુલલતાકુંજેઽપિ યન્નાગતઃ ॥ 42 ॥
અથાગતાં માધવમંતરેણ સખીમિયં વીક્ષ્ય વિષાદમૂકામ્ ।
વિશંક્માના રમિતં કયાપિ જનાર્દનં દૃષ્ટવદેતદાહ ॥ 43 ॥
॥ ગીતં 14 ॥
સ્મરસમરોચિતવિરચિતવેશા ।
ગલિતકુસુમદરવિલુલિતકેશા ॥
કાપિ મધુરિપુણા વિલસતિ યુવતિરધિકગુણા ॥ 1 ॥
હરિપરિરંભણવલિતવિકારા ।
કુચકલશોપરિ તરલિતહારા ॥ 2 ॥
વિચલદલકલલિતાનનચંદ્રા ।
તદધરપાનરભસકૃતતંદ્રા ॥ 3 ॥
ચંચલકુંડલદલિતકપોલા ।
મુખરિતરસનજઘનગલિતલોલા ॥ 4 ॥
દયિતવિલોકિતલજ્જિતહસિતા ।
બહુવિધકૂજિતરતિરસરસિતા ॥ 5 ॥
વિપુલપુલકપૃથુવેપથુભંગા ।
શ્વસિતનિમીલિતવિકસદનંગા ॥ 6 ॥
શ્રમજલકણભરસુભગશરીરા ।
પરિપતિતોરસિ રતિરણધીરા ॥ 7 ॥
શ્રીજયદેવભણિતહરિરમિતમ્ ।
કલિકલુષં જનયતુ પરિશમિતમ્ ॥ 8 ॥
વિરહપાંડુમુરારિમુખાંબુજ-દ્યુતિરિયં તિરયન્નપિ ચેતનામ્ ।
વિધુરતીવ તનોતિ મનોભુવઃ સહૃદયે હૃદયે મદનવ્યથામ્ ॥ 44 ॥
॥ ગીતં 15 ॥
સમુદિતમદને રમણીવદને ચુંબનવલિતાધરે ।
મૃગમદતિલકં લિખતિ સપુલકં મૃગમિવ રજનીકરે ॥
રમતે યમુનાપુલિનવને વિજયી મુરારિરધુના ॥ 1 ॥
ઘનચયરુચિરે રચયતિ ચિકુરે તરલિતતરુણાનને ।
કુરબકકુસુમં ચપલાસુષમં રતિપતિમૃગકાનને ॥ 2 ॥
ઘટયતિ સુઘને કુચયુગગગને મૃગમદરુચિરૂષિતે ।
મણિસરમમલં તારકપટલં નખપદશશિભૂષિતે ॥ 3 ॥
જિતબિસશકલે મૃદુભુજયુગલે કરતલનલિનીદલે ।
મરકતવલયં મધુકરનિચયં વિતરતિ હિમશીતલે ॥ 4 ॥
રતિગૃહજઘને વિપુલાપઘને મનસિજકનકાસને ।
મણિમયરસનં તોરણહસનં વિકિરતિ કૃતવાસને ॥ 5 ॥
ચરણકિસલયે કમલાનિલયે નખમણિગણપૂજિતે ।
બહિરપવરણં યાવકભરણં જનયતિ હૃદિ યોજિતે ॥ 6 ॥
રમયતિ સદૃશં કામપિ સુભૃશં ખલહલધરસોદરે ।
કિમફલમવસં ચિરમિહ વિરસં વદ સખિ વિટપોદરે ॥ 7 ॥
ઇહ રસભણને કૃતહરિગુણને મધુરિપુપદસેવકે ।
કલિયુગચરિતં ન વસતુ દુરિતં કવિનૃપજયદેવકે ॥ 8 ॥
નાયાતઃ સખિ નિર્દયો યદિ શઠસ્ત્વં દૂતિ કિં દૂયસે સ્વચ્છંદં બહુવલ્લભઃ સ રમતે કિં તત્ર તે દૂષણમ્ ।
પશ્યાદ્ય પ્રિયસમ્ગમાય દયિતસ્યાકૃષ્યમાણં ગણૈ-રુત્કંઠાર્તિભરાદિવ સ્ફુટદિદં ચેતઃ સ્વયં યાસ્યતિ ॥ 45 ॥
॥ ગીતં 16 ॥
અનિલતરલકુવલયનયનેન ।
તપતિ ન સા કિસલયશયનેન ॥
સખિ યા રમિતા વનમાલિના ॥ 1 ॥
વિકસિતસરસિજલલિતમુખેન ।
સ્ફુટતિ ન સા મનસિજવિશિખેન ॥ 2 ॥
અમૃતમધુરમૃદુતરવચનેન ।
જ્વલતિ ન સા મલયજપવનેન ॥ 3 ॥
સ્થલજલરુહરુચિકરચરણેન ।
લુઠતિ ન સા હિમકરકિરણેન ॥ 4 ॥
સજલજલદસમુદયરુચિરેણ ।
દલતિ ન સા હૃદિ ચિરવિરહેણ ॥ 5 ॥
કનકનિકષરુચિશુચિવસનેન ।
શ્વસતિ ન સા પરિજનહસનેન ॥ 6 ॥
સકલભુવનજનવરતરુણેન ।
વહતિ ન સા રુજમતિકરુણેન ॥ 7 ॥
શ્રીજયદેવભણિતવચનેન ।
પ્રવિશતુ હરિરપિ હૃદયમનેન ॥ 8 ॥
મનોભવાનંદન ચંદનાનિલ પ્રસીદ રે દક્ષિણ મુંચ વામતામ્ ।
ક્ષણં જગત્પ્રાણ વિધાય માધવં પુરો મમ પ્રાણહરો ભવિષ્યસિ ॥ 46 ॥
રિપુરિવ સખીસંવાસોઽયં શિખીવ હિમાનિલો વિષમિવ સુધારશ્મિર્યસ્મિંદુનોતિ મનોગતે ।
હૃદયમદયે તસ્મિન્નેવં પુનર્વલતે બલાત્ કુવલયદૃશાં વામઃ કામો નિકામનિરંકુશઃ ॥ 47 ॥
બાધાં વિધેહિ મલયાનિલ પંચબાણ પ્રાણાન્ગૃહાણ ન ગૃહં પુનરાશ્રયિષ્યે ।
કિં તે કૃતાંતભગિનિ ક્ષમયા તરંગૈ-રંગાનિ સિંચ મમ શામ્યતુ દેહદાહઃ ॥ 48 ॥
પ્રાતર્નીલનિચોલમચ્યુતમુરસ્સંવીતપીતાંબરમ્
રધાયાશ્કિતં વિલોક્ય હસતિ સ્વૈરં સખીમંડલે ।
વ્રીડાચંચલમંચલં નયનયોરાધાય રાધાનને
સ્વાદુસ્મેરમુખોઽયમસ્તુ જગદાનંદાય નંદાત્મજઃ॥ (કસ્મિંશ્ચન પાઠાંતરે ઇદં પદ્યં વિદ્યતે)
॥ ઇતિ ગીતગોવિંદે વિપ્રલબ્ધાવર્ણને નાગનારાયણો નામ સપ્તમઃ સર્ગઃ ॥